- મની લોન્ડરિંગ કેસમાં ફસાયેલા સત્યેન્દ્ર જૈનને લઈ મોટા સમાચાર
- કોર્ટે સ્વાસ્થ્ય મંત્રી સત્યેન્દ્ર જૈનની પત્ની પૂનમ જૈનને જામીન આપ્યા
- સત્યેન્દ્ર જૈનની જામીન અરજી પર 27 ઓગસ્ટે સુનાવણી થશે
મની લોન્ડરિંગ કેસમાં ફસાયેલા દિલ્હીના સ્વાસ્થ્ય મંત્રી સત્યેન્દ્ર જૈનને લઈ એક મોટા સમાચાર સામે આવ્યા છે. દિલ્હીની રાઉઝ એવન્યુ કોર્ટે મંગળવારે સ્વાસ્થ્ય મંત્રીની પત્ની પૂનમ જૈનને જામીન આપ્યા છે. અગાઉ પૂનમ જૈનને પણ વચગાળાના જામીન મળ્યા હતા. 20 ઓગસ્ટે કોર્ટે પૂનમ જૈનની જામીન અરજી પર ચુકાદો અનામત રાખ્યો હતો અને પૂનમ જૈનની વચગાળાની જામીન અરજીને આગામી શનિવાર સુધી લંબાવી હતી. અગાઉ 6 ઓગસ્ટના રોજ કોર્ટે આ કેસમાં પૂનમ જૈનને વચગાળાના જામીન આપ્યા હતા.
દિલ્હીના સ્વાસ્થ્ય મંત્રી સત્યેન્દ્ર જૈન હાલ મની લોન્ડરિંગ કેસમાં ફસાયેલા છે. તેવામાં આજે તેમની પત્ની પૂનમ જૈનને કોર્ટે એક લાખ રૂપિયાના જામીન પર જામીન આપ્યા છે. આ સાથે સત્યેન્દ્ર જૈનની જામીન અરજી પર 27 ઓગસ્ટે સુનાવણી થશે. મંગળવારે આ કેસમાં સત્યેન્દ્ર જૈનની ન્યાયિક કસ્ટડી પણ લંબાવવામાં આવી હતી. આ તરફ કોર્ટે મની લોન્ડરિંગ કેસમાં આરોપી અજીત અને સુનીલને નિયમિત જામીન પણ મંજૂર કર્યા છે. બીજી તરફ, આરોપી વૈભવ અને અંકુશ જૈનની જામીન અરજી પર પણ 27 ઓગસ્ટે સુનાવણી થશે.
શું છે સમગ્ર મામલો ?
આ કેસમાં 6 જૂને દરોડા પાડવામાં આવ્યા હતા ત્યારે EDએ કુલ 2.35 કરોડ રૂપિયા અને લગભગ 133 સોનાના સિક્કા જપ્ત કર્યા હતા. આ સાથે પહેલા દિલ્હી હાઈકોર્ટે પણ સત્યેન્દ્ર જૈનને મોટી રાહત આપી હતી. કોર્ટે સ્વાસ્થ્ય મંત્રી સત્યેન્દ્ર જૈનને કેબિનેટમાંથી હટાવવાની માંગ કરતી અરજીને ફગાવી દીધી હતી. અરજીમાં જણાવાયું છે કે, કસ્ટડીમાં જૈન હજુ પણ કેબિનેટ મંત્રીના લાભો અને વિશેષાધિકારોનો આનંદ માણી રહ્યા છે. જ્યારે તેની પર મની લોન્ડરિંગ કેસમાં ગંભીર આરોપ છે, જેના માટે સખત સજા થઈ શકે છે.
