કાર્યવાહી / પ્રેમીએ પ્રેમિકાને કર્યો ફોન, પણ ઉપાડ્યો જીજાજીએ... પછી થઈ એવી બબાલ કે ખેલાયો ખૂની ખેલ... તાપીમાં લવ અને મર્ડરની ઘટના

• સાળીના `ચક્કર'માં હત્યા 
• સાળીનો ફોન ઉપાડ્યો અને થઈ બબાલ
• પ્રેમીએ ફોન પર કરી ગાળાગાળી 
• સમજાવવા ગયેલા રવિન્દ્રની કરી હત્યા 

 તાપી જિલ્લાના છેવાડે આવેલ એક ગામ માં હત્યાની ઘટના પ્રકાશમાં આવી છે, પ્રેમ પ્રકરણમાં હત્યા થઈ હોવાનું પોલીસ તપાસમાં બહાર આવ્યું છે, પોલીસે હત્યાના ગુનામાં સામેલ તમામ હત્યારાઓની ધરપકડ કરી તપાસ હાથ ધરી છે.

પોલીસે આરોપીઓને ઝડપી કાયદેસરની કાર્યવાહી હાથ ધરી
મહારાષ્ટ્ર અને ગુજરાત રાજ્યની હદને અડીને આવેલા નિઝર તાલુકાના અતુરલી ગામે ઘટના બની હતી. જેમાં સાગર પાડવીની સાળીના પ્રેમમાં સમજાવટ માટે ગયેલા રવિન્દ્ર પાડવીને પ્રેમી ધીરજ પાડવી તેના મળતીયા જયરાજ પાડવી, દિલીપ પડાવી અને અરુણ પાડવી નામના ઈસમોએ એકજુથ થઈને બન્ને ભાઈઓને માર માર્યો હતો.  જેમાં રવિન્દ્ર પાડવીને ગંભીર ઇજાઓ થતા તેનું મોત નીપજ્યું હતું.  જે અંગે નિઝર પોલીસ મથકે ફરિયાદ થતા પોલીસે તમામ ચારે આરોપીઓને ઝડપી વીવિધ કાયદાકીય કલમો હેઠળ ગુનો નોંધી તપાસ હાથ ધરી છે.

પોલીસે ગણતરીનાં કલાકોમાં હત્યાનો ભેદ ઉકેલ્યો
હાલ તો તાપી પોલીસે ગણતરીના કલાકોમાં હત્યાનો ભેદ ઉકેલી નાખી તમામ આરોપીને જેલના સળિયા પાછળ ધકેલી દીધા છે પરંતુ પ્રેમ પ્રકરણને લઈને કરવામાં આવેલ હત્યાને કારણે આજે એક જુવાન જોધ દીકરાએ પોતાનો જીવ ગુમાવવાનો વારો આવ્યો છે ત્યારે સમાજમાં સામાન્ય ઝઘડાને લઈને હત્યા સુધી પહોંચી જતા મામલો એ સમાજ માટે લાલબત્તી સમાન છે.