ઉજવણી / ચીફ ઓફિસરની બદલીથી પારડી ન.પા.માં ઉત્સાહનો માહોલ, વિપક્ષોએ કર્યું ફટાકડાં ફોડી સેલિબ્રેશન

 

• પારડી ન.પાના ચીફ ઓફિસરની બદલી
• વિપક્ષે ફટાકડા ફોડીને ઉજવણી કરી
• શાસક પક્ષ પણ ચીફ ઓફિસરથી હતો નારાજ

24 હજારના ભજીયાકાંડ મામલે પારડી નગરપાલિકાના ચીફ ઓફિસર પ્રાચી દોશીની બદલી કરવામાં આવી છે. ચીફ ઓફિસરની બદલી થતાં પારડી નગરપાલિકામાં ઉત્સાહનો માહોલ જોવા મળી રહ્યો છે. ચીફ ઓફિસરની બદલી થતાં આજે વિપક્ષે ફટાકડા ફોડીને ખુશી વ્યક્ત કરી હતી. આ ઉજવણીમાં શાસક પક્ષ ભાજપના સભ્યો પણ ઉપસ્થિત રહ્યા હતા.

વિકાસના કામમાં લગાવીને રાખી હતી બ્રેકઃ બિપિન પટેલ
ચીફ ઓફિસરની બદલી પર કોંગ્રેસના બિપિન પટેલે જણાવ્યું હતું કે, ચીફ ઓફિસરની બદલી થતાં આજરોજ અમે તમામ ચૂંટાયેલા માજી સભ્યો પારડી નગરપાલિકા ખાતે ભેગા થયા છીએ. તેમની બદલીની ખૂશીમાં આજે અમે ઉજવણી કરી છે. કારણ કે પારડી નગરપાલિકાના ચીફ ઓફિસરે વિકાસના કામમાં બ્રેક લગાવીને રાખી હતી. વિકાસના કામોમાં અડચણો ઉભી કરનારા ચીફ ઓફિસરના લીધે લગભગ 25 કરોડ રૂપિયાની ગ્રાન્ટ અમારી પાસે બચી ગઈ છે, જે અમારા માટે દુઃખની વાત છે.  હું સરકારને વિનંતી કરીશ કે આવા ચીફ ઓફિસરની બદલીને બદલે હંમેશા માટે ઘરે બેસાડી દેવા જોઈએ. કારણ કે આવા ચીફ ઓફિસરની કોઈ જગ્યાએ જરૂર નથી. 

શાસક પક્ષ પણ હતો નારાજ
એવું કહેવામાં આવી રહ્યું છે કે, વિપક્ષ સહિત શાસક પક્ષ પણ ચીફ ઓફિસર પ્રાચી દોશીથી નારાજ હતો. પારડી નગરપાલિકાના ચીફ ઓફિસર તેમના મનસ્વી નિર્ણયોના કારણે હંમેશા વિવાદમાં રહેતા હતા. ચીફ ઓફિસર નગરપાલિકાના લોકાર્પણના કાર્યક્રમમાં લાખોનો ખર્ચ બતાવીને વિવાદમાં આવ્યા હતા. આ અંગેનો અહેવાલ VTV ન્યૂઝ દ્વારા પ્રકાશિત કરવામાં આવ્યો હતો. 

લોકાર્પણ પાછળ 13 લાખથી વધુનો ખર્ચ 
વલસાડના પારડી નગરપાલિકામાં ભ્રષ્ટાચારના આરોપ લગાવવામાં આવ્યા હતા. ભાજપશાસિત નગરપાલિકામાં ભાજપના જ નગરસેવકો મેદાનમાં ઉતર્યા હતા. 13 કરોડના ખર્ચે બનેલ નગરપાલિકાના લોકાર્પણ પાછળ 13 લાખથી વધુનો ખર્ચ થતાં વિવાદ થયો હતો. ભાજપશાસિત નગરપાલિકામાં લોકાર્પણ સમયે થયેલા ખર્ચમાં ભ્રષ્ટાચારનો આક્ષેપ લગાવવામાં આવ્યો હતો.

24 હજારના ભજીયાનું મૂકાયું હતું બીલ
જેમાં 24 હજારના ભજીયાનું બીલ અને 11 હજારનું આઈસ્ક્રીમનું બીલ મૂકાયું હતું. તો વીડિયો શૂટિગ પાછળ પણ લાખ રૂપિયાથી વધારેનો ખર્ચ કરવામાં આવ્યો હોવાનું બિલ મુકાયું હતું. ભાજપ સહિત કોંગ્રેસના નગરસેવકો દ્વારા ભ્રષ્ટાચારના આક્ષેપ સાથે વિરોધ કરવામાં આવ્યો હતો.