આનંદો / પેટ્રોલ અને ડીઝલના ભાવમાં એક ઝાટકે આટલા રૂપિયાની રાહત આપવાની તૈયારીમાં મોદી સરકાર, લોકોને મળશે ન્યૂયરની ગિફ્ટ!

• કેન્દ્ર સરકાર લોકોને આપશે નવા વર્ષની શાનદાર ભેટ
• પેટ્રોલ અને ડીઝલના ભાવમાં ટૂંક સમયમાં થઈ શકે છે ઘટાડો 
• પેટ્રોલ અને ડીઝલના ભાવ ઘટાડવા સરકારે તૈયાર કર્યો ડ્રાફ્ટ
• પેટ્રોલ ડીઝના ભાવમાં રૂ.8 થી 10 નો ઘટાડો થઈ શકે છે

કેન્દ્ર સરકાર દેશના લોકોને નવા વર્ષની મોટી ભેટ આપવાની તૈયારી કરી રહી છે. મળતી માહિતી મુજબ પેટ્રોલ અને ડીઝલના ભાવમાં ટૂંક સમયમાં ઘટાડો થઈ શકે છે. આ માટે સરકારે ડ્રાફ્ટ તૈયાર કર્યો છે. તેમની કિંમતોમાં 8 થી 10 રૂપિયાનો ઘટાડો થઈ શકે છે. એવું માનવામાં આવે છે કે આ વર્ષના અંત પહેલા નવી કિંમતોની જાહેરાત કરવામાં આવી શકે છે. અહેવાલો અનુસાર પેટ્રોલિયમ મંત્રાલયે આ અંગે એક પ્રસ્તાવ તૈયાર કર્યો છે. હવે તેને વડાપ્રધાન નરેન્દ્ર મોદીની મંજૂરી મળવાની બાકી છે. મંત્રાલયનું કહેવું છે કે આયાતી કાચા તેલની કિંમતો ઝડપથી નીચે આવી છે, તેથી દેશના લોકોને પણ તેનો લાભ મળવો જોઈએ. તમને જણાવી દઈએ કે હાલ આંતરરાષ્ટ્રીય બજારમાં કાચા તેલની કિંમત 78.71 ડોલર (અંદાજે 6545 રૂપિયા) છે.

ક્રૂડ ઓઈલના ભાવની સ્થિતિ 

નાણાકીય વર્ષ 2023-24માં અત્યાર સુધીમાં પ્રતિ બેરલ ક્રૂડ ઓઈલની સરેરાશ કિંમત $77.14 (લગભગ 6416 રૂપિયા) છે. સપ્ટેમ્બરમાં આ આંકડો 93.54 ડોલર (લગભગ રૂ. 7780) હતો અને ઓક્ટોબરમાં આ આંકડો 90.08 ડોલર (લગભગ રૂ. 7492) હતો. નાણાકીય વર્ષ 2022-23 દરમિયાન કાચા તેલની સરેરાશ કિંમત 93.15 ડોલર (લગભગ 7748 રૂપિયા) પ્રતિ બેરલ હતી.

વાંચવા જેવું : ફાયદાની વાત / મ્યુચ્યુઅલ ફંડ-ડીમેટ એકાઉન્ટ ધારકોને મોટી રાહત, લંબાવાઇ નોમિની જોડવાની ડેડલાઇન, હવે આ છે અંતિમ તારીખ

2022માં પણ કર્યો હતો ઘટાડો

તમને જણાવી દઈએ કે 6 એપ્રિલ, 2022થી પેટ્રોલ અને ડીઝલની પ્રી-રિફાઈનરી કિંમતોમાં કોઈ ફેરફાર કરવામાં આવ્યો નથી. 22 મે, 2022 ના રોજ કેન્દ્ર સરકારે પેટ્રોલ પરની એક્સાઇઝ ડ્યુટી પ્રતિ લિટર 8 રૂપિયા અને ડીઝલ પરની એક્સાઇઝ ડ્યુટી 6 રૂપિયા પ્રતિ લિટર ઘટાડી હતી. ઉલ્લેખનીય છે કે આવતા વર્ષે લોકસભાની ચૂંટણી છે અને કેન્દ્ર સરકાર મોંઘવારી મુદ્દે વિપક્ષને ઘેરવાની તક આપવા માંગતી નથી.