વેદના / VIDEO: અમને મારી નાંખવા છે, નામ આપીશું તો...: શા કારણે રડી રહી છે રાજકોટની મહિલાઓ?

• માધાપર આવેલ મનહરપુર 1 માં અસામાજિક તત્વોનો આતંક
• રાત્રે 6 થી 7 લોકો પથ્થર અને સોડા બોટલ કર્યા ઘા 
• અસામાજિક તત્વોને કારણે મહિલાઓ અને બાળકોમાં ભયનો માહોલ

રાજકોટમાં અસામાજીક તત્વોનો આતંક દિવસે દિવસે વધતો જઇ રહ્યો છે. એક પછી એક ક્રાઇમની અનેક ઘટનાઓ સામે આવી રહી છે. ત્યારે આવી વધુ એક ઘટના સામે આવી છે. શહેરના માધાપર વિસ્તારમાં આવેલા મનહરપુર 1માં અસામાજિક તત્વોએ લોકોના ઘરો પર પથ્થરમારો અને સોડાની બોટલોના ઘા કર્યા હતા. જેના પગલે સ્થાનિકોમાં ભયનો માહોલ જોવા મળી રહ્યો છે. 

થોડા દિવસ અગાઉ નોંધાવી હતી પોલીસ ફરિયાદ
મળતી માહિતી અનુસાર, રાજકોટના મનહરપુરમાં 1માં ગતમોડી રાત્રે 6થી 7 અસમાજિક તત્વોએ પથ્થર અને સોડાની બોટલોના ઘા કર્યા હતા. જેને પગલે મહિલાઓ અને સ્થાનિકો એકઠા થયા હતા. અસામાજિક તત્વોને કારણે મહિલાઓ અને બાળકોમાં ભયનો માહોલ જોવા મળ્યો હતો. મહત્વનું છે કે થોડા દિવસ અગાઉ સ્થાનિક લોકોએ અસમાજિક તત્વો વિરુદ્ધ ફરિયાદ નોંધાવી હતી. 

મહિલાઓની આંખોમાં આવી ગયા આંસુ
આ અંગે વેદના રજૂ કરતા મહિલાઓના આંખોમાં આંસુ આવી ગયા હતા. સ્થાનિક મહિલાએ આ મામલે જણાવ્યું કે, 'અમારા ઘરે આવીને અવારનવાર આવી રીતે ઘા કરી જાય છે. અમને મારી નાખવાની ધમકી આપે છે. બે મહિનાથી ઘરના બહાર જઈ નથી શકતા.' 

પોલીસ કડક કાર્યવાહી કરે એવી સ્થાનિકોની માંગ
તેમણે જણાવ્યું કે, 'અમને મારી જ નાખવા છે. 'તમારાથી થાય એ કરી લો, જામનગર સુધી અમારા છેડા અડે છે' આવી અમને ધમકી આપે છે. અમે એમના નામ નહીં આપી, નામ આપશું તો અમે મુશ્કેલીમાં મુકાશું. તમે તમારી રીતે તપાસ કરીને આમને પકડો.' હાલ પોલીસ આ અસમાજિક તત્વો વિરુદ્ધ કડક કાર્યવાહી કરે એવી સ્થાનિકોની માંગ છે.