ધ્યાન આપો / રાંધણ ગેસની જેમ ગ્રાહકોને વધુ એક સબસિડી આપવાની તૈયારી, ખાતામાં જમા થશે પૈસા, જાણો નવા બિલ અંગે

• 29 નવેમ્બરથી સંસદના શિયાળુ સત્રનો પ્રારંભ
• કેન્દ્ર સરકાર નવુ વિજળી સંશોધન બિલ કરશે રજૂ
• વિજળી સંશોધન બિલનો ડ્રાફ્ટ ફાઈનલ થઇ ગયો

સંસદમાં કેન્દ્ર સરકાર નવુ વિજળી સંશોધન બિલ રજૂ કરશે

આ બિલ મુજબ, વિજળી કંપનીઓને સરકાર તરફથી કોઈ સબસિડી આપવામાં આવશે નહીં. પરંતુ સરકાર ગ્રાહકોના બેન્ક એકાઉન્ટમાં સબસિડીને ડાયરેક્ટ ટ્રાન્સફર કરશે. આ બિલ્કુલ એવુ જ હશે જેમકે રસોઈ ગેસની સબસિડીમાં થાય છે. આ બિલના માધ્યમથી વિજળી વિતરણને ડી-લાયસન્સ કરવાની દરખાસ્ત મુકવામાં આવશે. જેનો ફાયદો એ થશે કે વિજળી વિતરણના પ્રાઈવેટ પ્લેયર સરકારી વિતરણ કંપનીઓની સાથે પ્રતિસ્પર્ધા કરી શકશે. આ સિવાય વિજળીના ગ્રાહકો નક્કી કરી શકશે કે વિજળી વિતરણ કરનારી કંપનીઓમાંથી કઈ કંપની પાસેથી વિજળી લેવા માંગો છો. આ અંગે નાણાં મંત્રી નિર્મલા સીતારમણે ગયા યુનિયન બજેટમાં કહ્યું હતુ કે સરકાર આવુ કોઈ ફ્રેમવર્ક લાવવા અંગે કામ કરી રહી છે. મહત્વનું છે કે, આ સંશોધનો પર મહારાષ્ટ્ર, પશ્ચિમ બંગાળ, તામિલનાડુ અને કેરળ પહેલાં જ વાંધો દર્શાવી ચૂક્યા છે.

ગ્રાહકોને થશે અસર

મનાઈ રહ્યું છે કે સરકારના આ નિર્ણયની અસર વિજળી ગ્રાહકો પર પડશે. અત્યાર સુધી રાજ્ય સરકારો વિજળી પૂરી પાડતી કંપનીઓને એડવાન્સમાં સબસિડી આપે છે. આ સબસિડીના આધારે વિજળીના ભાવ નક્કી કરવામાં આવે છે. કારણકે હવે વિજળી કંપનીઓને સબસિડી મળશે જ નહીં તો તેની સીધી અસર ગ્રાહક પર પડશે. ગ્રાહકોના બિલમાં વધારો થવાની સંભાવનાઓ છે. જોકે, બિલમાં એવુ પણ કહેવામાં આવ્યું છે કે ગ્રાહકોના ખાતામાં સીધા પૈસા ટ્રાન્સફર કરવામાં આવશે. પરંતુ હજુ સુધી આ સ્પષ્ટ થયુ નથી કે કયા ગ્રાહકોને સબસિડી મળશે અને કોને નહીં.