અવળચંડાઈ / આવી અવળચંડાઇ.! સુરત BRTS રોડ છે કે વોકિંગ-વે, એક છોકરાએ કેવો જીવ જોખમમાં મૂક્યો, ટ્રાફિક પોલીસ ક્યાં?

• સુરત BRTS રૂટનો વીડિયો વાયરલ
• BRTS રૂટ પર લોકોની બેદરકારી 
• પોલીસની કામગીરી પર ઉઠ્યા સવાલ

Surat BRTS route video : સુરત શહેરમાં બીઆરટીએસ રૂટ ઉપર અકસ્માત થવાના અનેક કિસ્સાઓ સામે આવતા રહે છે. ઘણી વખત બીઆરટીએસ બસ અને સિટી બસના ચાલકો ગફલતભરી રીતે હંકારતા રાહદારીઓને ટક્કર મારતા હોવાનું પણ સામે આવ્યું છે, પરંતુ લોકોનું બેજવાબદારીભર્યું વર્તન પણ અકસ્માત પાછળ જવાબદાર છે. કારણ કે BRTSના રૂટનો એક વીડિયો સામે આવ્યો છે. જેમાં અનેક લોકો આ રૂટમાં વોકિંગ કરતા દેખાય છે, તો સાથે ઘણા લોકો રસ્તો ક્રોસ કરતા પણ નજરે પડે છે. 

બાળકે બસની સામે ઉભા રહી સ્ટંટ કર્યો
આ બધા વચ્ચે હદ તો ત્યારે થઈ જ્યારે એક બાળક બસને આવતી જોઈ સાઈડ થવાના બદલે બે હાથ ફેલાવીને બસની આગળ ઊભું રહી ગયું, જેથી આગળ વધતા બસના રૂટ પરથી બાઈકચાલકો પણ પસાર થતા જોવા મળ્યા હતા. વાઇરલ થયેલા વીડિયોની અંદર લોકો કોઈપણ પ્રકારની ચિંતા કર્યા વગર જીવના જોખમે બીઆરટીએસ રૂટમાં ક્યાંક બેઠેલા તો ક્યાંક રોડ ક્રોસ કરતા જોવા મળી રહ્યા છે. અકસ્માત થાય તો દોષનો ટોપલો બસચાલક પર જ ટોળાય છે. બીઆરટીએસ રૂટ પર જે પ્રકારે લોકો પડ્યાપાથર્યા રહે છે જેના કારણે અકસ્માત થતો હોય છે. 

BRTS રૂટ પીકનીક પોઇન્ટ બન્યો !
કોસાડ વિસ્તારની અંદર તેમજ હીરાબાગ સર્કલ સહિતના અલગ અલગ વિસ્તારોનો વીડિયો સામે આવ્યા છે. વીડિયો જોઈને કોઈના પણ રૂવાડાં ઊભા થઈ જાય એ પ્રકારે લોકો બેઠેલા જોવા મળી રહ્યા છે. બીઆરટીએસ બસને ચાલકો જ્યારે રૂટ પર બસ હંકારતા હોય છે ત્યારે આ લોકો કેટલું મોટું જોખમ ખેડતા હોય છે જે દેખાઈ આવે છે. રસ્તાની બંને તરફ લોકો બેસી રહે છે. બીઆરટીએસ રૂટનો રસ્તો ખૂબ સાંકડો હોય છે અને માત્ર બસ પસાર થાય એ પ્રકારનો જ રૂટ તૈયાર કરવામાં આવલો હોય છે. જો જરા પણ બીઆરટીએસ બસ ચાલકની ભૂલ થાય તો રોડ ઉપર બેઠેલા લોકો અકસ્માતના ભોગ બની શકે છે. આવી સ્થિતિમાં જ્યારે અકસ્માત થાય છે, ત્યારે દોષનો ટોપલો સીધો બસચાલક ઉપર ઢોળી દેવામાં આવે છે. ઘણી વખત તો બસચાલકોએ ઊભા રહીને તેમને ત્યાંથી હટી જવા માટે કહેવું પડે છે. આવી રીતે લોકોનું વર્તન રૂટ ઉપર જોવા મળે ત્યારે સ્વાભાવિક છે કે અકસ્માત થવાની પૂરેપૂરી શક્યતા છે.