- ભારતીય ક્રિકેટર પૃથ્વી શૉને મોટી રાહત
- સપના ગિલે લગાવેલ શોષણના આરોપ તદ્દન ખોટા
- 28 જૂને થશે વધુ સુનાવણી
ભારતીય ક્રિકેટર પૃથ્વી શૉને મોટી રાહત મળી છે. સોશિયલ મીડિયા ઈન્ફ્લુઅન્સર સપના ગિલે લગાવેલ આરોપોને મુંબઈ પોલીસે નકારી દીધા છે. સોમવારે પોલીસે મુંબઈની અંધેરી કોર્ટમાં મેજિસ્ટ્રેટ સામે નિવેદન આપ્યું હતું, જેમા જણાવ્યું હતું કે, ભારતીય ક્રિકેટર પર સપના ગિલે લગાવેલ શોષણના આરોપ તદ્દન ખોટા છે. સપના ગિલે 15 ફેબ્રુઆરીના રોજ પૃથ્વી શૉ પર પબમાં શોષણ કરવાનો આરોપ લગાવ્યો હતો.
મુંબઈ પોલીસે પોલીસ ફરિયાદ લેવાની ના પાડતા સપના ગિલે અંધેરી મેજિસ્ટ્રેટ કોર્ટનો દરવાજો ખખડાવ્યો હતો. સપનાના વકીલ અલી કાશિફ ખાને અંધેરી કોર્ટમાં FIR દાખલ કરવા માટે અરજી નાખી હતી, ત્યારપછી મેજિસ્ટ્રેટે આ સમગ્ર મામલે રિપોર્ટ રજૂ કરવા માટે પોલીસને આદેશ આપ્યો હતો.
કોર્ટમાં પૃથ્વી શૉ અને સપના ગિલનો મામલો
પોલીસે CCTV ફૂટેજના આધાર પર કોર્ટમાં નિવેદન આપ્યું છે કે, ઘટનાસ્થળ પર જે પણ સાક્ષી હતા, તેમાંથી કોઈએ પણ પૃથ્વી શૉને સપના ગિલનું શોષણ કરતા જોયા નથી. સાક્ષીમાં CISF સ્ટાફ પણ હતો. તેઓ જણાવે છે કે, સપના ગિલ જ પૃથ્વી શૉ સાથે ખોટું વર્તન કરી રહી હતી.
પોલીસે આપેલ રિપોર્ટ અનુસાર સપના ગિલના વકીલે કોર્ટને તે વિડીયો ફૂટેજ જણાવવા માટે આગ્રહ કર્યો હતો. સપના ગિલની એક મિત્રએ જ આ વિડીયો ફોનમાં રેકોર્ડ કર્યો હતો. આ વિડીયો વાયરલ પણ થયો હતો. કોર્ટે પોલીસને સમગ્ર ઘટનાનો વિડીયો દર્શાવવા માટે કહ્યું છે. 28 જૂન સુધી આ મામલાને સ્થગિત કરવામાં આવ્યો છે. આ મામલે વધુ સુનાવણી 28 જૂનના રોજ કરવામાં આવશે.
આ ધારાઓ હેઠળ પૃથ્વી શૉ સામે ફરિયાદ
સપના ગિલે ક્રિકેટર પૃથ્વી શૉ સામે ઈન્ડિયન પેનલ કોડની અનેક ધારાઓ હેઠળ ફરિયાદ નોંધાવી હતી. પૃથ્વી શૉ પર ધારા 364, ધારા 509 અને ધારા 324 હેઠળ ફરિયાદ કરવામાં આવી હતી. પૃથ્વી શૉની સાથે તેના મિત્ર આશીષ યાદવનું પણ નામ હતું. સપના ગિલએ આરોપ મુક્યો હતો કે, આશીષ યાદવે તેને બેટથી માર્યું હતું. પોલીસે ફરિયાદના આધારે સુનાવણી ના કરતા સપના ગિલે કોર્ટનો દરવાજો ખખડાવ્યો હતો.
