- ટીમ ઈન્ડિયા શ્રીલંકાને 302 રનથી હરાવી સેમિફાઈનલમાં પંહોચી
- અમારું લક્ષ્ય પહેલા સેમિફાઈનલ અને ફાઈનલ જીતવાનું
- શ્રેયસ અય્યર કોઈપણ પડકારનો સામનો કરવા તૈયાર - રોહિત શર્મા
ટીમ ઈન્ડિયાએ ગુરુવારે મુંબઈના વાનખેડે સ્ટેડિયમમાં શ્રીલંકાને 302 રનથી હરાવીને વર્લ્ડ કપ 2023ની સેમિફાઈનલમાં પ્રવેશ કર્યો હતો.આ જીતમાં ટીમ ઈન્ડિયાએ બેટિંગ અને બોલિંગે બંનેમાં શાનદાર પ્રદર્શન કર્યું હતું. ટીમ ઈન્ડિયા તરફથી બેટિંગમાં શુભમન ગીલ, વિરાટ કોહલી અને શ્રેયસ અય્યરે સૌથી વધુ રન બનાવ્યા હતા.
અમારું લક્ષ્ય પહેલા સેમિફાઈનલ અને ફાઈનલ જીતવાનું
રોહિતે મેચ બાદ કહ્યું, “હું ખૂબ જ ખુશ છું કે અમે સત્તાવાર રીતે સેમિફાઇનલમાં પહોંચ્યા છીએ. જ્યારે અમે ચેન્નાઈમાં શરૂઆત કરી ત્યારે અમારું લક્ષ્ય પહેલા સેમિફાઈનલ અને પછી ચોક્કસપણે ફાઈનલ માટે ક્વોલિફાય કરવાનું હતું.અમે જે રીતે સાત મેચ રમ્યા તે ખૂબ જ સારી રહી છે અને બધાએ પૂરતા પ્રયત્ન કર્યો છે.”
ટીમ ઈન્ડિયા તરફથી જસપ્રીત બુમરાહ, મોહમ્મદ શમી અને મોહમ્મદ સિરાજની ત્રિપુટીએ શ્રીલંકાના બેટ્સમેનોને ઘૂંટણિયે પડવા પર મજબૂર કર્યા હતા. જો કે મેચ બાદ આ બધા ખેલાડીઓમાંથી રોહિત શર્માએ એક ખેલાડીના વખાણ કર્યા હતા.
શ્રેયસ કોઈપણ પડકારનો સામનો કરવા તૈયાર
રોહિત શર્માએ કહ્યું, 'શ્રેયસ ખૂબ જ મજબૂત ખેલાડી છે અને તેણે ક્રિઝ પર આવીને તે કર્યું જે તે માટે જાણીતો છે અને અમે તેની પાસેથી એવી જ અપેક્ષા રાખીએ છીએ. શ્રેયસે બતાવ્યું કે તે કોઈપણ પડકારનો સામનો કરવા તૈયાર છે. ભારતીય બોલરોએ પણ ટુર્નામેન્ટમાં કેટલાક ઉત્કૃષ્ટ પ્રદર્શન કરીને તેમના બેટ્સમેનોના પ્રયાસોને મદદ કરી હતી.' સાથે જ રોહિત તમામ પ્રકારની પરિસ્થિતિઓમાં પોતાના બોલરોનું દમદાર પ્રદર્શન જોઈને ખુશ હતો.
મેચમાં ભારતે 357 રન બનાવ્યા હતા
શ્રીલંકા સામેની મેચમાં ટીમ ઈન્ડિયાને ટોસ હાર્યા બાદ પ્રથમ બેટિંગ કરવાનો મોકો મળ્યો હતો. ભારતીય ટીમે શુભમન (92), વિરાટ કોહલી (88) અને શ્રેયસ અય્યર (82)ની અડધી સદીના આધારે નિર્ધારિત 50 ઓવરની રમતમાં 7 વિકેટ ગુમાવીને 357 રન બનાવ્યા હતા. ટીમ ઈન્ડિયાના ત્રણ ખેલાડીઓ મેચમાં પોતાની સદી ચૂકી ગયા પરંતુ તે પછી સ્કોર 350 રન સુધી પહોંચી ગયો હતો.
