અમદાવાદમાં પ્રદુષણ વધુ ફેલાવવા માટે પીરાણા ડમ્પિંગ સાઈટ ને ખુબ જ જવાબદાર ગણવામાં આવે છે.
Share
અમદાવાદ મનપા ઓફિસ ખાતે વિપક્ષનો વિરોધ
પીરાણા ડમ્પ સાઇટ મામલે વિરોધ પ્રદર્શન
ડમ્પ સાઇટનો નિકાલ લાવવા વિપક્ષની માગ
અમદાવાદ પીરાણા ડમ્પિંગ સાઈટ શહેરની મોટી સમસ્યા છે. તેની કાયાપલટની પ્રક્રિયા શરૂ કરવામાં આવી હતી. જેના ભાગરૂપે સાઈટ પરથી લાખો મેટ્રિક ટન કચરાનો પ્રોસેસ કરવામાં આવી હતી. પણ સામે કચરો પણ એટલા જ મેટ્રિક ઠલવાય છે જેથી ઘણા સમયથી આસપાસના ગામડાઓ અને વિસ્તારોમાંથી માંગ ઉઠી છે કે ડમ્પ સાઇટનો નિકાલ લાવવામાં આવે પણ હજુ સુધી આ રજૂઆતનો GPCB અને AMC દ્વારા કોઈ યોગ્ય નિકાલ કરવામાં આવ્યો નથી.
પીરાણા ડમ્પિંગ સાઈટમાં ભ્રષ્ટાચાર, ડમ્પ સાઇટનો નિકાલ લાવવા ઉગ્ર રજૂઆત
આજે અમદાવાદ મનપા ઓફિસ ખાતે AMC વિપક્ષ કોંગ્રેસના નેતા શહેજાદ ખાન દ્વારા મોટી સંખ્યામાં કોંગી કાર્યકરોને ભેગા કરી પીરાણા ડમ્પ સાઇટ મામલે વિરોધ પ્રદર્શન કર્યું હતું. સાઇટમાં ભ્રષ્ટચાર થતો હોવાનો વિપક્ષે સૂત્રોચ્ચાર કર્યા હતા. અને વિવિધ બેનરો સાથે વિપક્ષ નેતા શહેજાદ ખાન અને કાર્યકરો મનપા ઓફિસ ખાતે વિરોધ શરૂ કર્યો હતો. વિપક્ષનું કહેવું હતું કે નારણપુરામાં બિલ્ડીંગ મટિરિયલ સાઇટ હટાવવા ત્વરિત નિર્ણય લેવાયો તો પીરાણા સાઇટથી આજુબાજુના ગામોના લોકો ત્રસ્ત છે તો કેમ AMC શાસક પક્ષ મૌન શા માટે? સમગ્ર મામલે GPCB અને AMC એકબીજા પર દોષનો ટોપલો ઠાલવી રહ્યા છે પણ ડમ્પ સાઇટનો નિકાલ લાવવા કોઈ પગલાં ભરવામાં આવી રહ્યા નથી.
બંને પક્ષના કોર્પોરેટરો વચ્ચે ઉગ્ર બોલાચાલીના દ્રશ્યો
ડમ્પ સાઇટ મુદ્દે મેયર ઓફીસે ભાજપ-કોંગ્રેસના કોર્પોરેટરો સામસામે આવી જતા મામલો થોડા સમય માટે વધુ ઉગ્ર બની ગયો હતો. કોંગ્રેસના કોર્પોરેટરોએ ભ્રષ્ટાચારના આક્ષેપો કરતાં બંને પક્ષના કોર્પોરેટરો વચ્ચે ઉગ્ર બોલાચાલીના દ્રશ્યો સર્જાયા હતા. પોલીસે વચ્ચે પડીને સમગ્ર મામલો શાંત પાડવાનો પ્રયાસ કર્યો હતો આખરે ભારે બોલાચાલી અને સૂત્રોચ્ચાર બાદ પીરાણા ડમ્પ સાઇટ મામલે મેયરને આવેદન પત્ર સોંપાયું હતું.
