આગાહી / દેશમાં 5 દિવસ ગરમીથી રાહત, MP-UPથી લઈને બિહાર સુધી પડશે વરસાદ, IMDનું લેટેસ્ટ અપડેટ

• હવામાન વિભાગ દ્વારા ઉનાળાની ગરમીથી પરેશાન લોકો માટે સારા સમાચાર
• આગામી પાંચ દિવસ સુધી દેશના વિવિધ ભાગોમાં વરસાદ જોવા મળશે: IMD 
• ઘણા ભાગોમાં મહત્તમ તાપમાન 45ની નજીક પહોંચી ગયું હતું
• હવે વરસાદની આગાહીથી ગરમીમાંથી રાહત મળવાની સંભાવના

હવામાન વિભાગ દ્વારા ઉનાળાની ગરમીથી પરેશાન લોકો માટે સારા સમાચાર આપ્યા છે. વાત જાણે એમ છે કે, IMDએ તેના લેટેસ્ટ બુલેટિનમાં કહ્યું છે કે, આગામી પાંચ દિવસ સુધી દેશના વિવિધ ભાગોમાં વરસાદ જોવા મળશે. જુદા જુદા ભાગોમાં વરસાદની ચેતવણી આપવામાં આવી છે, જેના કારણે ગરમીમાંથી રાહત મળવાની સંભાવના છે. છેલ્લા કેટલાક દિવસોમાં દેશના ઘણા ભાગોમાં મહત્તમ તાપમાન 45ની નજીક પહોંચી ગયું હતું. પરંતુ હાલમાં મહત્તમ તાપમાન સરેરાશથી નીચે રહેવાની શક્યતા છે.

IMD અનુસાર દેશના કોઈપણ ભાગમાં હીટ વેવની કોઈ શક્યતા નથી. રાજધાની દિલ્હીના હવામાનની વાત કરીએ તો આખા સપ્તાહમાં વધુ ઝરમર વરસાદ પડવાની શક્યતા છે. જેના કારણે તાપમાનમાં ઘટાડો જોવા મળશે. ખાસ કરીને સવાર અને સાંજનું વાતાવરણ હાલ પૂરતું ખુશનુમા રહેશે. બીજી તરફ બુધવારે દિલ્હીનું મહત્તમ અને લઘુત્તમ તાપમાન સામાન્ય કરતા ઓછું નોંધાયું હતું. ગુરુવારે દિલ્હીના વિવિધ ભાગોમાં તેજ પવન સાથે ઝરમર વરસાદ પડી શકે છે. આ દરમિયાન પવનની ઝડપ 25 થી 35 કિલોમીટર પ્રતિ કલાકની રહી શકે છે.

બિહારના કેવી છે હવામાનની સ્થિતિ ? 
હાલમાં બિહારમાં ખૂબ જ ગરમ વાતાવરણ છે. પરંતુ હવે આ ગરમીમાંથી થોડી રાહત મળવાની છે. 29 અને 30 એપ્રિલથી તાપમાનમાં ઘટાડો થવાનો છે. આ દરમિયાન વાવાઝોડા અને વરસાદને લઈને 19 જિલ્લાઓ માટે યલો એલર્ટ જાહેર કરવામાં આવ્યું છે. પટના, ગયા, નાલંદા, નવાદા, શેખપુરા, રોહતાસ, બક્સર અને અન્ય જિલ્લાઓમાં વાવાઝોડા, વરસાદ અને તેજ પવનને લઈને યલો એલર્ટ જાહેર કરવામાં આવ્યું છે.

યુપીમાં થશે રાહતનો વરસાદ 
ઉત્તર પ્રદેશના હવામાનની વાત કરીએ તો અહીં હવામાનમાં બદલાવની પ્રક્રિયા ચાલી રહી છે. પ્રાદેશિક હવામાન કેન્દ્રના જણાવ્યા અનુસાર આ સપ્તાહથી મેના પ્રથમ સપ્તાહ સુધી લોકોને ગરમીથી રાહત મળવાની છે. હાલમાં અહીં હીટવેવની કોઈ શક્યતા નથી. બાદલ 28 એપ્રિલથી યુપીમાં ફરી એકવાર સક્રિય થવા જઈ રહ્યા છે. 29 અને 30 એપ્રિલે વરસાદની સંભાવના છે. જેના કારણે અહીં તાપમાનમાં ફેરફાર જોવા મળશે.

અન્ય રાજ્યોમાં કેવી છે સ્થિતિ ? 
હવામાન વિભાગે બુધવારે કહ્યું હતું કે, આગામી પાંચ દિવસ દરમિયાન મધ્યપ્રદેશ, વિદર્ભ, છત્તીસગઢમાં હળવાથી મધ્યમ વરસાદની સંભાવના છે. મધ્યપ્રદેશમાં બુધવારે સાંજથી તેની અસર દેખાવા લાગી. રાજધાની ભોપાલ સહિત રાજ્યના ઘણા ભાગોમાં ભારે વરસાદ થયો હતો. આ સાથે IMDએ આ ત્રણ સ્થળોએ કરા પડવાની ચેતવણી પણ જાહેર કરી છે. આ સિવાય આંધ્રપ્રદેશ, તેલંગાણા, કર્ણાટક, તમિલનાડુ, પુડુચેરી, કરાઈકલ, કેરળ અને માહેમાં પાંચ દિવસમાં હળવા વરસાદની શક્યતા છે. કેરળની વાત કરીએ તો અહીં 30 સુધી ભારે વરસાદની આગાહી કરવામાં આવી છે.