આંતરિક ડખો / ગુજરાતના આ સાંસદ, ભાજપે સસ્પેન્ડ કરેલા કાર્યકરો સાથે દિલ્લી પહોંચ્યા, પક્ષ વિરોધી પ્રવૃત્તિને અવગણી?

• સાબરકાંઠા જિલ્લા ભાજપમાં વિખવાદ 
• જિલ્લા ભાજપ પ્રમુખે સસ્પેન્ડ કરેલા કાર્યકરો સાંસદ સાથે દિલ્લી પહોંચ્યા
• પક્ષ વિરોધી પ્રવૃત્તિ કરવા બદલ કરાયા હતા સસ્પેન્ડ

વડોદરા બાદ હવે સાબરકાંઠા જિલ્લાનું રાજકારણ ચર્ચાની એરણ પર આવ્યું છે. સાબરકાંઠા જિલ્લા ભાજપમાં ભડકો થયો હોવાની વાત સ્પ્રીંગની માફક ઉછાળા સાથે બહાર આવતા ખળભળાટ મચી ગયો છે. જેમાં જિલ્લા ભાજપ પ્રમુખ દ્વારા પક્ષ વિરોધી પ્રવૃત્તિ કરવાના આરોપસર સહકારી નેતા સતિષ પટેલને સસ્પેન્ડ કરાયા હતા. જે આજે કાર્યકરો સાથે દિલ્હી પહોંચ્યા હતાં.

કાર્યકરોને 6 વર્ષ માટે પક્ષમાંથી કર્યા હતા સસ્પેન્ડ

આ અંગેની વિગત એવી છે કે સાબરકાંઠા બેંકની ચૂંટણી યોજાઈ હતી. જે દરમિયાન ભાજપનું મેન્ડેડ ન મળતા ભાજપના સતિષ પટેલ અપક્ષમાંથી ચૂંટણી લડ્યા હતા. આ સમગ્ર ઘટનાને ધ્યાને જિલ્લા ભાજપના આગેવાનો ચોંકી ઉઠ્યા હતા. બાદમાં તેમની સામે શિક્ષાત્મક પગલાં લઈને ભાજપે પક્ષ વિરોધી પ્રવૃત્તિ બદલ તેઓને 6 વર્ષ માટે પક્ષમાંથી સસ્પેન્ડ કરી દીધા હતા. જોકે સસ્પેન્ડ કરેલા કાર્યકરોને સાબરકાંઠા સાંસદ દિપસિંહ રાઠોડ દિલ્લી લઈ ગયા હોવાની વાત બહાર આવી છે.

સાબરકાંઠા સાંસદ દિપસિંહ રાઠોડ સસ્પેન્ડેડ કાર્યકરોને દિલ્લી લઈ ગયા

સસ્પેન્ડ કરાયેલા કાર્યકરો સાંસદ સાથે દિલ્લી પહોંચતા મામલો ગરમાયો હતો. બીજી બાજુ સાબરકાંઠા જિલ્લા ભાજપ પ્રમુખ જે.ડી.પટેલની સામે જૂથવાદ હોવાની પણ ચર્ચાએ જોર પકડ્યું છે. નોંધનીય છે કે તાજેતરમાં જ વડોદરામાં નનામી પત્રિકા પ્રકરણને લઈને રાજકારણ ગરમાયું છે. વડોદરાના મેયર નિલેશ રાઠોડને બદનામ કરતી પત્રિકા વાયરલ કરવા મામલે કોર્પોરેશનના પૂર્વ શાસક નેતા અને કોર્પોરેટર અલ્પેશ લીંબાચીયાની ક્રાઇમ બ્રાન્ચ દ્વારા ધરપકડ કરવામાં આવી હતી. જોકે કોર્પોરેટર અલ્પેશ લીંબાચીયા મામલે વડોદરા પોલીસે મૌન સેવ્યું હતું. સૂત્રોના જણાવ્યા અનુસાર, વડોદરામાં ભાજપ વર્સીસ ભાજપની લડાઈમાં પોલીસ પર રાજકીય દબાણ આપવામાં આવી રહ્યું છે. રાજકીય દબાણના કારણે વડોદરા પોલીસની સુડી વચ્ચે સોપારી જેવી હાલત વચ્ચે હવે સાબરકાંઠાનું રાજકારણ ચર્ચામાં આવ્યું છે.