કવાયત / ગુજરાતમાં ફરી સી-પ્લેન શરૂ કરવાની તૈયારી: તંત્રએ લીધો મોટો નિર્ણય, જાણો કેટલા રૂપિયાની હોઈ શકે ટિકિટ

• ફરીથી સી-પ્લેન શરૂ કરવા તજવીજ હાથ ધરાઈ
• રિવરફ્રંટથી SOU સી-પ્લેન સર્વિસ માટે ટેન્ડર મંગાવાયા
• સી-પ્લેન સર્વિસ ટેન્ડરમાં કેટલી શરતોનો ઉમેરો કરાયો

ગુજરાતમાં ફરી એકવાર સી-પ્લેનને લઈ એક મોટા સમાચાર સામે આવ્યા છે. વાત જાણે એમ છે કે, રાજ્યમાં ફરી સી-પ્લેન સેવા શરૂ કરવા તંત્ર દ્વારા તજવીજ શરૂ કરાઇ છે. પ્રાથમિક વિગતો મુજબ રિવરફ્રન્ટથી SOU સુધી સી-પ્લેન સર્વિસ માટે ટેન્ડર મંગાવાયા છે. મહત્વનું છે કે, સી-પ્લેન સર્વિસ ટેન્ડરમાં અમુક શરતો ઉમેરવામાં આવી છે.  

ગુજરાત સ્ટેટ એવિએશન ઈન્ફ્રાસ્ટ્રક્ચર કંપની લિમીટેટ દ્વારા સી પ્લેન સર્વિસ શરૂ કરવા માટે ટેન્ડર પ્રક્રિયા શરૂ કરાઇ છે. માહિતી મુજબ આ ટેન્ડર જમા કરાવવા માટેની અંતિમ તારીખ 26 જૂન છે. તો વળી આ વખતે ટેન્ડરમાં નવી શરતોનો ઉમેરો કરવામાં આવ્યો છે. જેમાં પ્રથમ શરત સી પ્લેનનું એરક્રાફ્ટ 12વર્ષથી વધુ જૂનું હોવું જોઇએ નહીં તેની છે. આ સાથે પાયલોટ પાસે સી પ્લેન ઉડાડવાનો ઓછામાં ઓછો 500 કલાકનો અનુભવ પણ જરૂરી કરાયો છે.

નવા સી-પ્લેન સર્વિસમાં કયા નિયમો 
ગુજરાત સ્ટેટ એવિએશન ઈન્ફ્રાસ્ટ્રક્ચર કંપની લિમીટેટ દ્વારા સી પ્લેન સર્વિસ શરૂ કરવા માટે ટેન્ડર પ્રક્રિયામાં આ વખતે અનેક ફેરફાર કરવામાં આવ્યા છે. જે મુજબ અમદાવાદથી કેવડિયા વચ્ચે દિવસની ચાર ટ્રિપ કરવાની રહેશે, મહિનાની 100 ટ્રિપ થવી જોઇએ. નવી શરતમાં એરક્રાફ્ટ 12થી જૂનું ન હોવાનો ઉલ્લેખ, એરક્રાફ્ટ 9થી 19 સીટરનુ હોવું જોઈએ, પાયલોટને સી-પ્લેનનો 500 કલાકનો અનુભવ જરૂરી કરાયો છે. આ સાથે સી-પ્લેનની વધુમાં વધુ 5 હજાર રૂપિયા ટિકિટ રાખી શકાશે. 

2021 થી બંધ છે સી-પ્લેન સર્વિસ
વિગતો મુજબ સી પ્લેન સર્વિસ 2021 થી બંધ છે. જોકે હવે અચાનક તંત્ર દ્વારા આ અંગે ફરી એકવાર કવાયત શરૂ કરી છે. જેને લઈ હવે અમદાવાદના સાબરમતી રિવરફ્રન્ટથી સ્ટેચ્યુ ઓફ યુનિટીની સી પ્લેન સર્વિસ માટે ટેન્ડર મગાવવામાં આવ્યા છે.વિગતો મુજબ તો આ વર્ષે ઓક્ટોબર સુધીમાં સી પ્લેન સર્વિસ ફરી શરૂ કરવાનો દાવો કરવામાં આવી રહ્યો છે.