- સામે છેડે રહેલા રવિન્દ્ર જાડેજા સાથે થઇ ગેરસમજ
- રન આઉટનો શિકાર બન્યો સરફરાજ
- રવિન્દ્ર જાડેજા ત્યારે 99 રન પર હતો
સરફરાઝ ખાન.. જેણે ડોમેસ્ટિક ક્રિકેટમાં ઘણા રન બનાવ્યા હતા. આખરે લાંબી રાહ જોયા બાદ તક આવી અને ટીમ ઈન્ડિયાએ સરફરાઝને ઈંગ્લેન્ડ સામે રાજકોટમાં રમાયેલી ત્રીજી ટેસ્ટમાં ડેબ્યૂ કરાવ્યું. અને પછી સરફરાઝે કેટલી શાનદાર રીતે આ તક ઝડપી લીધી. એવું લાગી રહ્યું હતું કે સરફરાઝ તેની પહેલી જ ઇનિંગમાં સદી ફટકારશે. પરંતુ પછી અચાનક કંઈક એવું બન્યું કે બધા અવાચક થઈ ગયા. માત્ર 66 બોલમાં 62 રન બનાવ્યા બાદ રમી રહેલો સરફરાઝ 99 રને બીજી તરફ બેટિંગ કરી રહેલા રવીન્દ્ર જાડેજા સાથે ગેરસમજનો શિકાર બન્યો અને અચાનક રનઆઉટ થયો હતો.
સરફરાઝ આઉટ થતાં જ સ્ટેડિયમમાં હાજર દર્શકો અને ક્રિકેટપ્રેમીઓ દંગ રહી ગયા હતા. બીજી તરફ રોહિત શર્મા માત્ર સ્તબ્ધ જ નહીં પરંતુ ગુસ્સામાં પણ હતો. ડગ આઉટમાં બેઠેલા રોહિત શર્માએ પોતાની કેપ ઉતારી અને તેને જમીન પર પછાડી દીધી. આ રનઆઉટ માટે તે રવિન્દ્ર જાડેજાથી નારાજ દેખાઈ રહ્યો હતો. રોહિતનો વીડિયો સામે આવ્યો છે.
કેપ્ટન રોહિત શર્મા અને રવીન્દ્ર જાડેજાની સદીની ઇનિંગ્સના આધારે ભારતે ઇંગ્લેન્ડ સામેની ત્રીજી ટેસ્ટ મેચના પહેલા દિવસે 5 વિકેટ ગુમાવીને 326 રન બનાવ્યા... રવીન્દ્ર જાડેજા 110 અને કુલદીપ યાદવે 1 રન બનાવીને નોટઆઉટ રહ્યા હતા. ઇંગ્લેન્ડ તરફથી ફાસ્ટ બોલર માર્ક વુડે ત્રણ વિકેટ ઝડપી હતી. રોહિત અને જાડેજાએ ચોથી વિકેટ માટે 204 રનની ભાગીદારી કરી હતી. આ શ્રેણીમાં ભારત તરફથી આ પ્રથમ સદીની ભાગીદારી છે.
ભારતે ટૉસ જીતીને પ્રથમ બેટિંગ કરવાનો નિર્ણય કર્યો હતો. ટીમની શરૂઆત સારી રહી ન હતી અને માત્ર 33 રનના સ્કોર પર 3 વિકેટ પડી ગઈ હતી. યશસ્વી જયસ્વાલ (10), શુભમન ગિલ (0) અને રજત પાટીદાર (5) સસ્તામાં પેવેલિયન પરત ફર્યા હતા. આ પછી રોહિતે નંબર-5 પર બેટિંગ કરવા આવેલા રવીન્દ્ર જાડેજા સાથે 204 રનની ભાગીદારી કરીને ભારતીય દાવને સંભાળ્યો હતો. આ બે સિવાય સરફરાઝ ખાને અડધી સદી (62 રન) ફટકારી હતી.
