મહામારી / જાગૃત જનતાનો મહત્વનો નિર્ણય: ગુજરાતના આ ગામોમાં સ્વયંભૂ લૉકડાઉન, જાણો રાજ્યની સ્થિતિ

• કોરોનાનો કહેર યથાવત
• કેટલાક શહેર વળ્યાં લોકડાઉન તરફ
• અનેક શહેરમાં સ્વૈચ્છિક લોકડાઉન જાહેર

ઉલ્લેખનીય છે કે, કોરોનાને કાબૂમાં લેવા માટે સરકાર દ્વારા યુદ્ધના ધોરણે પ્રયાસો ચાલુ છે તો બીજા તરફ જનતા પણ જાગૃત થઇને કોરોનાને અટકાવવા માટેના  પ્રયાસ કરી રહી છે. ત્યારે રાજ્યના કેટલાક શહેરોમાં સ્વયભૂં લૉકડાઉન લાદવામાં આવ્યા છે. 

અમદાવાદના અનેક વિસ્તારોમાં સ્વૈચ્છિક બંધનો નિર્ણય 

કોરોના વાયરસના વધતાં કેસ વચ્ચે અમદાવાદના વિવિધ વિસ્તારોમાં 3 વાગ્યા પછી બંધની શરૂઆત કરવામાં આવી છે. સાબરમતી, રાણીપ, ન્યુ રાણીપ, બલોલનગર, નરોડા, સરદાર નગર, સિંધી માર્કેટ બંધ કરવામાં આવી રહ્યા છે. વેપારીઓ દ્વારા બંધના સ્ટીકર મારવામાં આવી રહ્યા છે. બંધના એલાનને મોટા ભાગના વેપારીઓ દ્વારા સમર્થન આપવામાં આવી રહ્યું છે.

અમદાવાદના વસ્ત્રાપુરમાં બપોર બાદ દુકાનો બંધ રહેશે

અમદાવાદના વસ્ત્રાપુરમાં બપોર બાદ દુકાનો બંધ રહેશે. વસ્ત્રાપુર વેપારી એસોસિયેશન દ્વારા જાહેરાત કરાઇ છે. 30 એપ્રિલ સુધી બપોરે 2 વાગ્યા બાદ દુકાનો બંધ રહેશે. 

રાજકોટની તો દાણાપીઠ બજાર બપોરે 3 વાગ્યા સુધી જ રહેશે ખુલ્લી

હવે વાત કરીએ રાજકોટની તો દાણાપીઠ બજાર સવારે 8થી બપોરે 3 સુધી ખુલ્લી રહેશે. આજથી 25 એપ્રિલ સુધી સવારે 8થી બપોરે 3 સુધી જ દુકાનો ખુલશે.જ્યારે રાજકોટમાં શનિ-રવિ બે દિવસ ઉદ્યોગગૃહ પોતાના ઉદ્યોગ બંધ રાખવા તૈયાર થયા છે. 

પાટણમાં લૉકડાઉન

પાટણમાં પણ લોકડાઉનનો નિર્ણય લેવામાં આવ્યો છે. આવતીકાલથી પાટણમાં સ્વૈચ્છિક લોકડાઉનનો નિર્ણય લેવાયો છે..સવારે 9થી 12 વાગ્યા સુધી ત્રણ કલાક દુકાનો ખુલ્લી રહેશે. 

આ તરફ અરવલ્લીના ઉભરાણ ગામે સ્વૈચ્છિક બંધનો નિર્ણય લેવાયો છે. 30 એપ્રિલ સુધી બજારો સવારે 8થી 3 સુધી ખુલ્લા રાખવામાં આવશે. તો શક્તિપીઠ અંબાજીમાં પણ 3 દિવસનું સ્વૈચ્છિક લોકડાઉન જાહેર કરાયું છે. બુધવારથી શુક્રવાર સુધી 1 વાગ્યા સુધી જ બજાર ખુલ્લુ રહેશે. 

સાળંગપુરમાં નહીં થાય હનુમાન જયંતીની ઉજવણી 

સુપ્રસિદ્ધ સાળંગપુર કષ્ટભંજન હનુમાનજી મંદિરે હનુમાન જ્યંતી મહોત્સવ ઉજવણી કરવામાં આવશે નહીં. વધતા જતા કોરોનાના સંક્રમણના પગલે મંદિર વિભાગ દ્વારા આ નિર્ણય લેવાયો છે. 

દ્વારકાના મહાદેવીયા ગામે સ્વૈચ્છિક લૉકડાઉન 

હવે દ્વારકાની વાત કરીએ તો મહાદેવીયા ગામે સ્વૈચ્છિક લૉકડાઉન ની જાહેરાત કરી છે.સવારે 6 થી 9.30 કલાક સુધી દુકાનો ચાલુ રાખી શકાશે. બહારથી આવતા લોકોને કામ વગર ગામમાં પ્રવેશ નહીં મળે. 

બોટાદ શહેરમાં પણ 7 દિવસનું લૉકડાઉન 

આ તરફ બોટાદ શહેરમાં પણ 7 દિવસનું લૉકડાઉન જાહેર કરાયું છે...જેમાં 21થી 27 એપ્રિલ સુધી લૉકડાઉન રહેશે.

ખેડાના કઠલાલમાં બે દિવસ સંપૂર્ણ લોકડાઉન

ખેડાના કઠલાલમાં બે દિવસ સંપૂર્ણ લોકડાઉન પાળવામાં આવશે. 20 અને 21 એપ્રિલે સંપૂર્ણ લોકડાઉન પળાશે. 22 એપ્રિલથી સાંજે 4થી સવારના 6 સુધી લોકડાઉન રહશે. નગરમાં વધતા કોરોના સંક્રમણને લઇને આ નિર્ણય કરવામાં આવ્યો છે. મેડિકલ સેવાઓ સિવાયના તમામ કામકાજ બંધ રાખવામાં આવશે. નગરપાલિકા દ્વારા નાગરિકોના સ્વાસ્થયને આ નિર્ણય લેવામાં આવ્યો છે. આ નિયમોનો અમલ નહીં કરનાર સામે કાર્યવાહી કરવામાં આવશે.

8 મનપા વિસ્તારમાં લાગી શકે છે લોકડાઉનઃ સૂત્ર

રાજ્યમાં કોરોના સંક્રમણને લઈને મોટા સમાચાર સામે આવી રહ્યા છે. સરકાર ગુજરાતમાં પણ લોકડાઉન અંગે વિચાર કરી રહી છે જેમાં ગાંધીનગરના સૂત્રો દ્વારા એવો ગણગણાટ છે કે 8 મનપાઓમાં કડક લોકડાઉન અમલી બનશે. સરકારમાં લોકડાઉન અંગે વિચારણા અંગે ચાલી રહી છે. રાજ્યમાં 8 મનપા વિસ્તારમાં પરિસ્થિતિ ગંભીર જોવા મળી રહી છે. રાજસ્થાન અને દિલ્હીમાં લોકડાઉન લાગુ કરાયું છે. અમદાવાદ, સુરત, વડોદરા, રાજકોટ, ભાવનગર, જામનગર, જૂનાગઢ સહિતની મહાનગરપાલિકાઓમાં લોકડાઉન લાગી શકે છે.