દુર્ઘટના / વડોદરા એક્સપ્રેસ વે પર ખાનગી ટ્રાવેલ્સની લક્ઝરી બસમાં લાગી ભીષણ આગ, મુસાફરો સાથે જુઓ શું બન્યું

• અમદાવાદ વડોદરા એક્સપ્રેસ વે પરની ઘટના
• બસમાં આગ લાગતા હાઈવે પર દોડધામ મચી
• સુરતમાં પણ બસ સળગવાની દુર્ઘટના બની હતી

અમદાવાદ વડોદરા એક્સપ્રેસ વે પરની ઘટના

વધુ એકવાર ખાનગી લક્ઝરી બસમાં આગ લાગવાની ઘટના સામે આવી છે. અમદાવાદ-વડોદરા એક્સપ્રેસ હાઇવે પર ખાનગી ટ્રાવેલ્સની લક્ઝરી બસ ભડકે બળી હતી. અચાનક આગ લાગતા અફરાતફરીના દૃશ્યો સર્જાયા હતા. ત્યારે બસમાં સવાર તમામ મુસાફરોને બચાવી લેવામાં આવ્યા છે. મહત્વનું છે કે, આગ લાગવાનું કારણ જાણી શકાયું નથી. આ ઘટનાની જાણ થતા જ પોલીસ કાફલો ઘટનાસ્થળે પહોંચ્યો હતો અને તપાસ હાથ ધરી હતી.

બસમાં આગ લાગતા હાઈવે પર દોડધામ મચી

સુત્રોના જણાવ્યા અનુસાર આ બસ અમદાવાદથી બોમ્બે જતી હતી. ત્યારે અચાનક જ બસમાં આગ લાગતાં ભારે દોડધામ મચી ગઈ હતી. મહત્વનું છે કે, બસમાં સવાર તમામ મુસાફરોનો આબાદ બચાવ થયો છે. ઉલ્લેખનીય છે કે, બસ સળગતા જ બસચાલક બસ મૂકીને ફરાર થઈ ગયો હતો. આ પહેલાં સુરતમાં પણ ખાનગી ટ્રાવેલ્સની બસમાં આગ લાગવાની ઘટના બની હતી. જેમાં એક યુવતીનું મોત નીપજ્યું હતું.

સુરતમાં પણ બસ સળગવાની દુર્ઘટના બની હતી

ઉલ્લેખનીય છે કે,  તાજેતરમાં  સુરતના હીરાબાગ પાસે   ભાવનગર જવા નીકળેલી બસમાં આગ લાગતાં જ એસીનું કોમ્પ્રેસર ધડાકાભેર ફાટ્યું હતું. જેને કારણે આગ વધુ વિકરાળ બની હતી. બસમાં જમણી બાજુ ડબલ સીટ કેબિનમાં બેઠેલા યુગલમાંથી યુવક તો બહાર નીકળી ગયો હતો, પરંતુ મહિલા ત્યાં જ ફસાઈ જતાં તે જીવતી સળગી ગઈ હતી. બાદમાં લકઝરી સેવાને કારણે જ શોર્ટસર્કિટ થયું હોવાનું પ્રાથમિક તપાસમાં જણાઈ આવ્યું છે. આગ લાગ્યા બાદ તરત જ બસના પાછળના ભાગે બ્લાસ્ટ થયો હતો.