કાર્યવાહી / ગરીબોનો કોળિયો નહીં છીનવાય, ગુજરાતમાં સરકારી અનાજ કૌભાંડ રોકવા SIT એક્શનમાં, 1 લાખ રેશનકાર્ડ રદ

• કૌભાંડને ડામવા માટે SIT એકશનમાં
• 2020થી અત્યાર સુધીના કેસો રિઓપન કરાયા
• તમામ SP અને કલેક્ટરને SoP મોકલી

ગરીબોના હકનો કોળિયો ઝૂંટનારા કૌભાંડીઓ પર સરકારે તવાઇ બોલાવી છે. સરકારી અનાજના વિતરણમાં કૌભાંડ રોકવા SIT હરકતમાં આવી છે અને 1 લાખ નકલી રેશનકાર્ડ રદ કરવામાં આવ્યા છે. તમને જણાવી દઈએ કે, વર્ષ 2020થી અત્યાર સુધી થયેલા કેસોને રિઓપન કરાયા છે.  

ચોરી રોકવા હવે SIT કરશે રેડ
 SIT હરકતમાં આવી છે અને કાર્યવાહીનો ધમધમાટ ચલાવી રહી છે. સરકારી અનાજ સગેવગે કરવાના થયેલા 83 કેસ રિ-ઓપન કરાયા છે. તમામ જિલ્લાના SP અને કલેકટરને SITએ ગુનાની તપાસ કરવા માટે SoP મોકલી છે તેમજ સરકારી અનાજમાં થતી ચોરી રોકવા SIT રેડ પણ કરશે. જે વિસ્તારમાં SIT રેડ કરશે તે વિસ્તારના જવાબદાર અધિકારી સામે પણ કાર્યવાહી કરાશે. અત્રે તમને જણાવીએ કે, સરકારી અનાજની ચોરી કરનાર સામે PBM હેઠળ કાર્યવાહી કરવામાં આવી છે.

સંડોવણી હશે તો સરકારી અધિકારીઓ સામે પણ કાર્યવાહી
પ્રિવેંશન ઓફ બ્લેક માર્કેટિંગ અંતર્ગત પાસા જેવી કાર્યવાહી થઈ શકે છે  તેમજ સરકારી અધિકારીઓની સંડોવણી હશે તો તેની સામે પણ કડક કાર્યવાહી કરાશે તેવી પણ વિગતો છે. એસઆઈટી હરકતમાં આવતા કૌભાંડીઓ અધિકારીઓમાં પણ ડરનો માહોલ છવાયો છે. તમને જણાવી દઈએ કે, અત્યાર સુધી કૌભાંડ મામલે કાર્યવાહીના ફક્ત આદેશ કરાતા હતાં પરંતુ અત્યારે કડક કાર્યવાહી કરાશે જેથી ગરીબોના હકનો અનાજ તેમને મળશે.