Rajkot News: રાજકોટમાં આરોપીને જાહેરમાં પરેડ કરાવવા અને તેને કસ્ટડીમાં મારવાના કેસમાં ગુજરાત હાઈકોર્ટે પાંચ પોલીસ કર્મીઓ વિરુદ્ધ કન્ટેમ્પ્ટ ચાર્જ ફ્રેમ કર્યા. હાઈકોર્ટે કહ્યું કે, આરોપી સામે કાયદાની વિરુદ્ધ જઈ કાર્યવાહી ન કરી શકાય.
Share
રાજકોટમાં આરોપીને માર મારી સરઘસ કાઢવાનો મામલો
ગુજરાત હાઈકોર્ટે 5 પોલીસકર્મી વિરુદ્ધ કન્ટેમ્પ્ટ ચાર્જ ફ્રેમ કર્યા
આ સ્ટેજ પર પોલીસકર્મીઓની બિનશરતી માફી સ્વીકારી શકાય નહીં: HC
ગુજરાત હાઈકોર્ટે રાજકોટના 5 પોલીસકર્મી વિરુદ્ધ કન્ટેમ્પ્ટ ચાર્જ ફ્રેમ કર્યા છે. વર્ષ 2016માં આરોપીને માર મારી સરઘસ કાઢવા મામેલ 5 પોલીસકર્મીઓ સામે એક્શન લેવામાં આવ્યું છે. આ મામલે હાઈકોર્ટમાં 13 જુલાઈના રોજ વધુ સુનાવણી હાથ ધરાશે.
ફાઈલ ફોટો
પોલીસની દલીલ પર કોર્ટની ટિપ્પણી
આરોપીને જાહેરમાં પરેડ કરાવવા અને તેને કસ્ટડીમાં મારવાના કેસમાં ગુજરાત હાઈકોર્ટમાં સુનાવણી યોજાઈ હતી. સુનાવણી દરમિયાન પોલીસકર્મી વતી હાજર રહેલા વકીલે દલીલ કરી હતા કે આરોપી પર ગંભીર ગુનાઓ છે. જેના પર હાઈકોર્ટે ટિપ્પણી કરી હતી કે આરોપી સામે કાયદાની વિરુદ્ધ જઈ કાર્યવાહી કરી શકાય નહીં.
5 પોલીસકર્મી વિરુદ્ધ કન્ટેમ્પ્ટ ચાર્જ ફ્રેમ
હાઈકોર્ટે જણાવ્યું હતું કે, આ સ્ટેજ પર પોલીસકર્મીઓની બિનશરતી માફી સ્વીકારી શકાય નહીં. જે બાદ હાઈકોર્ટે બી.ટી. ગોહિલ, એમ.જે ધાંધલ, વી.એસ લાંબા, જયભા પરમાર અને પ્રદ્યુમનસિંહ ઝાલા વિરુદ્ધ ચાર્જ ફ્રેમ કર્યો છે.
ફાઈલ ફોટો
શું છે સમગ્ર મામલો?
રાજકોટના પાંચ પોલીસ કર્મચારીઓ બી.ટી. ગોહિલ, એમ.જે. ધાંધલ, વી.એસ.લાંબા, જયભા પરમાર, પ્રદ્યુમનસિંહ ઝાલા પર આરોપ છે કે તેમણે વર્ષ 2016માં આરોપી અજય કુંભારવાડીયાને જાહેરમાં પરેડ કરાવી હતી અને માર માર્યો હતો.
આરોપીએ દાખલ કરી હતી અરજી
જે બાદ આરોપીએ પાંચેય પોલીસ કર્મચારીઓ સામે હાઈકોર્ટમાં કન્ટેમ્પ્ટની અરજી દાખલ કરી હતી. હાઈકોર્ટમાં આ કેસમાં સમયાંતરે મુદતો પડતી રહી હતી અને કન્ટેમ્પ્ટની અરજી ચલાવવાના હાઈકોર્ટના નિર્ણય સામે પોલીસ કર્મીઓએ સુપ્રીમ કોર્ટમાં પણ અરજીઓ કરી હતી. બીજી તરફ અગાઉ પોલીસકર્મીઓ અને રાજ્ય સરકારે આ કન્ટેમ્પ્ટની અરજી ટકવાપાત્ર નથી તેવો દાવો કર્યો હતો. જેને હાઈકોર્ટે નકાર્યો હતો. આપને જણાવી દઈએ કે, ગુનાખોરીના રવાડે ચડેલા અજય રાયધન કુંભારવાડીયા સામે અનેક કેસ નોંધાયેલા છે. જે હાલ છોટાઉદેપુરની જેલમાં બંધ છે.
