સાબારકાંઠા જિલ્લાના ઇડર તાલુકાના ખેડૂતોને સિંચાઇ માટે પાણી મળી રહે તે માટે કરોડોના ખર્ચે કેનાલ તો બનાવવામાં આવી છે પણ જાળવણીના અભાવે કેનાલમાં પાણી ન પહોંચતું હોવાનો આરોપ લાગ્યો છે.
Share
ધારાસભ્ય રમણલાલ વોરાના કેનાલ મુદ્દાનું સત્ય શું?
કેનાલની સાફ સફાઇ અંગે સવાલ ઉઠતા વીટીવીએ રિયાલીટી ચેક કર્યું
'પાણીનો ફોર્સ વધુ હોવાથી પાળા તૂટીને ખેતરોમાં પાણી ઘૂસી જાય છે'
વિધાનસભાના અંતિમ દિવસે ગુજરાત વિધાનસભાના પૂર્વ અધ્યક્ષ અને ઇડરના ધારાસભ્ય રમણલાલ વોરાએ પોતાના વિધાનસભા ક્ષેત્રમાં જર્જરિત કેનાલોનો મુદ્દો ઉઠાવ્યો હતો. છેલ્લા કેટલાય સમયથી ઈડર પશ્ચિમ વિસ્તારમાં કેનાલોનું સાફ-સફાઈ તેમજ સમારકામ થતું નથી તેવા આક્ષેપો કર્યા હતા. ત્યારે તેમને કરેલા આક્ષેપો કેટલા સાચા છે તેને લઇ વીટીવી ન્યુઝે રિયાલિટી ચેક કર્યું હતું. જેમાં કેટલીક જમીની હકીકતો સામે આવી છે.
જાળવણીના અભાવે કેનાલમાં પાણી ન પહોંચતું હોવાનો આરોપ
સાબારકાંઠા જિલ્લાના ઇડર તાલુકાના ખેડૂતોને સિંચાઇ માટે પાણી મળી રહે તે માટે કરોડોના ખર્ચે કેનાલ તો બનાવવામાં આવી છે પણ જાળવણીના અભાવે કેનાલમાં પાણી ન પહોંચતું હોવાનો આરોપ લાગ્યો છે. વડાલી ઈડરના ધારાસભ્ય રમાલાલ વોરાએ વિધાનસભામાં પ્રશ્ન ઉઠાવ્યો હતો કે તેમના મત વિસ્તારમાં કેનાલોની સાફ-સફાઈ સમયસર થતી નથી. પાણી પુરવઠાના એન્જિનિયરથી લઈ સચિવ અને મંત્રીથી લઈને CM સુધી ધારાસભ્યે રજૂઆત કરી છે. જો કે આ અંગે ઇડરના ખેડૂતોએ ધારાસભ્યએ ઉઠાવેલા પ્રશ્નોને લાયક ગણાવ્યો હતો.
વીટીવી ન્યૂઝની ટીમે રિયાલિટી ચેક
વિધાનસભામાં કેનાલની સાફ સફાઇ અંગે સવાલ ઉઠતા વીટીવી ન્યૂઝની ટીમે રિયાલિટી ચેક કર્યું હતું. જેમાં ઇડરના પશ્ચિમ વિસ્તાર દેશોત્તર જશવંતગઢથી પસાર થતી કેનાલમાં ખૂબ મોટા પ્રમાણમાં ગંદકી તેમજ ઝાડી ઝાંખરા જોવા મળ્યા છે. અહીં કેનાલની વર્ષોથી સાફ-સફાઈ થતી નથી. જેને લઈને ખેડૂતોને વારંવાર મુશ્કેલીનો સામનો કરી રહ્યા છે. મુખ્ય કેનાલથી માઇનોર કેનાલમાં પણ વર્ષોથી સાફ-સફાઈ ન થતા સિંચાઇ માટે તરસવું પડે છે. રવિ સિઝનમાં પાણી છોડવામાં આવે છે ત્યારે ખેડૂતો ખુદ કેનાલની સાફ-સફાઈ કરે છે. ક્યારેક તો પાણીનો ફોર્સ વધુ હોવાથી પાળા તૂટીને ખેતરોમાં પાણી ઘૂસી જાય છે જેથી પાકને પણ નુકસાન જાય છે.
સાફ સફાઇ પાછળ કરોડો રૂપિયા ખર્ચે છે
મહત્વનું છે કે સરકાર દર વર્ષે કેનાલોની સાફ સફાઇ પાછળ કરોડો રૂપિયા ખર્ચે છે છતા છેવાડાના વિસ્તારમાં કેનાલોમાં સાફ સાફાઇના અભાવે ખેડૂતોને પારાવાર મુશ્કેલી થઇ રહી છે. એક તરફ ઈડર વિધાનસભામાં છેલ્લા 35 વર્ષથી ભાજપ શાસિત વિધાનસભા હોવાના છતા હવે સ્થાનિક ધારાસભ્યએ પાણીના મામલે ઊભા કરેલા પ્રશ્નોનાથી તંત્ર સામે પણ સવાલો ઊભા થયા છે.
