VTV રિયાલિટી ચેક / ગુજરાતનાં DGPના આદેશનું ઉલ્લંઘન કરતાં ઝડપાયા પોલીસ જવાનો: વાહનો પર બ્લેક ફિલ્મ-પોલીસની નેમપ્લેટ, જુઓ VTVનું રિયાલિટી ચેક

• વડોદરામાં DGPના પરિપત્રનો ઉલાળિયો 
• પોલીસ ભવનમાં VTV ન્યૂઝનું રિયાલિટી ચેક 
• વાહનો પર 'P' કે 'POLICE' લખેલું જોવા મળ્યું 

Vadodra News: ગુજરાતમાં કેટલાક પોલીસકર્મીઓ પોતે જ ટ્રાફિકના નિયોમોનું પાલન ન કરતા હોવાનું ધ્યાને આવતા ડીજીપી વિકાસ સહાયે એક પરિપત્ર બહાર પાડ્યો છે. જેમાં પોલીસકર્મીઓને પોતાના વાહન પર પોલીસ લખેલા લખાણ દૂર કરવાની અને ગાડીઓના કાળા કાચ દૂર કરવાની સૂચના આપવામાં આવી છે. સાથે જ પોલીસકર્મીઓને ફરજિયાત ટ્રાફિકના નિયમોનું પાલન કરવાનો આદેશ આપ્યો છે. ત્યારે આજે VTV ન્યૂઝના રિયાલિટી ચેકમાં વડોદરા પોલીસ ભવનમાં જ DGPના પરિપત્રનું ઉલ્લંઘન થતું જોવા મળ્યું. 

VTV ન્યૂઝની ટીમ પહોંચી પોલીસ ભવન ખાતે
VTV ન્યૂઝે પરિપત્રના પાલન મુદ્દે વડોદરામાં રિપાલિટી ચેક કર્યું હતું, VTV ન્યૂઝની ટીમ વડોદરા શહેરમાં પોલીસ ભવન ખાતે પહોંચી હતી. જ્યાં પોલીસકર્મીઓની ગાડીમાં કાળા કાંચ જોવા મળ્યા હતા અને પોલીસકર્મીઓના વાહન પર પોલીસ લખેલુ જોવા મળ્યું હતું.

વાહનો પર 'POLICE' લખેલું જોવા મળ્યું 
VTV ન્યૂઝના રિયાલિટી ચેકમાં વડોદરામાં પોલીસકર્મીઓના વાહનો પર 'P' અથવા 'POLICE' લખેલું જોવા મળ્યું હતું. તો કેટલીક કારમાં ડાર્ક ફિલ્મ પણ લગાવેલી જોવા મળી હતી. ટુ વ્હીલર પર મોટાભાગે પોલીસનું લખાણ જોવા મળ્યું હતું. પોલીસ જવાનોએ હજી સુધી DGPના પરિપત્રનું પાલન કર્યું નથી, ત્યારે સવાલ એ ઉભો થાય છે કે ટ્રાફિક પોલીસ ક્યારે કરાવશે DGPના પરિપત્રનું પાલન?

પોલીસ ભવનમાં જ DGPના પરિપત્રનું ઉલ્લંઘન 
આપને જણાવી દઈએ કે, રાજ્યના પોલીસ વડાએ પરિપત્ર જાહેર કરીને તમામ પોલીસ સ્ટેશનના અધિકારીઓને તેમના તાબામાં આવતાં પોલીસ કર્મચારીને ટ્રાફિકના નિયમોનું પાલન કરવાની સૂચના આપવા જણાવ્યું છે. જોકે, વડોદરાના પોલીસ ભવનમાં જ DGPના પરિપત્રનું ઉલ્લંઘન થયેલું જોવા મળ્યું.  

પરિપત્રમાં શું જણાવ્યું છે?
- ટ્રાફિકના કર્મચારીઓએ ટ્રાફિકની ફરજ દરમિયાન લાઇટ બેટન તથા બોડી રિફ્લેક્ટર અવશ્ય પહેરવાના રહેશે.
- પોલીસ અધિકારી અને કર્મચારીઓએ પોતે જ્યારે યુનિફોર્મમાં હોય ત્યારે યુનિફોર્મની ગરિમા જળવાઇ તે રીતે ફરજ બજાવવી જોઇએ. જ્યારે યુનિફોર્મમાં ફોર-વ્હીલર લઈને જતા હોય ત્યારે હંમેશાં સીટ બેલ્ટ લગાવવો જોઇએ.
- પોલીસ અધિકારી અને કર્મચારીઓએ પોતે જ્યારે યુનિફોર્મમાં ફરજ ઉપર જતા હોય ત્યારે ટુ-વ્હીલ૨ ઉપ૨ ત્રણ સવારીમાં નહીં જવા સૂચના
- યુનિફોર્મમાં ફોર-વ્હીલર લઈને જતા હોય ત્યારે હંમેશાં સીટ બેલ્ટ લગાવવો જોઇએ, ટુ-વ્હીલર લઈને જતા હોય ત્યારે હેલ્મેટ પહેરીને જ ડ્રાઇવિંગ કરવા સૂચના અપાઈ છે
- ટૂ-વ્હીલ૨ અને ફોર-વ્હીલરમાં P, Police, કે રાષ્ટ્રીય ચિહ્ન લોગોવાળી નેઇમ પ્લેટો લગાવેલી હોય છે, જે ન હોવી જોઇએ.