આણંદ / અલારસામાં તળાવ ખોદકામમાં શિવલિંગ જેવી કૃતિ મળતા લોકોએ કર્યું ધ્વજારોહણ, પુરાતત્વ વિભાગે આવે તે પહેલા મહાઆરતીનું આયોજન

• અલારસામાં માટી ખોદકામ દરમિયાન શિવલિંગ કૃતિ મળી આવી
• આજુબાજુના ગામના લોકોએ ઘટનાસ્થળે કર્યું ધ્વજારોહણ
• ધ્વજારોહણ બાદ મહાઆરતીનું પણ આયોજન કરાયું

આણંદના અલારસામાં તળાવમાં ખોદકામ દરમિયાન શિવલિંગ કૃતિ મળી આવ્યાની ઘટના સામે આવી છે. જેથી આજુબાજુના ગામ લોકોએ ઘટનાસ્થળે ધ્વજારોહણ કર્યું. ધ્વજારોહણ બાદ મહાઆરતીનું પણ આયોજન કરાયું. આ ઘટના બાદ ગામના લોકોએ ભવ્ય શિવ મંદિર બાંધવાનો સંકલ્પ કર્યો. ચાર ગામના લોકોએ સાથે મળીને આ સામુહિક નિર્ણય લીધો. જો કે, હજુ સુધી પુરાતત્વ વિભાગ ઘટનાસ્થળે નથી પહોંચ્યું. પુરાતત્વ આવે કે ન આવે પરંતુ ભવ્ય મંદિરના નિર્માણનો ગામ લોકોએ સંકલ્પ કર્યો છે.

વાત વાયુવેગે ફેલાતા મામલતદાર અને પોલીસ કાફલો ઘટનાસ્થળે દોડી આવ્યો

વધુમાં જણાવી દઇએ કે, આણંદ જિલ્લાના બોરસદ તાલુકાના અભેટપુરા તળાવના ખોદકામ દરમ્યાન શિવલિંગ જેવી પ્રતિમા જોવા મળતા લોકોમાં કુતૂહલતા સર્જાઇ હતી. આસપાસના ગ્રામજનોને તેમાં શિવલિંગ જેવી પ્રતિમા દેખાતા ગામના સૌ કોઇ લોકો ત્યાં દર્શન કરવા દોડી આવ્યા હતા. અનેક લોકોએ આ શિવલિંગ જેવી દેખાતી પ્રતિકૃતિની પૂજા પણ કરી. જો કે, આ વાત વાયુવેગે ફેલાતા મામલતદાર અને પોલીસ કાફલો ઘટનાસ્થળે દોડી આવ્યો હતો.

આ અંગેની જાણ બોરસદ મામલતદારને થતા તેઓ પણ તુરંત ઘટનાસ્થળે દોડી આવ્યા હતાં અને આ સમગ્ર ઘટનાની તપાસ હાથ ધરી હતી. આ અંગે મામલતદાર આરતીબેન ગોસ્વામીએ જણાવ્યું હતું કે, 'આ પુરાતન વિભાગનો વિષય હોવાથી તેઓને આ અંગે જાણ કરવામાં આવશે.' તેમજ ગ્રામજનોને પણ તળાવથી દૂર રહેવાની અપીલ કરવામાં આવી હતી.

તંત્રએ લોકોને ભેખડથી તેમજ તળાવથી દૂર રહેવાની અપીલ કરી હતી

ખોદકામ દરમિયાન શિવલિંગ હોવાની વાત એકાએક હવાની જેમ પ્રસરાતા તુરંત ઘટનાસ્થળે ગ્રામજનો અને તેની આસપાસના લોકો ખૂબ મોટી સંખ્યામાં દોડી આવ્યા હતા. ઘટનાસ્થળે ભેખડ ધસી પડવાની સંભાવના હોવાના કારણે તંત્રએ લોકોને ભેખડથી તેમજ તળાવથી દૂર રહેવાની અપીલ કરી હતી. જો કે, ભેખડમાં શિવલિંગ જેવો આકાર દેખાતા હાલમાં તો આસપાસના ગ્રામ્યજનો પણ ખૂબ મોટી સંખ્યામાં લોકો દર્શન કરવા ઉમટી રહ્યાં છે. ત્યારે આ અંગે પુરાતત્વ વિભાગ તપાસ કરીને રિપોર્ટ રજૂ કરશે અને ત્યારબાદ જ નક્કર વિગતો એટલે કે સાચી હકીકત સામે આવશે.