- વડોદરા શહેરને મળ્યા નવા મેયર
- મેયર તરીકે પિન્કીબેન સોનીનું નામ જાહેર
- ડેપ્યુટી મેયર તરીકે ચિરાગ બારોટનું નામ જાહેર
- સ્ટેન્ડિંગ કમિટીના ચેરમેન તરીકે શિતલ મિસ્ત્રી
- પક્ષના નેતા તરીકે મનોજ પટેલનું નામ જાહેર
Vadodara News: વડોદરા મહાનગરપાલિકાના હોદ્દેદારોના નામ જાહેર કરવામાં આવ્યા છે. જેમાં મેયર તરીકે પિન્કીબેન સોનીનું નામ જાહેર કરવામાં આવ્યું છે. જ્યારે ડેપ્યુટી મેયર તરીકે ચિરાગ બારોટનું નામ જાહેર કરવામાં આવ્યું છે. તમામ હોદ્દેદારોનો કાર્યકાળ અઢી વર્ષ સુધીનો રહેશે. વડોદરા શહેર ભાજપ પ્રભારી ગોરધન ઝડફિયા આજે ભાજપ કાર્યલય ખાતે મેન્ડેટ લઈને પહોંચ્યા હતા, જ્યાં સૌથી પહેલા તેઓની શહેર ભાજપ પ્રમુખ ડૉ.વિજય શાહ સાથે બંધ બારણે બેઠક યોજાઈ હતી. આ બેઠક પૂર્ણ થયા બાદ નામોની જાહેરાત કરાઈ છે.
સ્ટેન્ડિંગ કમિટીના ચેરમેન કોને બનાવાયા?
વડોદરા મનપાના સ્ટેન્ડિંગ કમિટીના ચેરમેન તરીકે શીતલ મિસ્ત્રીની વરણી કરવામાં આવી છે. તો શાસકપક્ષના નેતા તરીકે મનોજ પટેલ અને દંડક તરીકે શૈલેષ પાટીલના નામની જાહેરાત કરવામાં આવી છે. પિન્કીબેન સોની વડોદરાના 61મા અને ચોથા મહિલા મેયર બન્યા છે.
પિન્કીબેને પાર્ટીનો માન્યો આભાર
મેયર તરીકે પિન્કીબેનનું નામ જાહેર થતાં જ તેઓ VTV સાથેની વાતચીતમાં પાર્ટીનો આભાર માન્યો હતો. પિન્કીબેને કહ્યું કે, 'મને આ જવાબદારી સોંપવા બદલ હું પાર્ટીનો આભાર માનું છું. હું વડોદરાના વિકાસ અને લોકકલ્યાણના કાર્યને વેગ આપીશ.'
હાથ ધરાઈ હતી સેન્સ પ્રક્રિયા
તાજેતરમાં જ વડોદરાના સંયાજીગંજ વિસ્તારમાં આવેલા ભાજપ કાર્યાલય ખાતે પૂર્વ સાંસદ દિપક સાથી, ધારાસભ્ય રાકેશ શાહ અને ખેડા જિલ્લા પંચાયતના પ્રમુખ નયનાબેન પટેલ દ્વારા સેન્સ પ્રક્રિયા હાથ ધરવામાં આવી હતી. જેમાં મેયર, ડેપ્યુટી મેયર અને સ્ટેન્ડિંગ કમિટીના ચેરમેન માટે કોર્પોરેટરો, પ્રભારીઓના અભિપ્રાયો લેવામાં આવ્યા હતા.
ગાંધીનગર ખાતે યોજાઈ હતી પાર્લામેન્ટરી બોર્ડની બેઠક
ત્યારબાદ ગાંધીનગર ખાતે મુખ્યમંત્રીના નિવાસસ્થાને પણ પાર્લામેન્ટરી બોર્ડની બેઠક યોજાઈ હતી, જેમાં સાંસદ સભ્ય, ધારાસભ્યો અને પક્ષના અગ્રણીઓએ પોતપોતાના માનિતા કોર્પોરેટરના નામો રજૂ કર્યા હતા. પાર્લામેન્ટ્રી બોર્ડની બેઠક બાદ પ્રદેશ મોવડી મંડળે પાંચ હોદ્દા માટે પાંચ કોર્પોરેટરની યાદી તૈયાર કરી ગુપ્ત કવર વડોદરા શહેરના પ્રભારી ગોરધન ઝડફિયાને સુપ્રત કર્યું હતું.
