- આજે ચૈત્રી પૂનમની ઉજવણી
- મંદિરોમાં ભક્તોનું ઘોડાપુર ઉમટ્યું
- ભક્તોએ દર્શન કરી ધન્યતા અનુભવી
આજે ચૈત્રી પૂનમની ગુજરાતના મંદિરોમાં ઠેર-ઠેર ધામધૂમપૂર્વક ઉજવણી કરવામાં આવી રહી છે. વહેલી સવારથી મંદિરોમાં ભક્તોની ભારે ભીડ જોવા મળી રહી છે. ચોટીલા, ઊંઝા, પાવાગઢ, સાળંગપુર સહિતના મંદિરોમાં ભક્તોનું ઘોડાપુર ઉમટી પડ્યું છે. દૂર દૂરથી ભક્તો પગપાળા સંઘો લઈ મહેસાણા ઊંઝાના ઉમિયાધામમાં પહોંચ્યા હતા. તો સુરેન્દ્રનગરના ચોટીલામાં માનવ મેરામણ ઉમટ્યું છે.
ઉમિયાધામમાં ભક્તોની ભારે ભીડ
મહેસાણાના ઊંઝા ઉમિયા મંદિરે ચૈત્રી પૂનમને લઈને વહેલી સવારથી જ ભારે ભીડ જોવા મળી રહી છે. ઉમિયા મંદિરે દૂર દૂરથી ભક્તો પગપાળા સંઘોને લઈને પહોંચ્યા છે. આજે ચૈત્રી પૂનમ હોવાના કારણે ઊંઝા ઉમિયા મંદિરમાં માતાજીને વિશેષ શણગાર કરવામાં આવ્યો છે. માતાજીના દર્શન કરી ભક્તો ધન્યતા અનુભવી રહ્યા છે. આપને જણાવી દઈએ કે, ઉમિયા માતાજી કડવા પાટીદાર સમાજના કુળદેવી છે.
ચામુંડાના ધામમાં માનવ મેરામણ ઉમટ્યું
પૂનમના દિવસે સુરેન્દ્રનગરનાં ચોટીલામાં ચામુંડા માતાજીના દર્શન કરવા માટે માનવ મેરામણ ઉમટ્યું છે. ભક્તો ધસારાને ધ્યાનમાં રાખીને ચોટીલામાં ચુસ્ત બંદોબસ્ત ગઠવવામાં આવ્યો છે. ચોટીલા અને આસાપાસના વિસ્તારોમાં પદયાત્રીઓની સેવા માટે અનેક કેમ્પો ખોલવામાં આવ્યા છે. માઇ ભક્તોને કોઇ અગવડતા ન પહોંચે તે માટે ખાસ કેમ્પનુ આયોજન કરવામાં આવ્યું છે. શ્રદ્ધાળુઓને જમવા, આરામ કરતા તથા ચા પાણી નાસ્તો સહિતની સેવાઓ આપવામાં આવી રહી છે. મામલતદાર કચેરી અને પ્રાંત કચેરી દ્વારા ભક્તોને કોઇ અગવડતા ન પડે તેનું ખાસ ધ્યાન રાખવામાં આવી રહ્યું છે. પાણી પુરવઠા મંત્રી કુંવરજી બાવળીયા પણ આજે માતાજીના દર્શન કરવા માટે ચોટીલા પહોંચ્યા હતા. તેમણે માતાજીના ચરણોમાં શીશ નમાવી આશીર્વાદ મેળવ્યા હતા. આપને જણાવી દઈએ કે, પૂનમના દિવસે માતાજીના દર્શનનું વિશેષ મહત્વ હોય છે.
સાળંગપુરમાં ભક્તોનું ઘોડાપુર
આજે હનુમાન જયંતિની દેશભરમાં ધામધૂમથી ઉજવાણી કરવામાં આવી રહી છે. ગઈકાલ સાંજથી સાળંગપુરમાં ભક્તોની ભારે ભીડ જોવા મળી રહી છે. ગઈકાલે હનુમાન દાદાની 54 ફૂટની વિરાટકાય પ્રતિમાનું અનાવરણ કરવામાં આવ્યું છે. સાળંગપુર ધામ હવે કિંગ ઓફ સાળંગપુર તરીકે ઓળખાશે. દાદાની 54 ફૂટ ઊંચી પ્રતિમા સાથે ભક્તો સેલ્ફી લઈ રહ્યા છે. મોટી સંખ્યામાં ભક્તો ગ્રુપને સાથે રાખીને સેલ્ફી લઈ રહ્યા છે. સાળંગપુરમાં ભક્તોમાં અનેરો ઉત્સાહ જોવા મોળી રહ્યો છે.
ઝંડ હનુમાન મંદિરે ઉમટ્યું માનવ મહેરામણ
પંચમહાલના ઝંડ હનુમાન મંદિર પણ ‘પવનપુત્ર હનુમાન કી જય, જય શ્રી રામ’ના નારાથી ગુંજી રહ્યું છે. આજે હનુમાન જયંતિ નિમિત્તે ઝંડ હનુમાન ખાતે મોટી સંખ્યામાં ભક્તો ઉમટ્યા છે. ઝંડ હનુમાન પાંડવ કાળનું અતિ પૌરાણિક અને મહત્વનું ધાર્મિક સ્થાન છે. ઝંડ હનુમાન ખાતે શનિ દેવની સ્વયંભુ વિરાટ મૂર્તિના દર્શન થાય છે. આ મંદિર જાંબુઘોડાના જંગલ વિસ્તારમાં આવેલું છે.
પાવાગઢમાં માતાજીના જયઘોષથી વાતાવરણ ગુંજી ઉઠ્યુ઼ં
યાત્રાધામ પાવાગઢ ખાતે આજે ચૈત્રી પૂનમને લઇ લાખોની સંખ્યામાં ભક્તો માતાજીના દર્શન માટે આવી રહ્યા છે. વહેલી સવારે માતાજીના નિજ દ્વાર ખુલ્લો મુકતા જય માતાજીના જયઘોષ સાથે મંદિર પરિસર ગુંજી ઉઠ્યું હતું. વહેલી સવારથી ભક્તોનો પ્રવાહ ચાલું છે. વહેલી સવારથી જ મહાકાળી માતાજીના દર્શન માટે કતારો લાગી છે. ભક્તોના ધસારાને ધ્યાનમાં રાખીને લોખંડી બંદોબસ્ત ગોઠવવામાં આવ્યો છે.
