- ભારતીય ક્રિકેટ ટીમ હાલ વેસ્ટ ઈન્ડિઝના પ્રવાસે
- મુકેશને બીજી મેચમાં શાર્દુલ ઠાકુરની જગ્યાએ ટીમમાં પસંદ કરાયો
- મુકેશે ટેસ્ટ મેચના પહેલા દિવસ પછી તેની માતા સાથે વાત કરી
- BCCIએ પોતાના ટ્વિટર પર વીડિયો પોસ્ટ કર્યો
ભારતીય ક્રિકેટ ટીમ હાલ વેસ્ટ ઈન્ડિઝના પ્રવાસે છે. આ પ્રવાસ પર ટીમ તેની બીજી ટેસ્ટ મેચ રમી રહી છે. પોર્ટ ઓફ સ્પેનમાં રમાઈ રહેલી આ મેચમાં ફાસ્ટ બોલર મુકેશ કુમારનું સપનું સાકાર થયું છે. વાત જાણે એમ છે કે, મુકેશને બીજી મેચમાં શાર્દુલ ઠાકુરની જગ્યાએ ટીમમાં પસંદ કરવામાં આવ્યો છે. મુકેશ લાંબા સમયથી ટીમ સાથે છે. ક્યારેક તે નેટ બોલર તરીકે તો ક્યારેક રિઝર્વ પ્લેયર તરીકે ટીમ સાથે રહેતો હતો.
મુકેશે ટેસ્ટ મેચના પહેલા દિવસ પછી તેની માતા સાથે વાત કરી હતી. તેનો વીડિયો BCCIએ પોતાના ટ્વિટર પર પોસ્ટ કર્યો છે. મુકેશે ફોન પર તેની માતાને તેના ડેબ્યુ વિશે માહિતી આપી હતી. મુકેશ ભારતના 308માં ટેસ્ટ ક્રિકેટર છે.
BCCIએ શેર કર્યો વિડીયો
BCCI દ્વારા શેર કરવામાં આવેલા વીડિયોમાં મુકેશ પહેલા તેની ટેસ્ટ કેપ ઉઠાવે છે અને કહે છે કે અશ્વિને તેને આ કેપ આપી હતી. આ પછી તેણે તેની માતાને ફોન કર્યો અને ભોજપુરીમાં વાત કરી. તેની માતા સાથે વાત કરતી વખતે મુકેશ તેમને કહેતો હતો કે, તેમણે કરેલી પૂજાનું ફળ મળ્યું છે. આ વાતચીત ભોજપુરીમાં થઈ રહી હતી. બાદમાં મુકેશે જણાવ્યું કે, તેની માતા તેને હંમેશા ખુશ રહેવા અને આગળ વધવાનું કહેતી હતી.
શું કહ્યું ફાસ્ટ બોલર મુકેશ કુમારે ?
ફાસ્ટ બોલર મુકેશે જણાવ્યું કે, તેમની માતાએ તેને કહ્યું કે તેના આશીર્વાદ હંમેશા તેની સાથે છે. મુકેશે કહ્યું કે, તેની માતા માત્ર ઇચ્છે છે કે, તે આગળ વધે અને સફળ થાય. મુકેશે કહ્યું કે, આ તેના માટે ખૂબ જ મહત્વપૂર્ણ ક્ષણ છે, જેની ખુશી તે વ્યક્ત કરી શકતો નથી. તેણે કહ્યું કે, તે તેની માતાનું હૃદય છે. આ વાતો કરતી વખતે મુકેશ ભાવુક થઈ ગયો અને કહ્યું કે તેના હાથ ધ્રૂજી રહ્યા છે. તેની વાત સાંભળીને સ્પષ્ટપણે ખબર પડી કે તે એટલા ભાવુક થઈ ગયા છે કે તેનું ગળું ભરાઈ ગયું છે. જે પણ આ વીડિયો જોશે તે પણ થોડા સમય માટે ભાવુક થઈ જશે.
નોંધનીય છે કે, બીજી ટેસ્ટ મેચમાં બે દિવસની રમત પૂરી થયા બાદ ભારતીય ટીમ મજબૂત દેખાઈ રહી છે. પ્રથમ બેટિંગ કરતા ટીમ ઈન્ડિયાએ વિરાટ કોહલીની શાનદાર સદીના આધારે પ્રથમ દાવમાં 438 રન બનાવ્યા હતા. વિરાટે પ્રથમ દાવમાં 206 બોલનો સામનો કરીને 121 રન બનાવ્યા હતા. કોહલીની આ 500મી આંતરરાષ્ટ્રીય મેચ છે અને તેણે તેમાં સદી ફટકારી છે. આ તેની 76મી આંતરરાષ્ટ્રીય સદી હતી.
