જળબંબાકાર / VIDEO: ત્રણ દિવસ સુધી ગાંડીતૂર નદીની વચ્ચે મોત સામે લડતા રહ્યા વૃદ્ધ, આખરે બચાવી લેવાયો જીવ: વલસાડમાં ભારે વરસાદથી આવી આફત

 

• વલસાડ જિલ્લામાં ધોધમાર વરસાદ
• હનુમાન ભાગડાનું તળાવ ઓવરફ્લો
• રાંધા અને કૌચાને જોડતા કોઝવે પર પાણી
• પાર નદીના ટાપુ પર ફસાયેલા વૃદ્ધનું રેસ્ક્યૂ

હવામાન વિભાગની આગાહીને પગલે ગુજરાતમાં ખાસ કરીને સૌરાષ્ટ્ર અને દક્ષિણ ગુજરાતના ઘણા વિસ્તારોમાં ભારે વરસાદ પડી રહ્યો છે. આજે વહેલી સવારથી દક્ષિણ ગુજરાતના સુરત, વલસાડ, ભરુચ, નર્મદા, નવસારી વરસાદ વરસી રહ્યો છે. ભારે વરસાદને પગલે રસ્તાઓ પર વરસાદી પાણી ફરી વળ્યા છે. જેના કારણે રસ્તાઓ બેટમાં ફેરવાઈ ગયા છે. કેટલાક ગામો સંપર્ક વિહોણા બન્યા છે. ભારે વરસાદના કારણે નદીઓ બે કાંઠે વહેતી થઈ છે. ડેમમાં પણ વરસાદી પાણીની આવક થઈ છે. 

હનુમાન ભાગડાનું તળાવ ઓવરફ્લો
વલસાડ જિલ્લામાં ધોધમાર વરસાદના કારણે હનુમાન ભાગડાનું તળાવ ઓવરફ્લો થયું છે. તળાવ કિનારે આવેલા ગામમાં પાણી ફરાઈ ગયા છે. તો તળાવ ઓવરફ્લો થતાં આસપાસના વિસ્તારના લોકો મુશ્કેલીમાં મુકાયા છે. 

તુલસી નદીના પાણી કોઝવે પર ફરી વળ્યા 
વલસાડના કપરાડા અને ધરમપુરમાં ધોધમાર વરસાદના કારણે લો લેવલના કોઝવે પર વરસાદી પાણી ફરી વળ્યાં છે. રાંધા અને કૌચાને જોડતા કોઝવે પર તુલસી નદીના પાણી ફરી વળ્યા છે. કોઝવે પર પાણી આવતાં બંને તરફના ગામના લોકો મુશ્કેલીમાં મુકાયા છે. લોકો જીવના જોખમે કોઝવે પસાર કરતા જોવા મળી રહ્યા છે. 

સુરત જિલ્લામાં પણ ધોધમાર વરસાદ
વલસાડ ઉપરાંત સુરત શહેર સાથે સમગ્ર જિલ્લામાં પણ ધોધમાર વરસાદ વરસી રહ્યો છે ભારે વરસાદના કારણે સ્ટેટ હાઈવે પર ઘૂંટણસમાં પાણી ભરાયા છે. આ તરફ સુરતના કીમ-માંડવી સ્ટેટ હાઈવે પર જ્યાં જુઓ ત્યાં પાણી જ પાણી દેખાઈ રહ્યું છે. આ સાથે કીમ ચાર રસ્તા પર પણ વરસાદી પાણી ફરી વળ્યાં છે. જેના કારણે ટ્રાફિકજામના દ્રશ્યો સર્જાયા છે. આ સાથે શોપિંગ સેન્ટરમાં પણ પાણી ભરાતા ભારે નુકસાન થયું છે. નોંધનીય છે કે, તંત્રની ઉદાસીનતાને કારણે દર વર્ષે હાઈવે પર પાણી ભરાય છે. વરસાદી પાણીના નિકાલ માટે વ્યવસ્થા કરવામાં તંત્ર નિષ્ફળ હોવી સ્થિતિ બની છે. 

પાર નદીના ટાપુ પર ફસાયેલા વૃદ્ધને બચાવી લેવાયા
વલસાડના પારડી નજીક પાર નદીના ટાપુ પર ફસાયેલા વૃદ્ધને બચાવી લેવામાં આવ્યા છે. માછલી પકડવા ટાપુ પર ગયેલા વૃદ્ધ છેલ્લા ત્રણ દિવસથી ટાપુ પર ફસાયા હતા. જેની જાણ થતાં જ માંગેલા ગ્રુપના તરવૈયાઓ જોખમ ખેડીને પાર નદીના ટાપુ પર ફસાયેલા વૃદ્ધને બચાવવા પહોંચ્યા હતા. હોડી લઈને ગયેલા માંગેલા ગ્રુપના તરવૈયાઓ વૃક્ષને સુરક્ષિત રીતે નદી કિનારે લઈને આવ્યા હતા. આ દરમિયાન પારડી મામલતદાર સહિતના અધિકારીઓ પણ નદી કિનારે હાજર રહ્યા હતા.