- સંજુ સેમસને 38 બોલમાં અણનમ 66 રન બનાવ્યા હતા
- સંજુ સેમસન IPLમાં 300 ચોગ્ગાની ક્લબમાં સામેલ થઈ ગયો
- IPLમાં આવું કરનાર તે 22મો ખેલાડી બન્યો
IPL 2023 રાજસ્થાન રોયલ્સના કેપ્ટન સંજુ સેમસન માટે મિશ્ર સીઝન રહી છે. તેની ટીમે પણ પ્રથમ 10 મેચમાંથી પાંચમાં જીત મેળવી હતી અને પાંચમાં હારનો સામનો કરવો પડ્યો હતો. ગત સિઝનના રનર અપ આ ટીમના કેપ્ટનનું ફોર્મ છેલ્લી કેટલીક મેચોથી ચિંતાનો વિષય હતો પણ સનરાઈઝર્સ હૈદરાબાદ સામેની 11મી મેચમાં તેણે 38 બોલમાં 66 રનની ધમાકેદાર ઈનિંગ રમીને એક મોટો માઈલસ્ટોન હાંસલ કર્યો હતો. ખાસ વાત એ છે કે તેણે જે સ્થાન હાંસલ કર્યું છે તેમાં તે માસ્ટર બ્લાસ્ટર સચિન તેંડુલકર કરતા પણ આગળ છે.
હૈદરાબાદ સામેની આ ઇનિંગમાં સંજુ સેમસને 38 બોલમાં અણનમ 66 રન બનાવ્યા હતા. તેની ઇનિંગમાં ચાર ચોગ્ગા અને પાંચ છગ્ગાનો સમાવેશ થાય છે. આ સાથે સંજુ સેમસન IPLમાં 300 ચોગ્ગાની ક્લબમાં સામેલ થઈ ગયો. ગઇકાલની મેચમાં તેને તેના 300 ચોગ્ગા પૂરા કર્યા હતા. એકંદરે IPLમાં આવું કરનાર તે 22મો ખેલાડી બન્યો. આ સાથે જ આવું કરનાર 16મો ભારતીય છે. આ યાદીમાં ભારતના શિખર ધવન 739 ચોગ્ગા સાથે ટોચ પર છે. જ્યારે વિરાટ કોહલી, રોહિત શર્મા અને સુરેશ રૈના જેવા ભારતીય દિગ્ગજ ખેલાડીઓ પણ ટોપ 5માં સામેલ છે.
ખાસ વાત એ છે કે સચિન તેંડુલકર IPLમાં સૌથી વધુ ચોગ્ગાના મામલે 23માં નંબર પર છે, જેણે આ લીગમાં 295 ચોગ્ગા ફટકાર્યા હતા. મતલબ કે સંજુ આ મામલે માસ્ટર બ્લાસ્ટર કરતા આગળ છે. એ દૃષ્ટિએ રાજસ્થાન રોયલ્સના કેપ્ટન માટે આ એક મોટી ઉપલબ્ધિ હોઈ શકે છે. સંજુ સેમસને આ લીગમાં કુલ 149 મેચ રમી છે, જેમાંથી તેણે 145 ઇનિંગ્સમાં 3834 રન બનાવ્યા છે. બીજી તરફ સચિન તેંડુલકરે કુલ 78 આઈપીએલ મેચ રમી હતી જેમાં તેણે 29 સિક્સ અને 295 ફોર ફટકારી હતી.
IPL 2023 અત્યાર સુધી સેમસન માટે કેવું રહ્યું?
સંજુ સેમસને IPL 2023માં પોતાની ત્રીજી અડધી સદી ફટકારી હતી. અત્યાર સુધી તેણે 11 મેચમાં 308 રન બનાવ્યા છે. આ સિઝનમાં અત્યાર સુધીમાં તેણે 22 ફોર અને 19 સિક્સર ફટકારી છે. સમગ્ર સિઝનમાં તેનો સ્ટ્રાઈક રેટ 150થી વધુ રહ્યો છે. આ સિઝનમાં તેની એવરેજ પણ 28 રહી છે. આ ઇનિંગમાં અણનમ 66 રન તેનો સૌથી મોટો સ્કોર હતો.
