- જોરદાર શતક બદલ સચિને વિરાટ કોહલીને અભિનંદન પાઠવ્યા
- જલ્દી જ મારો રેકોર્ડ તોડે તેવો આશાવાદ: સચિન
- કિંગ કોહલીએ 49 મી સદી ફટકારી સચિન તેંડુલકરના રેકોર્ડની બરાબરી કરી
વર્લ્ડ કપમાં આજે દક્ષિણ આફ્રિકા અને ભારત વચ્ચે જોરદાર જંગ ખેલાઈ રહ્યો છે. પોઇન્ટ ટેબલ પર ટોપનું સ્થાન ધરાવતી બંને ટીમ વચ્ચે આજે કોલકત્તાના ઇડન ગાર્ડન ખાતે જબરદસ્ત મુકાબલાને લઈ ચાહકોમાં અનેરો ઉત્સાહ છે ત્યારે આજે ભારતે સાઉથ આફ્રિકાને 326 રનનો મોટો ટાર્ગેટ આપ્યો હતો. આ મેચમાં ધુઆધાર બેસ્ટમેન કિંગ કોહલીએ 49 મી સદી ફટકારી સચિન તેંડુલકરના રેકોર્ડની બરાબરી કરી લીધી છે. ત્યારે આ અંગે ક્રિકેટના ભગવાન સચિને વિરાટ કોહલીને અભિનંદન પાઠવ્યા હતા અને તેમને કિંગ કોહલી જલ્દી જ મારો રેકોર્ડ તોડે તેવો આશાવાદ પણ વ્યક્ત કર્યો હતો.
વિરાટ કોહલીએ 277 ODI ઇનિંગ્સમાં 49 સદી ફટકારી
સચિન તેંડુલકરે વિરાટ કોહલીને અભિનંદન પાઠવતી એક પોસ્ટ શેર કરી હતી. તેણે ટ્વીટર X પર પોસ્ટ કરી જણાવ્યું કે, 'વિરાટ શાનદાર રીતે રમ્યો. હું આશા રાખું છું કે તે આગામી દિવસોમાં મારો રેકોર્ડ તોડીને 49 થી 50 સદી સુધી પહોંચી જશે. નોંધનિય છે કે સચિને 452 વનડે ઇનિંગ્સમાં આ સિદ્ધિ મેળવી હતી. જ્યારે વિરાટ કોહલીએ 277 ODI ઇનિંગ્સમાં 49 સદી ફટકારી જય જય કાર સર્જી દિધો છે.
બોલે પકડ અને ટર્ન લેવાનું શરૂ કર્યું
બીજી તરફ સદી ફટકાર્યા બાદ વિરાટ કોહલીએ જણાવ્યું હતું કે આ એક એવી વિકેટ હતી જ્યા રહીને બેટિંગ કરવી ખૂબ મુશ્કેલ હતી. રોહિત અને ગીલની શાનદાર શરૂઆત મળી હતી પરંતુ મારે પણ આ શરૂઆત યથાવત રાખવી હતી. કોહલીએ કહ્યું કે 10મી ઓવર પછી, બોલે પકડ અને ટર્ન લેવાનું શરૂ કર્યું હતુ. જે ધીમો થતા વિકેટ ટકાવવી તે મારી જવાબદારી બની ગઈ હતી. ટીમ મેનેજમેન્ટ તરફથી આ આદેશ હતો. શ્રેયસે પણ સારું પ્રદર્શન કરતા એક મોટા રનના ટાર્ગેટ સુધી અમે પહોંચી શક્યા ! અમે ત્રીજા અને ચોથા નંબર પર બેટિંગ કરવા ઉતરતા હોવાથી તેમની આગળ લઈ જવી તે અમારી મહત્વની જવાબદારી બની રહે છે.
હું ભગવાનનો આભારી છું : વિરાટ કોહલી
હાર્દિકની ગેરહાજરી અંગે બોલતા વિરાટ કોહલીએ જણાવ્યું હતું કે અમારી ટીમમાં હાર્દિક નથી તે માટે અમે અગાઉથી જ જાણતા હતા કે એક અથવા બે વિકેટ મોંઘી પડી શકે છે. કોહલીએ કહ્યું કે ટીમ ઇન્ડિયામાં રમવાનો અવસર આપવા માટે અને તેમની સફળતામાં યોગદાન બદલ હું ભગવાનનો આભારી છું. આ શાનદાર મેદાન પર ભારે ભીડ વચ્ચે જન્મદિવસ પર સતક ફટકારવાનો આનંદ અવર્ણીત છે.
