બેદરકારી / ભાવનગરમાં 22 હજાર વિદ્યાર્થીના સ્વાસ્થ્ય સાથે ચેડાં: અક્ષયપાત્રએ અખાદ્ય તેલ વાપર્યુ, છેક 2022માં લેવાયેલા સેમ્પલ મામલે હવે 10 હજારનો દંડ ફટકાર્યો

• મધ્યાહન ભોજનમાં વપરાતા ખાદ્યતેલના નમૂના ફેલ
• 22 હજાર બાળકોને પીરસતા ભોજનમાં વપરાયું અખાદ્ય તેલ
• અક્ષયપાત્ર સંસ્થાને આપવામાં આવ્યું છે મધ્યાહન ભોજનનું કામ
• અક્ષયપાત્ર સંસ્થાને રૂ. 10 હજારનો દંડ ફટકારાયો 

Bhavnagar News: ભાવનગરની શાળાઓમાં મધ્યાહન ભોજનને લઈને મોટા સમાચાર સામે આવ્યા છે. ભાવનગર મહાનગરપાલિકા સંચાલિત  57 જેટલી શાળાઓમાં મધ્યાહન ભોજનમાં વપરાતા ખાદ્યતેલના નમૂના ફેલ થતાં ખળભળાટ મચી ગયો છે. મનપાની 57 જેટલી શાળાઓમાં આશરે 22 હજાર વિદ્યાર્થીઓને પીરસાતા ભોજનમાં ભેળસેળયુક્ત તેલ વપરાયાનો ખુલાસો થયો છે. જે બાદ ભાવનગર મહાનગરપાલિકા દ્વારા અક્ષયપાત્ર સંસ્થા અને તેલ સપ્લાયર ગુજરાત અંબુજા એક્સપોર્ટ લિમિટેડ વિરુદ્ધ કાર્યવાહી કરવામાં આવી છે.

22 હજાર બાળકોના સ્વાસ્થ્ય સાથે ચેડા
ભાવનગરમાં 22 હજાર જેટલા બાળકોના સ્વાસ્થ્ય સાથે ચેડા થયા હોવાનો ખુલાસો થતાં હડકંપ મચી ગયો છે. ભાવનગર મહાનગરપાલિકા સંચાલિત 57 જેટલી શાળાઓમાં વિદ્યાર્થીઓને પીરસવામાં આવતા મધ્યાહન ભોજન બનાવવા માટે વપરાતા ખાદ્યતેલના નમૂના ફેલ થયા છે. મધ્યાહન ભોજનમાં ભેળસેળયુક્ત તેલ વપરાયાનો ખુલાસો થયો છે.

અક્ષયપાત્રને રૂ.10 હજાર અને તેલ સપ્લાયરને 1 લાખનો દંડ
મનપાની શાળાઓમાં મધ્યાહન ભોજનનું કામ અક્ષયપાત્ર નામની સંસ્થાને આપવામાં આવ્યું છે. ખાદ્યતેલના નમૂના ફેલ થયા બાદ મનપાએ અક્ષયપાત્ર સંસ્થાને રૂ.10 હજારનો દંડ ફટકાર્યો છે અને તેલ સપ્લાયરને રૂ. 1 લાખનો દંડ કરવામાં આવ્યો છે.

વર્ષ 2022માં લેવામાં આવ્યા હતા નમૂના
અહીં સૌથી ચોંકાવનારી બાબત તો એ છે કે મનપાના ફૂડ વિભાગે વર્ષ 2022માં આ શાળાઓમાંથી તેલના નમૂના લીધા હતા. આ નમૂના ફેલ ગયા બાદ છેક 1 વર્ષ અને 8 મહિના બાદ મનપાએ કાર્યવાહી કરી છે. મધ્યાહન ભોજન બનાવતી અક્ષયપાત્ર સંસ્થા અને તેલ સપ્લાયર ગુજરાત અંબુજા એક્સપોર્ટ લિમિટેડને અત્યાર સુધી કેમ છાવરવામાં આવ્યા અને આટલા સમય સુધી તેમની સામે સામે કાર્યવાહી કેમ કરવામાં ન આવી તે એક મોટો સવાલ છે. એક સાથે આટલા બધા હજારો વિદ્યાર્થીઓના સ્વાસ્થ્ય સાથે ચેડા થયા હોવા છતાં મનપાએ આ બાબતને કેમ ગંભીરતાથી ન લીધી? મહાનગરપાલિકાએ અક્ષયપાત્ર સંસ્થા અને તેલ સપ્લાયરને કેમ બચાવવાનો કર્યો પ્રયાસ? જેવા અનેક સવાલો સ્થાનિકો મુખે ચર્ચાઈ રહ્યા છે. 

સળગતા સવાલ
- હજારો બાળકોના સ્વાસ્થ્ય સાથે ચેડા કરનારને 10 હજારનો જ દંડ કેમ?
- મનપાને કાર્યવાહી કરવામાં 1 વર્ષ અને 8 મહિનાનો સમય કેમ લાગ્યો?
- શું થોડો દંડ કરીને દોષિતોને છોડી દેવા યોગ્ય છે?
- નમૂના 2022માં લીધા તો કાર્યવાહીમાં સમય કેમ?
- તેલના નમૂના ફેલ થયા છતાં અક્ષયપાત્ર વિરુદ્ધ કડક કાર્યવાહી કેમ ન કરાઈ?