- પ્રાંતિજમાં વરાળ નીકળતો વીડિયો વાયરલ
- ફાયર વિભાગે પાણી નાખતા સામાન્ય બ્લાસ્ટ થયો
- બ્લાસ્ટ થતાં ફાયર ઓફિસર અને એક મહિલા દાઝ્યા
સાબરકાંઠાના પ્રાંતિજ વિસ્તરમાં વરાળ નીકળતી રહસ્યમય ઘટનાનો વીડિયો સોશિયલ મીડિયામાં વાયરલ થતા લોકો અચરજમાં મુકાયા છે. પ્રાંતિજના નનાનપુરમાં જમીનમાંથી વરાળ નીકળતી હોવાનો આ વીડિયો સામે આવતા આ ઘટનાની વાત વાયુવેગે ફેલાઈ હતી. જેથી ઘટના નિહાળવા મોટી સંખ્યામાં ગ્રામજનો ઉમટી પડયા હતા. આથી ઘટનાસ્થળે લોકોના ટોળે ટોળા ઉમટી પડ્યા હોય તેવા દ્રશ્યો સર્જાયા હતા.
પાણી નાખતા બ્લાસ્ટ
બીજી બાજુ આ ઘટનાની જાણ ફાયર વિભાગ અને વહીવટી તંત્રને જાણ કરવામાં આવી હતી. જેને લઈને ફાયર વિભાગ પણ દોડી ગયો હતો. આ દરમિયાન ફાયર વિભાગ દ્વારા વરાળ પણ પાણી નાખવામાં આવ્યું હતું. જે દરમિયાન સામાન્ય બ્લાસ્ટ પણ થયો હતો. આ બ્લાસ્ટમાં ફાયર ઓફિસર દાજી જતા તેઓ ઘાયલ થયા હતા. તો બીજી તરફ બ્લાસ્ટને લઈને એક મહિલા પણ પગમાં દાઝ્યા હતા. આથી મહિલાને તાત્કાલિક સારવાર અર્થે ખસેડવામાં આવી હતી.આ ઘટનાને લઈને લોકોમાં ક્ષણિક ડરનો માહોલ પણ જોવા મળ્યો હતો.
જેસીબી બોલાવવા સહિતની કાર્યવાહી હાથ ધરી
મહત્વનું છે કે આ ઘટનાનું કોઈ સ્પષ્ટ કારણ બહાર આવ્યું નથી પરંતુ પ્રાથમિક દ્રષ્ટિએ ગેસ લીકેજ થતો હોવાનું જાણવા મળી રહ્યું છે. કારણકે પ્રાંતિજ આસપાસ ફેક્ટરી વિસ્તાર આવેલો છે જેમાં કેમિકલ વાળું પાણી જમીનમાં ઉતારી હોય જેના પરિણામે જમીનમાંથી ગેસ બહાર આવી રહ્યો હોવાનું પ્રાથમિક દ્રષ્ટિએ અંદાજ લગાવવામાં આવી રહ્યો છે. આથી તંત્ર દ્વારા જેસીબી બોલાવવા સહિતની કાર્યવાહી હાથ ધરી સ્પષ્ટ કારણ જાણવા મથામણ કરવામાં આવી રહી છે. જ્યા પાણીના ટેન્કર અને જેસીબી મારફતે કાર્યવાહી કરવામાં આવી રહી છે.
