VTV / ગુજરાત / અમદાવાદ / અન્ય જિલ્લા / The man who threatened to blow up the Modi Stadium in Ahmedabad during the World Cup was caught from Rajkot
India-Pakistan Match / વર્લ્ડકપની વચ્ચે અમદાવાદના મોદી સ્ટેડિયમને ઉડાવી દેવાની ધમકી આપનાર રાજકોટથી ઝડપાયો, બીજી તરફ ગૃહરાજ્યમંત્રીએ સુરક્ષાની કરી સમીક્ષા
સુરક્ષા ને લઈને ગૃહમંત્રી હર્ષ સંઘવી સ્ટેડિયમની કરશે સમીક્ષા
નરેન્દ્ર મોદી સ્ટેડિયમની હર્ષ સંઘવી કરશે સમીક્ષા
India-Pakistan Match 2023: ક્રિકેટ વર્લ્ડ કપ 5 ઓક્ટોબર શરૂ થઈ ગયો છે. ભારત આ વખતે વર્લ્ડ કપની યજમાની કરી રહ્યું છે. આવી સ્થિતિમાં ભારત સહિત સમગ્ર વિશ્વના લોકો માટે 14 ઓક્ટોબર ખૂબ જ મહત્વપૂર્ણ છે. આ દિવસે અમદાવાદમાં ભારત અને પાકિસ્તાન વચ્ચે મેચ રમાવાની છે. ભારત પાકિસ્તાન મેચના ચાહકો આ દિવસની આતુરતાથી રાહ જોઈ રહ્યા છે. હોટેલ બુકિંગથી લઈને ટ્રેન અને ફ્લાઈટ ટિકિટનું બુકિંગ અગાઉથી થઈ ગયું છે. એવામાં અમદાવાદના નરેન્દ્ર મોદી સ્ટેડિયમને ઉડાવી દેવાની ધમકી આપનારને રાજકોટથી ઝડપી પાડવામાં આવ્યો છે.
રાજકોટથી ઝડપાયો આરોપી
અમદાવાદમાં કુલ પાંચ વર્લ્ડ કપ મેચ રમાવાની છે. જેમાં 14 ઓક્ટોબરે ભારત પાકિસ્તાન વચ્ચે જ્યારે મેચ રમાવાની છે. જોકે આ મેચ પહેલા નરેન્દ્ર મોદી સ્ટેડિયમને ઉડાવી દેવાની ધમકી મળી હતી. નરેન્દ્ર મોદી સ્ટેડિયમને ઉડાવી દેવાની ધમકી મળતા પોલીસની ટીમો દોડતી થઈ હતી. પોલીસ અને ક્રાઈમ બ્રાન્ચ સહિત સુરક્ષા એજન્સીઓ દ્વારા આ મામલે તપાસ હાથ ધરવામાં આવી હતી. ત્યારે હવે મૂળ મધ્યપ્રદેશના વીડિયો બ્લોગર કરણ માળી નામના યુવકને રાજકોટથી ક્રાઈમ બ્રાન્ચે ઝડપી પાડ્યો છે.
નરેન્દ્ર મોદી સ્ટેડિયમને ઉડાવવાની આપી હતી ધમકી
આરોપી કરણ માળીએ 14 ઓક્ટોબરે નરેન્દ્ર મોદી સ્ટેડિયમમાં યોજાનાર ભારત-પાકિસ્તાન મેચને લઈને ધમકી આપી હતી. ક્રાઈમ બ્રાન્ચની પ્રાથમિક તપાસમાં સામે આવ્યું છે કે, કરણે માત્ર મજા લેવા નરેન્દ્ર મોદી સ્ટેડિયમને ઉડાવી દેવાની ધમકી આપી હતી. રૂપિયા 500 કરોડની માંગણી કરતો ઈ-મેઈલ પણ આ યુવકે કર્યો હોવાની શંકા છે. હાલ કરણ માળીની ક્રાઈમ બ્રાન્ચ દ્વારા વધુ પૂછપરછ કરવામાં આવી રહી છે. ક્રાઈમ બ્રાન્ચ દ્વારા આ મામલે વિગતવાર માહિતી આપવામાં આવશે.
નરેન્દ્ર મોદી સ્ટેડિયમની સુરક્ષાનું હર્ષ સંઘવીએ કર્યું નિરીક્ષણ
આગામી શનિવારે અમદાવાદમાં રમાનારી ભારત-પાકિસ્તાન મેચને લઈને સુરક્ષાના મુદ્દે ગૃહ રાજ્યમંત્રી હર્ષ સંઘવીએ સમીક્ષા કરી. હર્ષ સંઘવી દ્વારા નરેન્દ્ર મોદી સ્ટેડિયમની સમીક્ષા કરવામાં આવી છે. હર્ષ સંઘવીની સાથે પોલીસના ઉચ્ચ અધિકારીઓએ પણ સુરક્ષાના મુદ્દે સમીક્ષા કરી. જે બાદ સુરક્ષાને લઈને પોલીસના ઉચ્ચ અધિકારીઓ સાથે ગૃહ રાજ્યમંત્રીએ બેઠક યોજી છે. આ બેઠકમાં રાજ્ય પોલીસ વડા વિકાસ સહાય, અમદાવાદ પોલીસ કમિશનર જી.એસ મલેક સહિતના ઉચ્ચ અધિકારીઓ હાજર છે. આપને જણાવી દઈએ કે, 14મી ઓક્ટોબરે અમદાવાદમાં ઉચ્ચ પોલીસ અધિકારીઓ સહિત 7 હજારથી વધુ પોલીસ જવાનનો તૈનાત રહેશે.
