- 25 વર્ષની દૂષ્કર્મ પીડિતાનો ગર્ભપાતનો કેસ
- સુપ્રીમ કોર્ટે ગુજરાત હાઇકોર્ટને લગાવી ફટકાર
- 'આવા કિસ્સાઓમાં એક એક દિવસ મહત્વપૂર્ણ હોય છે'
ગુજરાતમાં 25 વર્ષની દૂષ્કર્મ પીડિતાના 28 અઠવાડીયાના ગર્ભાવસ્થાના ગર્ભપાત અંગેના કેસમાં આજે એટલે કે 19 ઓગસ્ટના રોજ સુપ્રીમ કોર્ટમાં સુનાવણી હાથ ધરવામાં આવી હતી. શનિવારે રજા હોવા છતાં ન્યાયધીશ બી.વી. નાગરત્ન અને જસ્ટિસ ઉજ્જવલ ભુઈયાની સ્પેશિયલ બેંચે આ મામલે અર્જન્ટ સુનાવણી હાથ ધરી હતી.
આગામી સુનાવણી સોમવારે
ગુજરાત હાઈકોર્ટે 17 ઓગસ્ટના રોજ પીડિત મહિલાની ગર્ભપાતની અરજી ફગાવી દીધી હતી તેમજ આદેશની કોપી પણ આપી ન હતી. જે બાદ અરજદાર સુપ્રીમ કોર્ટેના દ્વારે પહોંચ્યા હતાં. 19 ઓગસ્ટે સુનાવણી દરમિયાન જસ્ટિસ નાગરત્ને ગુજરાત હાઈકોર્ટને ઠપકો આપતા કહ્યું હતું કે, આવા કિસ્સાઓમાં એક એક દિવસ મહત્વપૂર્ણ હોય છે છતાં પણ સુનાવણીની તારીખ કેમ મોકૂફ રાખવામાં આવી?. 11 ઓગસ્ટના રોજ ગુજરાત હાઇકોર્ટે કેસની તાત્કાલિક સુનાવણી ન કરતાં 12 દિવસ પછી આગામી તારીખ આપી હતી. સુપ્રીમ કોર્ટમાં આ કેસની આગામી સુનાવણી સોમવારને 21 ઓગસ્ટ રોજ થશે.
'અફસોસ છે કે અમારે આવી ટિપ્પણી કરવી પડી રહી છે'
ગુજરાત સરકારના વકીલ સ્વાતિ ઘિલ્ડિયાલને કોર્ટ દ્વારા સીધો સવાલ પૂછવામાં આવ્યો હતો કે, આટલા સંવેદનશીલ મામલામાં એટલા દિવસ કેવી રીતે ખરાબ થયા, અમને અફસોસ છે કે અમારે આવી ટિપ્પણી કરવી પડી રહી છે. પીડિતાના વકીલે કહ્યું કે, તે પ્રેગ્નન્સીના 25મા અઠવાડિયામાં કોર્ટમાં ગઈ હતી પરંતુ દિવસો એક પછી એક વીતતા ગયા છે. 28મી સપ્તાહ સોમવાર પછી શરૂ થવાની છે. કોર્ટે કહ્યું કે, દરેક દિવસ કિંમતી છે. 11 ઓગસ્ટે જ રિપોર્ટ આવી ગયો હતો પરંતુ કોઈએ ધ્યાન આપ્યું નહી. 17 ઓગસ્ટે કોઈપણ કારણ આપ્યા વગર અરજી ફગાવી દેવામાં આવી હતી. ઓર્ડર હજુ અપલોડ કરવામાં આવ્યો નથી.
