- સુરતમાં માતાપિતા માટે આંખ ખોલતી ઘટના
- તુલસી રો હાઉસ સોસાયટીમાં બાળકી બાલ્કનીમાંથી નીચે પટકાઈ
- ઘટના સમયના CCTV સામે આવ્યા
- ઈજાગ્રસ્ત બાળકીને સારવાર માટે હોસ્પિટલ ખસેડાઈ
માતા-પિતા માટે એક ચેતવણીરુપ કિસ્સો સામે આવ્યો છે. સુરતમાં આ ઘટના બની છે જેમાં ઘરની બાલ્કનીમાં રમતાં એક બાળકી અચાનક નીચે પટકાઈ હતી. સુરતનો આ કિસ્સો દરેક માતાપિતા માટે આંખ ખોલતી ઘટના છે. હાલ ઈજાગ્રસ્ત બાળકીને સારવાર માટે હોસ્પિટલ ખસેડવામાં આવી છે.
ત્રીજા માળે ઊભેલી બાળકી અચાનક નીચે પટકાઈ
વાત સુરતના વરાછા યોગી ચોકમાં આવેલી સોસાયટીની છે, જ્યાં ત્રીજા માળે ઊભેલી બાળકી અચાનક નીચે પટકાઈ હતી. ભર દિવસે અચાનક આવો બનાવ બનતા સોસાયટીમાં હાજર દરેક લોકો ચોંકી ગયા હતા. હાલ ઘટનાના સીસીટીવી પણ સામે આવ્યા છે. અચાનક બાળકીને નીચે પડેલી હાલતમાં જોઈને ત્યાં દોડી આવેલી તેની માતા પણ બેભાન થઈને પડી ગઈ હતી. આ આખી ઘટના સોસાયટીના CCTVમાં કેડ થઈ હતી.
આ બનાવમાં વાંક કોનો?
કોઈનો નહીં. પણ દરેક માતા-પિતા જે તેમના બાળકને એકલું રમવા મૂકી દે છે અને કલાકોના કલાકો સુધી કોઈ ભાળ મેળવતા નથી. તેમના માટે લાલબત્તી સમાન ઘટના છે. કારણ કે એ 5 વર્ષની માસૂમને નહોતી ખબર કે એકલું ધાબા પર જવાથી ખતરો છે, એકલા ધાબા પર જવાથી કદાચ મોતને પણ ભેટી શકાય છે. ઘણા બાળકો રમત રમવા ધાબા સિવાય પણ અન્ય એવી જગ્યાએ જતાં રહેતા હોય છે, જ્યાં જીવનો ખતરો છે. કોઈનું બાળક સોસાયટીમાં રમવા ગયું હોય છે ને કારમાં ચગદાઈ જાય છે, કોઈનું બાળક એકલૂ રમતું હોય છે અને ખુલ્લી ગટરમાં પડી જાય છે.
સુરતના પરિવાર સાથે બનેલી આ ઘટનામાંથી શીખ મેળવો
બાળકો રમતમાં એટલા મશગુલ હોય છે કે તે આગળ શું થશે તેનાથી અજાણ હોય છે પણ માતા-પિતા તો સમજદાર હોય છે ને. એમને ધ્યાન રાખવું જોઈએ કે બાળક ક્યાં રમવા જાય છે, કઈ રમત રમે છે, કેટલા સમયથી બાળક રમવા ગયું છે, કોણ કોણ રમે છે, કામને સાઈડમાં મૂકી ક્યાંક તો ધ્યાન રાખવું પડશે નહિતર સુરતના પરિવાર સાથે બનેલી આ ઘટના તમારા પરિવારમાં પણ બની શકે છે. શક્ય હોય ત્યાં સુધી નાના બાળકોને એકલા મૂકવાની જગ્યાએ તેમની સાથે રહીને તેનું ધ્યાન રાખવું જોઈએ, નહિ તો તેને સોસાયટીની આસપાસની એ જગ્યાઓથી જાણ કરાવવી જોઈ કે અહી જવાથી તને વાગી શકે છે.
હવે આપણે એ ધ્યાનમાં રાખવાનું છે કે આ પરિવાર સાથે બનેલી ઘટના ફરી રિપીટ ન થાય. માસૂમ બાળકનું દરેક રીતે ધ્યાન રાખવું જરૂરી છે કારણ કે તેના જીવનો સવાલ છે.
