રાજકોટ / આ માં એતો આજનો દિવસ લજવ્યો, મધર્સ ડેના દિવસે જ ત્રણ દિવસની બાળકીને અનામી પારણામાં મુકી માતા ફરાર

• મધર્સ ડેના દિવસે કરૂણ ઘટના સામે આવી
• રાજકોટમાં નવજાતને મુકી માતા ફરાર
• સિવિલમાં નવજાતને મુકી માતા થઈ ફરાર

રાજકોટ શહેરમાં આજે વિશ્વ મધર્સ ડેના દિવસે માતાના અલગ અલગ બે સ્વરૂપ જોવા મળ્યા છે. એક મા એ પોતાના પાંચ અંગોનું દાન કરીને પાંચ જિંદગી બચાવી છે તો બીજી તરફ એક માની કુખે જન્મેલી બાળકીને છોડી દેવામાં આવી છે. શહેરની સિવિલ હોસ્પિટલમાં આવેલી કે ટી શેઠ બાળકોની હોસ્પિટલમાં બાળકીને તરછોડી દેવામાં આવી છે.

બાળકીને સારવાર માટે ખસેડી
બાળકીનો જન્મ થોડા સમય પહેલા જ થયો હોવાનું જાણવા મળી રહ્યું છે. આ બાળકીને સિવિલમાં બાળકોની હોસ્પિટલમાં અનામી પારણામાં તરછોડી દેવા આવી હતી. આ ઘટના અંગે સ્થાનિક સિક્યુરિટીએ જણાવ્યું હતું કે, ગત રાત્રે 11 વાગ્યાની આસપાસ એક ભાઈ આવ્યા હતા અને તેમને આ અનામી પારણામાં પોતાની બાળકીને મૂકી દીધી હતી અને બાદમાં જતા રહ્યા હતા. આ ઘટનાની જાણ કે ટી શેઠ બાળકોની હોસ્પિટલના સ્ટાફને થતા તેમને તાત્કાલિક આ બાળકીને સારવાર માટે ખસેડી હતી અને તેમને સારવાર આપવામાં આવી હતી આ ઉપરાંત ડોક્ટર નર્સ સહિતના સ્ટાફ દ્વારા બાળકીની દેખરેખ પણ કરવામાં આવી રહી છે. 

પોલીસે તપાસ હાથ ધરી
આ ઘટના સામે આવતા જ સૌ કોઈ લોકોમાં બાળકી પ્રત્યે દયાની ભાવના છે તો બાળકીના માતા-પિતા પ્રત્યે ધૃણાની લાગણી પણ લોકોમાં જોવા મળતી રહી છે. સૌ કોઈ બાળકીને લઈને ચિંતા કરતા જોવા મળી રહ્યાં છે તેમજ માતા-પિતા સામે ફટકાર વ્યાપી છે. જો કે, સમગ્ર ઘટનાને પગલે પોલીસે તપાસ હાથ ધરી છે.