- સહદેવસિંહ જાડેજા અને પૂર્વ ધારાસભ્ય જયરાજસિંહ જાડેજા વચ્ચે સમાધાન
- ભુણાવા ગામના ક્ષત્રિય સમાજના આગેવાનોનું પણ સમાધાન
- રિબડાના અનિરૂદ્ધસિંહ જાડેજા અને જયરાજસિંહ જાડેજા વચ્ચે જૂથવાદ યથાવત
ગોંડલના પૂર્વ ધારાસભ્ય જયરાજસિંહ અને જિલ્લા પંચાયતના કારોબારી ચેરમેન સહદેવસિંહ જાડેજા એક થયા બાદ ગોંડલમાં સમાધાનનો દોર યથાવત છે. સહદેવસિંહ બાદ ભુણાવા ગામના ક્ષત્રિય સમાજના આગેવાનોનું પણ સમાધાન થયું છે.
ભુણાવા ગામના ક્ષત્રિય સમાજના આગેવાનોનું પણ સમાધાન
ગોંડલમાં ક્ષત્રિય આગેવાનો વચ્ચે જૂથવાદનો મામલો વિધાનસભાની ચૂંટણી વખતે જોરદાર ગરમાયો હતો. ત્યારે હવે જયરાજસિંહ જાડેજા અને સહદેવસિંહ જૂથ વચ્ચે સમાધાન થયું છે. તમને જણાવી દઈએ કે, રાજકોટ જિલ્લા પંચાયતના કારોબારી ચેરમેન સહદેવસિંહ છે. ચૂંટણી સમય બંન્ને ક્ષત્રિય જૂથ વચ્ચે તંજ ખેચાયા હતા પરંતુ જે બાદ જયરાજસિંહ અને સહદેવસિંહના વલણ ધીમા પડતા એકબીજાનું સમાધાન થયું હતું. તેમના સમાધાન બાદ ભુણાવા ગામના ક્ષત્રિય સમાજના આગેવાનોનું પણ સમાધાન થયું છે. જોકે, રીબડા અનિરૂદ્ધસિંહ જાડેજા અને પૂર્વ ધારાસભ્ય જયરાજસિંહ જાડેજા વચ્ચે જૂથવાદ યથાવત છે.
અનિરુદ્ધસિંહ જાડેજા અને જયરાજસિંહ જાડેજા સામ-સામે
રાજકોટના ગોંડલ બેઠક પર વિધાનસભાની ચૂંટણીને લઈ માહોલ ગરમાયો હતો અને ક્ષત્રિય આગેવાનોમાં જૂથવાદ ચરમસીમાએ પહોંચી ગયો હતો. ગોંડલમાં ભાજપની ટિકિટ મુદ્દે મહારમખાણ સર્જાયું હતું અને જયરાજસિંહ જુથ અને અનિરુદ્ધસિંહ જુથ વચ્ચે ખુલ્લેઆમ ધમકીઓનો દોર શરૂ થઈ ગયો હતો. ચૂંટણી પહેલા રીબડા જૂથે રાજદીપસિંહ જાડેજા, સહદેવસિંહ અને જયંતિ ઢોલ માટે ટિકિટ માગી હતી, જેની સામે જયરાજસિંહે તેમના દીકરા અને પત્ની માટે ટિકિટની દાવેદારી કરી હતી.
ભાજપે ગીતાબાને કર્યા હતા રિપીટ
આ મામલે વિવાદ વકર્યા બાદ બાદ સહદેવસિંહ જાડેજાને ક્ષત્રિય સમાજના પ્રમુખ પદેથી હટાવતા રાજકારણ ગરમાયું હતું. ભાજપે જયરાજસિંહ જૂથ પર ભરોસો યથાવત રાખ્યો હતો અને જયરાજસિંહ પત્ની ગીતાબા જાડેજાને ફરી ટિકિટ આપી હતી. જે બાદ વિધાનસભાની ચૂંટણીમાં જંગી બહુમતીથી ગોંડલ બેઠક પરથી ગીતાબા જાડેજાનો વિજય થયો હતો.
જયરાજસિંહ-સહદેવસિંહ વચ્ચે સમાધાન
ચૂંટણીના પરિણામ બાદ જયરાજસિંહ જૂથે અને સહદેવસિંહ જૂથે એકબીજા સાથે સમાધાન કરી લીધું હતું. આ સમાધાનથી રિબડા જૂથને પણ મોટો ફટકો પડ્યો હોય તેવી ચર્ચાઓએ જોર પકડયું છે.
