- ગુજરાતમાં ચોમાસાનો માહોલ જામ્યો
- સવારના 6થી 10 સુધીમાં 45 તાલુકામાં વરસાદ
- ધોરાજી, કપરાડા, પોરબંદર દોઢ ઈંચથી વધુ વરસાદ
- વાવણી લાયક વરસાદ પડતા ધરતીપુત્રોમાં ખુશી
- ભારે વરસાદના કારણે વાતાવરણમાં ઠંડક પ્રસરી
હવામાન વિભાગની આગાહીને પગલે ગુજરાતમાં વરસાદી માહોલ જામ્યો છે. વહેલી સવારથી રાજ્યના મોટાભાગના વિસ્તારોમાં વરસાદ વરસી રહ્યો છે. આજે સવારે 6 વાગ્યાથી સવારના 10 વાગ્યા સુધીમાં ગુજરાતના 45 તાલુકામાં વરસાદ નોંધાયો છે. વાવણી લાયક વરસાદ પડતા ધરતીપુત્રોમાં ખુશીનો માહોલ જોવા મળી રહ્યો છે. વલસાડના ઉમરગામમાં 6 કલાકમાં 6 ઈંચ વરસાદથી જળબંબાકારની સ્થિતિ સર્જાઈ છે.
45 તાલુકામાં વરસાદી માહોલ જામ્યો
સવારથી અત્યાર સુધીમાં ખાબકેલા વરસાદ વિશે વાત કરીએ તો ભેસાણ, ગણદેવી, ધોરાજી, કપરાડા, પોરબંદર દોઢ ઈંચથી વધુ વરસાદ નોંધાયો છે. જ્યારે કુતિયાણામાં સવા ઈંચ, જેતપુરમાં સવા ઈંચ વરસાદ પડ્યો છે. ઉમરગામ, માણાવદર, વાપી, ભાણવડ તાલુકામાં 1-1 ઈંચ વરસાદ નોંધાયો છે. જ્યારે ભેસાણમાં પોણો ઈંચ, ગણદેવીમાં પોણો ઈંચ, ધોરાજીમાં પોણો ઈંચ, કપરાડામાં પોણો ઈંચ, પોરબંદરમાં પોણો ઈંચ, પારડીમાં પોણો ઈંચ, જાફરાબાદમાં અડધો ઈંચ, મેંદરડામાં અડધો ઈંચ નોંધાયો છે.
ગાંધીનગરમાં વાતાવરણમાં ઠંડક પ્રસરી
ગાંધીનગરમાં ધીમી ધારે વરસાદ શરૂ થયો છે. વરસાદ થતા વાતાવરણમાં ઠંડક પ્રસરી છે. ગાંધીનગર ગ્રામ્ય વિસ્તારમાં પણ વરસાદ શરૂ થયો છે. છેલ્લા બે દિવસથી વાદળછાયા વાતાવરણ બાદ આજે વરસાદ શરૂ થયો છે.
.jpg)
વડોદરામાં નીચાણવાળા વિસ્તારોમાં ભરાયા પાણી
ગાંધીનગર ઉપરાંત વડોદરા શહેરમાં પણ ધોધમાર વરસાદ વરસી રહ્યો છે. શહેરના અનેક વિસ્તારોમાં ધોધમાર વરસાદના કારણે રસ્તા પર વરસાદી પાણી ફરી વળ્યા છે. તરસાલી, માંજલપુર, વારી, રાજમહેલ રોડ પર ધોધમાર વરસાદ વરસી રહ્યો છે. વહેલી સવારથી વરસાદ શરૂ થતાં લોકો રેઈનકોટ પહેરીને નોકરી-ધંધે જતાં જોવા મળ્યા હતા. વરસાદના કારણે નીચાણવાળા વિસ્તારોમાં વરસાદી પાણી ભરાયા છે.
અમદાવાદમાં પડ્યો ધીમીધારે વરસાદ
અમદાવાદ શહેરમાં આજ વહેલી સવારથી વાદળછાયું વાતાવરણ જોવા મળી રહ્યું છે. શહેરના કેટલાક વિસ્તારોમાં સવારના 10 વાગ્યા પછી ધીમી ધારે વરસાદ શરૂ થયો હતો. શહેરના સોલા, થલતેજ, ગોતા, ચાંદલોડિયા, એસ જી હાઈવે, ઘાટલોડીયા, ત્રાગડ, ઓગણજમાં વરસાદ ખાબકતા વાતાવરણમાં ઠંડક પ્રસરી છે.
પ્રથમ સારા વરસાદના કારણે ધરતીપુત્રોમાં આનંદ
વલસાડ જિલ્લામાં સાર્વત્રિક મેઘ મહેર જોવા મળી રહી છે. વલસાડના વાપી, ઉમરગામ તાલુકામાં સૌથી વધુ વરસાદ નોંધાયો છે. પ્રથમ સારા વરસાદના કારણે ધરતીપુત્રો ખુશ ખુશ થઈ ગયા છે. ઉમરગામ અને વાપીના જાહેર રસ્તા પર વરસાદી પાણી ભરાયા છે. ઉમરગામના ગાંધીવાડી અને પાવર હાઉસ વિસ્તારમાં પાણી ભરાયા છે. તો વાપી રેલવે સ્ટેશન રોડ પર પણ પાણી ભરાયા છે. સ્ટેશન રોડ પર પાણી ભરાતા વેપારીઓની મુશ્કેલીઓ વધી છે.
ભાવનગર પંથકમાં વાવણીની શરૂઆત
ભાવનગર જિલ્લામાં પણ વહેલી સવારથી વરસાદી માહોલ જોવા મળી રહ્યો છે. વરસાદના કારણે જિલ્લાના સિહોર, ઘોઘા પંથકમાં વાવણીની શરૂઆત કરી દેવામાં આવી છે. સિહોર,ઘોઘા પંથકમાં વાવણી શરૂ થતાં ખેડૂતોમાં ખુશી જોવા મળી રહી છે. આપને જણાવી દઈએ કે, ગઈકાલે ઘોઘા, સિહોર, ભાવનગરમાં 3 ઇંચ વરસાદ પડ્યો હતો.
દમણ અને દાદરાનગર હવેલીમાં મેઘરાજાની તોફાની બેટિંગ
દમણ અને દાદરાનગર હવેલીમાં ધોધમાર વરસાદ પડ્યો છે. છેલ્લા 24 કલાકમાં સેલવાસમાં 3 ઈંચ વરસાદ ખાબક્યો છે. જ્યારે ખાનવેલ અને દમણમાં 4-4 ઈંચ વરસાદ થયો છે. ભારે વરસાદથી સેલવાસના રસ્તાઓ પર પાણી ભરાયા છે.
બનાસકાંઠા જિલ્લામાં આજ સવારથી વરસાદ શરૂ
8 દિવસના વિરામ બાદ બનાસકાંઠા જિલ્લામાં આજ સવારથી ફરી વરસાદ શરૂ થયો છે. જિલ્લાના વાવ તાલુકામાં સવારથી જ વરસાદ વરસી રહ્યો છે. વરસાદ શરૂ થતાં લોકોએ ગરમીથી હાશકારો અનુભવ્યો છે.
ઉપલેટામાં ધોધમાર વરસાદ
રાજકોટના ઉપલેટા પંથકમાં સવારથી ધોધમાર વરસાદ વરસી રહ્યો છે. ઉપલેટાના ભાયાવદર, પાનેલી, મોજીરા, ગઢાળા, અરણી, ખીરસરા સહિતના ગ્રામ્ય વિસ્તારોમાં મેઘરાજા ધડબડાટી બોલાવી રહ્યા છે. ધોધમાર વરસાદના કારણે અનેક રસ્તાઓ પર વરસાદી પાણી વહેવા લાગ્યા છે. ખેતરોમાં પણ વરસાદી પાણીથી તરબતર થયા છે. દ્વારકાના ખંભાળિયા પંથકમાં વહેલી સવારથી ધોધમાર વરસાદ વરસી રહ્યો છે. ખંભાળિયામાં ભારે વરસાદના કારણે માર્ગો પર પાણી ભરાયા છે. દ્વારકાના રામનાથ સહિતના વિસ્તારોમાં પાણી ભરાયા છે.
દક્ષિણ ગુજરાતમાં ભારે વરસાદની આગાહી
સુરત જિલ્લામાં પણ વિધિવત ચોમાસાની શરૂઆત થઈ ચૂકી છે. હવામાન ખાતાએ દક્ષિણ ગુજરાતમાં 5 દિવસ ભારે વરસાદની આગાહી કરી છે. જેથી બારડોલી, કામરેજ, પલસાણા, મહુવા, માંગરોળ પંથકમાં વરસાદી માહોલ જોવા મળી રહ્યો છે. વરસાદ પડતા ધરતીપુત્રોમાં ખુશીનો માહોલ છવાયો છે.
