- મહેસાણાના વિસનગરમાં 2 વ્યાજખોર સામે નોંધાઇ ફરિયાદ
- સુરતમાં 2 દિવસમાં વ્યાજખોરો સામે 67 ગુના નોંધાયા
- 27 ગુનાઓ ખંડણી અને ધાક-ધમકીના નોંધાયા
- રાજકોટમાં વ્યાજખોરો સામે ફરિયાદ નોંધવાનુ થયું શરું
- વ્યાજખોર સામે એકજ દિવસમાં 3 ફરિયાદ નોંધાઈ
રાજયમાં વ્યાજખોરો બેફામ બનીને આડેધડ વ્યાજ વસૂલતા હોવા ઉપરાંત ત્રાસ ગુજારતાં હોવાની અનેક વખત રાવ ઉઠે છે ત્યારે આ મામલે રાજ્યમાં પોલીસ દ્વારા ડ્રાઇવ ચલાવવામાં આવી છે. 100 દિવસમાં વ્યાજખોરોના આતંકથી લોકોને ઉગારવા સરકાર મિશન મોડ પર કાર્યવાહી કરી રહી છે. જેમાં હવે મહેસાણા, સુરત અને રાજકોટમાં વ્યાજખોરો સામે કાર્યવાહી કરવામાં આવી છે.
રાજ્યભરમાં વ્યાજખોરોનું દૂષણ સતત વધી રહ્યું છે અને વ્યાજના ખપ્પરમાં અનેક પરિવારો હોમાઈ રહ્યા છે. વ્યાજખોરો સામાન્ય લોકોની મજબૂરીનો લાભ લઈને તેમને ઉંચા વ્યાજે પૈસાનું ધિરાણ કરે છે. ત્યારબાદ આ લોકો પૈસા ન ભરી શકે તો તેમની પાસેથી તેમની મિલકત અને અન્ય કિંમતી ચીજવસ્તુઓ પોતાના નામે લખાવી લેતા હોય છે. ત્યારે આવા વ્યાજખોરોના ત્રાસના કારણે અનેક લોકોએ પોતાનું જીવન ટૂંકાવી લેતા અનેક ઘટનાઓ અવારનવાર સામે આવતી રહે છે. ત્યારે હવે સમગ્ર રાજ્યમાં વ્યાજખોરોના દૂષણને ડામવા માટે ગુજરાત પોલીસ એક્શન મોડમાં આવી છે.
મહેસાણામાં 2 વ્યાજખોર સામે ફરિયાદ
મહેસાણા જિલ્લાના વિસનગરમાં 2 વ્યાજખોર સામે ફરિયાદ નોંધાઇ છે. વિગતો મુજબ આ ઇસમો નાણાં ધીરધારના કોઈ પણ લાઇસન્સ વગર વ્યાજે નાણાં આપતા હતા. આ સાથે વ્યાજે નાણાં આપી ઊંચી રકમનું વ્યાજ વસુલ કરવામાં આવતું હતું. જેને લઈ સેવાલિયા ગામના યુવાને પટેલ સંજય અને પટેલ ભુપેન્દ્ર નામના શખ્સો સામે ફરિયાદ નોંધાવતા પોલીસે વધુ તપાસ હાથ ધરી છે.
સુરતમાં વ્યાજખોરો સામે પોલીસની કડક કાર્યવાહી
સુરતમાં વ્યાજખોરો સામે પોલીસની કડક કાર્યવાહી સામે આવી હે. જેમાં 2 દિવસમાં વ્યાજખોરો સામે 67 ગુના અને 27 ગુનાઓ ખંડણી અને ધાક-ધમકીના નોંધાયા છે. આ તરફ પોલીસે 2 દિવસમાં 50થી વધુ વ્યાજખોરોને ઝડપ્યા છે. મહત્વનું છે કે, વ્યાજખોરો સામે પોલીસ કડક પગલાં લેશે.
રાજકોટમાં વ્યાજખોરો સામે ફરિયાદ નોંધવાનુ થયું શરું
રાજ્કોટમાં પણ વ્યાજખોરો સામે પોલીસ પ્રશાસન એક્શન મોડમાં છે. રાજકોટમાં વ્યાજખોર સામે એક જ દિવસમાં 3 ફરિયાદ નોંધાઈ છે. જેમાં 2 મહિલા સહિત 6 સામે નવા કાયદા મુજબ ફરિયાદ નોંધાઈ છે. વ્યાજખોર સામે નાણાંધીરણ અધિનિયમ મુજબ 2 ડિવિઝન પોલીસ મથક માં 2 ફરિયાદ નોંધાઈ છે. જેમાં આજીડેમ પોલીસ મથકમાં 1 ફરિયાદ નોંધાઈ છે. મહત્વનું છે કે, રાજકોટ પોલીસ કમિશ્નરનાલોક દરબારમાં 60 અરજીઓ આવી હતી.
હર્ષ સંઘવીએ યોજી હતી બેઠક
મહત્વનું છે કે, તાજેતરમાં જ ગૃહ રાજ્યમંત્રી હર્ષ સંઘવી વિડીયો કોન્ફરન્સ થકી ઉચ્ચ પોલીસ અધિકારીઓ સાથે બેઠક કરી હતી. રાજ્યમાં હાલ વ્યાજખોરો વિરુદ્ધ સ્પેશિયલ ડ્રાઇવ ચાલી રહી છે ત્યારે આ મામલે જિલ્લા વાઇસ સ્પેશ્યલ ડ્રાઈવ દરમિયાન થયેલી પોલીસની કામગીરી અંગે બેઠકમાં સમીક્ષા કરાઈ હતી. જેમાં દરેક જિલ્લામાં વ્યાજખોરો વિરૂધ કરવામાં આવેલ ફરિયાદો, કેસો અને રજુઆતો પરની કાર્યવાહીની સમીક્ષા કરવામાં આવી હતી.
