- સુપ્રીમ કોર્ટેનો જ્ઞાનવાપી મસ્જિદમાં સર્વે પર પ્રતિબંધ મૂકવાનો ઇનકાર
- કેમ્પસમાં બે સપ્તાહ સુધી કોઈપણ પ્રકારનું ખોદકામ ન કરવા જણાવાયું
- વારાણસી કોર્ટના આદેશ પર સોમવારે ASIની ટીમ સર્વે માટે મસ્જિદ પરિસરમાં પહોંચી
સુપ્રીમ કોર્ટે હાલમાં વારાણસીની જ્ઞાનવાપી મસ્જિદમાં સર્વે પર પ્રતિબંધ મૂકવાનો ઇનકાર કર્યો છે. આ સાથે કેમ્પસમાં બે સપ્તાહ સુધી કોઈપણ પ્રકારનું ખોદકામ ન કરવા જણાવાયું છે. આ મામલે બપોરે 2 વાગ્યે ફરી સુનાવણી થશે. જ્ઞાનવાપી મસ્જિદના સંચાલનની દેખરેખ રાખતી અંજુમન કમિટીએ કાશી વિશ્વનાથ મંદિરની બાજુમાં આવેલા મસ્જિદ સંકુલના સર્વેક્ષણના વારાણસી જિલ્લા અદાલતના આદેશ સામે અરજી દાખલ કરી છે.
વારાણસી ડિસ્ટ્રિક્ટ કોર્ટના આદેશ પર સોમવારે (24 જુલાઈ) એએસઆઈની ટીમ સર્વે માટે મસ્જિદ પરિસરમાં પહોંચી છે. CJI DY ચંદ્રચુડે ASIને સવારે 11.15 વાગ્યે કોર્ટમાં હાજર થવા અને સર્વે વિશે માહિતી આપવા કહ્યું. અંજુમન કમિટિ તરફથી હાજર રહેલા વરિષ્ઠ વકીલ હુઝૈફા અહમદીએ બેન્ચને જણાવ્યું કે, સર્વેનો આદેશ શુક્રવારે આપવામાં આવ્યો હતો. અમને અપીલ કરવાની તક ન મળી અને સર્વે શરૂ થયો. તેમણે કહ્યું કે, જો ઓર્ડરમાં ખોદકામ લખેલું હોય તો અમને અપીલ કરવાની તક મળવી જોઈએ.
જ્યારે CJIએ પ્રશ્ન કર્યો કે સર્વે દરમિયાન ખોદકામ થશે તો યુપી સરકારના વકીલ તુષાર મહેતાએ કહ્યું કે સર્વે આધુનિક ટેક્નોલોજીથી કરવામાં આવશે. આમાં કોઈ નુકસાન થશે નહીં. હિંદુ પક્ષ તરફથી વરિષ્ઠ વકીલ શ્યામ દીવાને પણ કહ્યું કે સર્વેમાં કોઈ ખોદકામ કરવામાં આવશે નહીં. અહમદીએ બેન્ચને કહ્યું, અમે સર્વે માટે બે-ત્રણ સ્ટેની વિનંતી કરી હતી પરંતુ તેઓ રોકાયા ન હતા. અમે માનીએ છીએ કે વૈજ્ઞાનિક સર્વેક્ષણનો સમય હજુ આવ્યો નથી. પ્રથમ કેસ મેરિટ પર જોવો જોઈએ. અહમદીએ કહ્યું કે, પશ્ચિમી દિવાલ પર ખોદકામ કરવામાં આવી રહ્યું છે.
યુપી સરકારના વકીલ તુષાર મહેતાએ કોર્ટને કહ્યું કે મેં સૂચનાઓ લીધી છે. ત્યાં પણ કોઈ ઈંટ ખસેડવામાં આવી નથી. મહેતાએ કહ્યું, એક અઠવાડિયા સુધી કોઈ નુકસાન નહીં થાય. ત્યાં સુધી તેઓ હાઈકોર્ટમાં જઈ શકે છે, પરંતુ અહમદીએ આગ્રહપૂર્વક સર્વેને રોકવાની માંગ કરી હતી.
