ગોટાળાનો આક્ષેપ / પોલીસ પર તોડકાંડના ગંભીર સવાલો ઉઠાવનારા રાજકોટના ધારાસભ્ય સામે જ આ મામલે મોટો આરોપ

• રાજકોટના ધારાસભ્ય ગોવિંદ પટેલ આક્ષેપના 'સાણસા'માં 
• પોલીસ તોડ્કાંડમાં વાજ ઉઠાવનાર ધારાસભ્ય સામે આરોપ 
• વગથી જમીન બિન ખેતી કરાવી, ધારાસભ્યનો ઝાટકીને નનૈયો 

છેલ્લા એકાદ મહિનાથી રાજકોટ અને ગાંધીનગરમાં પોલીસ તોડકાંડ મુદ્દે અવાજ ઉઠાવનાર ધારાસભ્ય ગોવિંદ પટેલની ચર્ચા છે. રાજકોટ પોલીસ તોડ્કાંડમાં રાજ્ય સભા સાંસદ સાથે જ અવાજ ઉઠાવનાર રાજ્ય સરકારના પૂર્વ મંત્રીએ પોલીસ સેવાના અધિકારીઓ તોડ કરતા હોવાના આક્ષેપ લગાવી ચર્ચામાં આવ્યા હતા. પણ આજે એક પરિવાર એવો સામે આવ્યો છે જેમણે, આ ઘારાસભ્ય ગોવિંદ પટેલ પર જ આરોપ મઢી દીધો છે. આરોપ એવો છે કે, ધારાસભ્ય પટેલે પોતાની વગનો ઉપયોગ કરી જમીન બિન ખેતી કરાવી લીધી,અને વિવાદિત જમીન પર બાંધકામ પ્રક્રિયા પણ શરુ કરાવી ધીધી હતી.   

આજદિન સુધી પોલીસ ડિપાર્ટમેન્ટના અધિકારીઓ પર ગંભીર સવાલો ઉઠાવી પોતાની પાર્ટીની જ  સરકારને અવઢવમાં મુકી દેનારા રાજકોટના MLA ગોવિંદ પટેલ હવે ખુદ પ્રશ્નોના દાયરામાં આવી ગયા છે. તેમની ઉપર વિવાદીત જમીન કબ્જે કરી હોવાનો આક્ષેપ લાગ્યો છે. ગોવિંદ પટેલ પર વિવાદીત જમીન પર પોતાની વગ વાપરી બિન ખેતી કરાવી હોવાનો આક્ષેપ લાગ્યો છે. જેમા તેમને તત્કાલિન જિલ્લા કલેક્ટર રાહુલ ગુપ્તાની સહાયથી વિવાદીત જમીન એન.એ. કરાવી હોવાનો આરોપ છે.  આક્ષેપ મુજબ ભાઈ - બહેન વચ્ચે જમીનનો વિવાદ ચાલતો હતો જેથી કોર્ટ મેટર હોવા થતાં આ જમીન બીન ખેતી કરી દેવામાં આવી છે. હાલમાં તે વિવાદીત જમીન ઉપર બાંધકામની પ્રક્રિયા શરૂ કરી દીધી હોવાથી ફરિયાદીએ બાંધકામની કામગીરી બંધ કરાવવા માગ કરી છે. આ સમગ્ર મામલે ભાજપ નેતા ગોવિંદ પટેલે આક્ષેપોને ફગાવ્યા છે.