મોસમમાં પલટો! / હજુ ઠંડીનો છેલ્લો રાઉન્ડ બાકી: પહાડી રાજ્યોમાં ફરી વરસાદ સાથે હિમવર્ષાની આગાહી

• હજુ ઠંડીનો છેલ્લો રાઉન્ડ આવશે
• પહાડો પર ફરીથી વરસાદ અને હિમવર્ષાની આગાહી
• દિલ્હી સહિત ઉત્તર ભારતમાં મોસમનો મિજાજ બદલાશે

ભારતીય હવામાન વિભાગના જણાવ્યા અનુસાર, ઉત્તરાખંડ, હિમાચલ પ્રદેશ, જમ્મુ-કાશ્મીર અને લદ્દાખ જેવા પહાડી રાજ્યોમાં વરસાદ સાથે હિમવર્ષા થવાની સંભાવના છે અને સાથે સાથે અરુણાચલ પ્રદેશમાં પણ હળવો કે મધ્યમ વરસાદ તેમજ હિમવર્ષા થઈ શકે છે. આથી હવામાન વિભાગનું કહેવું છે કે પહાડો પર થનારી હિમવર્ષાની અસર મેદાની વિસ્તારોમાં થઈ શકે છે અને તેથી દિલ્હી-એનસીઆર, ઉત્તરપ્રદેશ, રાજસ્થાન, હરિયાણા અને પંજાબમાં ઠંડીનો છેલ્લો રાઉન્ડ જોવા મળશે. જોકે, દિલ્હી અને ઉત્તર ભારતમાં હંગામી રાહત બાદ ગરમીનો દોર ચાલુ રહેશે. 

હવામાન વિભાગે જણાવ્યું છે કે, આગામી બે દિવસમાં દિલ્હીના તાપમાનમાં વધારો થઈ શકે છે. આજે મહત્તમ તાપમાન 28  ડિગ્રી અને લઘુતમ તાપમાન 10 ડિગ્રી રહેશે. સાથે જ 19-20 ફેબ્રુઆરી સુધી લઘુતમ તાપમાન 11 ડિગ્રી અને મહત્તમ તાપમાન 30 ડિગ્રી સુધી પહોંચી શકે છે.
પહાડો પર હિમવર્ષાના કારણે ઠંડીનો દોર જોવા મળશે. જોકે, કોલ્ડવેવ જેવી તીવ્ર ઠંડી નહીં પડે.

હવામાન વિભાગના જણાવ્યા અનુસાર, આગામી સપ્તાહે ધીમે ધીમે તાપમાનમાં વધારો થશે. પશ્ચિમ બંગાળના પાટનગર કોલકાતામાં લઘુતમ તાપમાન 18 ડિગ્રી અને મહત્તમ તાપમાન 30ડિગ્રી થશે. અમદાવાદમાં પણ લઘુતમ તાપમાન 16 ડિગ્રી અને મહત્તમ તાપમાન 35 ડિગ્રી સુધી પહોંચશે. મુંબઈમાં લઘુતમ તાપમાન 19 ડિગ્રી અને મહત્તમ તાપમાન 37 ડિગ્રી થશે. હૈદરાબાદમાં લઘુતમ તાપમાન 16 ડિગ્રી અને મહત્તમ તાપમાન 33 ડિગ્રી સુધી પહોંચશે.

આ સાથે હવામાન વિભાગે કહ્યું છે કે, પંજાબના અમૃતસરમાં લઘુતમ તાપમાન સામાન્ય કરતાં એક ડિગ્રી વધુ એટલે કે 8.7 ડિગ્રી સેલ્સિયસ નોંધાયું હતું અને લુધિયાણામાં લઘુતમ તાપમાન સામાન્યથી 3 ડિગ્રી સેલ્સિયસ વધુ એટલે કે 11.8 ડિગ્રી નોંધાયું હતું. ઉત્તર-પશ્ચિમ ભારતના રાજ્યોમાં આજ કાલ લઘુતમ તાપમાન 8થી 10 ડિગ્રીને રેન્જમાં જોવા મળી રહ્યું છે. હવામાન વિભાગની આગાહી છે કે, આજે ઉત્તર-પશ્ચિમ ભારતના રાજ્યોમાં ઝંઝાવાતી પવનો ફૂંકાઈ શકે છે. શ્રીનગરમાં આજે લઘુતમ તાપમાન માઈનસમાં રહી શકે છે. આ ઉપરાંત પહલગાંવમાં લઘુતમ તાપમાન માઈનસ ૩ અને મહત્તમ તાપમાન 10 ડિગ્રી રહેશે.