- વડોદરામાં પાર્કિંગની જગ્યાને લઈ પાલિકાની દેખાડા પુરતી કાર્યવાહી
- VTV NEWSની તપાસમાં હોસ્પિટલોને સીલ કરવાના તરકટનો ખુલાસો
- પાલિકાએ આયુષ્ય હોસ્પિટલનો માત્ર એક રૂમ કર્યો સીલ
વડોદરામાં પાર્કિંગની જગ્યાને લઈ પાલિકાની દેખાડા પુરતી કાર્યવાહી સામે આવી છે. વાત જાણે એમ છે કે, VTV NEWS ની તપાસમાં હોસ્પિટલોને સીલ કરવાના તરકટનો ખુલાસો થયો છે. વિગતો મુજબ પાર્કિંગની જગ્યાને લઇ વડોદરા કોર્પોરેશનની હોસ્પિટલ સામે કાર્યવાહી કરતાં 8 હોસ્પિટલો સીલ કરી હતી. જોકે અમારી ટીમે તપાસ કરતાં ખબર પડી હતી કે, પાલિકાએ આયુષ્ય હોસ્પિટલનો માત્ર એક રૂમ સીલ કર્યો છે.
વડોદરામાં પાર્કિંગની જગ્યાને લઈ મનપા દ્વારા હોસ્પિટલો સામે કાર્યવાહી કરવામાં આવી હતી. જે અનુસંધાને પાલિકાએ વડોદરાની વધુ 8 હોસ્પિટલ સીલ કરી હતી. આ સાથે 102 હોસ્પિટલોને નોટિસ આપ્યા બાદ કાર્યવાહી શરૂ કરી હતી. આ તરફ VTV NEWS ની તપાસમાં હોસ્પિટલોને સીલ કરવાના તરકટનો ખુલાસો થયો છે.
VTV NEWS ની તપાસમાં મોટો ખુલાસો
વડોદરા મ્યુનિશિપલ કોર્પોરેશને પાર્કિંગની જગ્યાને લઇ વડોદરા હોસ્પિટલો સામે કાર્યવાહી કરી હતી. જેમાં કોર્પોરેશને શહેરની વધુ 8 હોસ્પિટલ સીલ કરી હતી. જોકે VTV NEWS ખોડિયાર નગર વિસ્તારની આયુષ્ય હોસ્પિટલમાં પહોંચ્યું તો એક મોટો ખુલાસો થયો હતો. જેમાં મનપાના ટાઉન પ્લાનિંગ અધિકારીઓએ હોસ્પિટલનો ફક્ત 1 રૂમ સીલ કર્યો હોવાનું સામે આવ્યું છે. આ સાથે સંચાલકે પાર્કિંગના ભોંયરાનો રસ્તો બંધ કરી મેડિકલ સ્ટોર બનાવી દીધો હતો. મહત્વનું છે કે, પાલિકાના દાવાઓ વચ્ચે અધિકારીઓની કાર્યવાહી ફક્ત દેખાડા પુરતી હોવાનું સામે આવ્યું છે.
કઈ હોસ્પિટલને સીલ કરાઇ ?
- માતૃત્વ હોસ્પિટલ, નોવીનો તરસાલી રોડ
- પલાશ હોસ્પિટલ, નોવીનો તરસાલી રોડ
- ધ્રુવ હોસ્પિટલ, તરસાલી રોડ
- આયુષ્ય મલ્ટીસ્પેશ્યાલીટી હોસ્પિટલ, ખોડીયારનગર ચાર રસ્તા
- સ્પંદન હોસ્પિટલ, સિધંવાઈ માતા રોડ, માંજલપુર
- અઝીજ હોસ્પિટલ, ન્યુ હેવેન એસ્ક્લેવ, પાણીગેટ
- મંગલમ હોસ્પિટલ, ગોત્રી
- ગોપીનાથજી હોસ્પિટલ, ન્યૂ સમા
