જોખમ / અમદાવાદ-વડોદરા એક્સપ્રેસ વે પર જતાં લોકો સાવધાન! ગાડીઓ પર પથ્થર મારીને કેવી હાલત કરી જુઓ

મંગળવારે રાત્રે અમદાવાદ-વડોદરા એક્સપ્રેસ વે પર સામરખા પાસે વડોદરાથી અમદાવાદ જતાં માર્ગ પર એક એવી ઘટના બની હતી જે અનેક લોકો માટે જોખમી હતી. 

વાહનો પર પથ્થરમારો

કેટલાંક અજાણ્યા માણસો દ્વારા વાહનો પર પથ્થરમારો કરવામાં આવ્યો હતો. જેને લઈને વાહનચાલકોમાં ભયનું વાતાવરણ સર્જાઈ ગયું હતું. ગાડીઓના કાચ તૂટયા હતા અને જેને કારણે જતાં મુસાફરોમાં પણ ભયનો માહોલ હતો.  જો કે આ બનાવમાં સદનસીબે કોઈ જાનહાનિ નોંધાઈ નહોતી.

પોલીસ દ્વારા પેટ્રોલિંગ

બનાવ અંગેની જાણ હાઈવે આથોરોટી અને આણંદ તથા ખેડા જિલ્લા પોલીસને કરવામાં આવતા તુરંત જ પોલીસ દ્વારા પેટ્રોલિંગ કરાયું હતું. પરંતુ પોલીસને આ અજાણ્યા લોકો હજુ સુધી હાથ લાગ્યા નહોતા.

કેટલાંક વાહનોના કાચ તૂટયા
એક મુસાફર સાથેની વાતચીતમાં તેણે કહ્યું હતું કે રાત્રિના સાડા દસ વાગ્યાની આસપાસ તેઓ વડોદરાથી અમદાવાદ જઈ રહ્યા હતા. એ સમયે આણંદ જિલ્લાથી થોડે આગળ સામરખા પાસે પાંચથી વધુ વાહનો રોડ સાઈડે પાર્ક કરેલી હાલતમાં હતા. તથા કેટલાંક વાહનોના કાચ તૂટેલા હતા. તેમણે શંકા ગઈ માટે તેમણે પૂછપરછ કરી.

તેમણે આ અંગે વાહનમાંથી નીચે ઉતરીને તપાસ કરતાં માલૂમ પડ્યું હતું કે, સામરખા ગામની હદ પાસે કેટલાંક લોકો દ્વારા જઈ રહેલા વાહનો પર પથ્થરમારો કરવામાં આવ્યો હતો.

લૂંટના ઇરાદે હુમલો કર્યો હોવાની શક્યતા
આજકાલ દિવાળીના દિવસો ચાલી રહ્યા છે અને એવા સમયે લોકો પોતાની સંપતિ વગેરે લઈ જતાં હોય છે. એવું અનુમાન લગાવવામાં આવી રહ્યું છે કે, દિવાળી જેવા તહેવારોને લઈને લોકો રકમ લઈ જતા હોય છે માટે લૂંટના ઈરાદે હુમલો કરાયો હોઈ શકે છે. જોકે, આ અંગેની જાણ હાઈવે ઓથોરીટી અને પોલીસને કરવામાં આવતા તેઓએ સઘન પેટ્રોલિંગ હાથ ધર્યું હતું.