- રૂપિયાના ઘટાડા પર SBI અધ્યક્ષનું નિવેદન
- અન્ય દેશની તુલનામાં ભારતનું સારું પ્રદર્શન
- ડોલર ઇન્ડેક્સની મજબૂતીના કારણે રૂપિયો નબળો પડ્યો
રૂપિયાના ઘટાડા પર બોલતા સ્ટેટ બેંક ઓફ ઇન્ડિયાના પ્રમુખ દિનેશ ખારાએ કહ્યું કે ડોલર ઇન્ડેક્સની મજબૂતીને કારણે ભારતીય રૂપિયો અનિવાર્યપણે નબળો પડ્યો છે, પરંતુ અન્ય ઉભરતી અર્થવ્યવસ્થાઓની મુદ્રાઓની તુલનામાં તેની પકડ સારી છે. વૈશ્વિક બજારોમાં મજબૂતી અને ક્રૂડ ઓઇલના ભાવમાં ઘટાડા વચ્ચે શુક્રવારે અમેરિકન ડોલર સામે રૂપિયો 82.19 ની સપાટીએ બંધ રહ્યો હતો.
માત્ર બે દેશની કરન્સી જ સારો દેખાવ કરી રહી છે
ખારાએ કહ્યું કે ભારતીય રૂપિયો ખૂબ જ સારો દેખાવ કરી રહ્યો છે. "ફક્ત ઇન્ડોનેશિયા અને બ્રાઝિલ જ આપણા કરતા વધુ સારા છે. જે સામાન્ય રીતે કોમોડિટી આધારિત અર્થતંત્ર હોય છે. જેથી ફક્ત બે ચલણો છે જેણે આપણને પાછળ છોડી દીધા હોય. ", "રૂપિયામાં નબળાઈનું મુખ્ય કારણ મૂળભૂત રીતે ડોલર ઇન્ડેક્સની મજબૂતી છે.
SBI ના પ્રમુખે કહી આ વાત
સ્ટેટ બેંક ઓફ ઇન્ડિયાના પ્રમુખ દિનેશ ખારાએ જણાવ્યું હતું કે આંતરરાષ્ટ્રીય મુદ્રા કોષ અને વિશ્વ બેંક દ્વારા જે વૈશ્વિક મંદીની આશંકા વ્યક્ત કરવામાં આવી રહી છે, તે અન્ય દેશોની તુલનામાં ભારતમાં વધુ અસર કરશે નહીં.
ભારતનો વિકાસદર અંદાજીત 6.8 ટકા રહેશે
ખારાએ શુક્રવારે વોશિંગ્ટનમાં આંતરરાષ્ટ્રીય મુદ્રા કોષ અને વિશ્વ બેંકની વાર્ષિક બેઠક દરમિયાન આપેલા એક ઇન્ટરવ્યુમાં જણાવ્યું હતું કે, ભારત 6.8 ટકાના અંદાજિત વિકાસ દર અને ફુગાવા પર ઘણા નિયંત્રણ સાથે ઘણું સારું પ્રદર્શન કરી રહ્યું છે. "મુખ્યત્વે અહીં (ભારત) માંગની દ્રષ્ટિએ, આવક દેખાય છે , તે જીડીપીનો એક મહત્વપૂર્ણ ઘટક છે અને મૂળભૂત રીતે સ્થાનિક અર્થતંત્રની તાકાત તેના પર નિર્ભર છે. તેથી આ દ્રષ્ટિએ મને લાગે છે કે વૈશ્વિક મંદીની અસર આપણા પર પડશે, પરંતુ તે એટલી તીવ્ર નહીં હોય જેટલી તે વિશ્વની કનેક્ટેડ અર્થવ્યવસ્થાઓ માટે હશે. આનાથી ભારતીય અર્થવ્યવસ્થા પર સામાન્ય અસર પડશે.
ભારત મંદીમાં પણ સારું પ્રદર્શન કરશે
"જો આપણે બીટા પરિબળ પર નજર કરીએ, તો કદાચ ભારતીય અર્થતંત્રનું બીટા પરિબળ અન્ય કેટલાક મોટા અર્થતંત્રોની તુલનામાં ઘણું ઓછું હશે, જેની પાસે નિકાસનો નોંધપાત્ર ઘટક ઉપલબ્ધ છે. ખારાએ જણાવ્યું હતું કે, "વૈશ્વિક અર્થતંત્રની વર્તમાન સ્થિતિને ધ્યાનમાં લેતા, ભારત તેના અંદાજિત 6.8 ટકાના વિકાસ દર અને વૈશ્વિક અવરોધો છતાં ફુગાવાને 'એકદમ નિયંત્રણમાં' રાખીને વધુ સારું પ્રદર્શન કરી રહ્યું છે."
સપ્લાય ચેનમાં અસર પડી છે
એસબીઆઈના ચેરમેનના જણાવ્યા પ્રમાણે મોંઘવારીનું મુખ્ય કારણ માગ આધારિત નથી. "આ અનિવાર્યપણે સપ્લાય બાજુથી આવતો ફુગાવો છે. તેમણે કહ્યું. "જો આપણે ખરેખર ફુગાવાના પુરવઠાની બાજુ તરફ નજર કરીએ, તો આપણી પાસે એવી પરિસ્થિતિ છે કે જ્યાં ક્ષમતાનો ઉપયોગ માત્ર 71 ટકા છે. આવી સ્થિતિમાં, ક્ષમતા સુધારવા માટે પૂરતી જગ્યા ઉપલબ્ધ છે. સપ્લાય ચેઇનમાં વિક્ષેપ આવશ્યકપણે વૈશ્વિક પ્રતિકૂળતાઓને કારણે આવ્યો છે, જેના કારણે ક્રૂડ ઓઇલની કિંમતો પર પણ અસર પડી છે.
એસબીઆઈના અધ્યક્ષે કહ્યું કે એકંદરે વિશ્વભરની તમામ અર્થવ્યવસ્થાઓ કોઈને કોઈ મુશ્કેલીમાંથી પસાર થઈ રહી છે અને સરકાર આ પરિબળોને પહોંચી વળવા પર ધ્યાન કેન્દ્રિત કરી રહી છે. તેમણે કહ્યું હતું કે, આગામી સમયમાં ભારતની વૃદ્ધિની સંભાવનાઓમાં સુધારો થવાની અપેક્ષા છે.
