- પશ્ચિમ બંગાળની કરુણ ઘટના
- બાળકનો મૃતદેહ બેગમાં નાખીને 200 કિલોમીટરનું અંતર કાપ્યું
- એમ્બ્યુલન્સ ચાલકે 8,000 રૂપિયા માંગ્યા
પશ્ચિમ બંગાળની એક કરુણ ઘટના સામે આવી છે. એક પિતા પાસે એમ્બ્યુલન્સનું ભાડુ ના હોવાને કારણે પાંચ મહિનાના બાળકનો મૃતદેહ બેગમાં નાખીને 200 કિલોમીટરનું અંતર કાપવું પડ્યું હતું. સિલીગુડીથી કાલિયાગંજમાં તેના ઘર સુધી મૃતદેહ લઈ જવા માટે એમ્બ્યુલન્સ ચાલકે 8,000 રૂપિયા માંગ્યા હતા.
આ મામલે વિધાનસભા વિપક્ષ નેતા (ભાજપ) સુવેંદુ અધિકારીએ તૃણમૂલ કોંગ્રેસની ‘સ્વાસ્થ્ય સાથી વીમા યોજના’ પર સવાલ ઊભા કર્યા હતા. તૃણમૂલ કોંગ્રેસે ભાજપ પર આરોપ લગાવ્યો હતો કે, ભાજપ એક બાળકના દુર્ભાગ્યપૂર્ણ મોત પર રાજનીતિ કરી રહી છે.
બાળકના પિતા આશીમ દેબશર્મા જણાવે છે કે, ‘છ દિવસો સુધી સિલીગુડી નોર્થ બંગાલ મેડિકલ કોલેજ એન્ડ હોસ્પિટલમા ઈલાજ પછી મારા પાંચ મહિનાના બાળકનું મૃત્યુ થઈ ગયું. ઈલાજ માટે 16,000 રૂપિયાનો ખર્ચો કર્યો. મારા બાળકને કાલિયાગંજ સુધી લઈ જવા માટે એમ્બ્યુલન્સ ચાલકે 8,000 રૂપિયા માંગ્યા અને મારી પાસે તેટલા પૈસા નહોતા.’
એમ્બ્યુલન્સ ના મળતા બાળકનો મૃતદેહ બેગમાં નાખી દીધો. આ બેગ લઈને દાર્જિલિંગના સિલીગુડીથી લગભગ 200 કિલોમીટર સુધી ઉત્તર દિનાજપુરના કાલિયાગંજ સુધી બસમાં સફર કર્યું. આ વાતની કોઈને ખબર પડવા દીધી નહોતી. બાળકના પિતાને ડર હતો કે, સહયાત્રીઓને ખબર પડશે તો તેને બસમાંથી ઉતારી દેવામાં આવશે.
બાળકના પિતા જણાવે છે કે, 102 યોજના હેઠળ એક એમ્બ્યુલન્સ ચાલકે કહ્યું કે, આ સુવિધા દર્દીઓ માટે છે મૃતદેહ લઈ જવા માટે નથી. એક અધિકારીએ બાળકના પિતાનો મીડિયા સાથેની વાતચીતનો વિડીયો ટ્વિટર પર પોસ્ટ કર્યો છે. કેપ્શનમાં જણાવ્યું છે કે, ‘આપણે ટેકનિકલ બાબતોમાં ના પડવું જોઈએ. શું સ્વાસ્થ્ય સાથી આ મેળવવા માટે છે? દુર્ભાગ્યૂપૂર્ણ આ એક ‘ઈગિયે બાંગ્લા’ (ઉન્નત બંગાલ) મોડલની તસવીર છે.’ તૃણમૂલ રાજ્યસભાના સભ્ય શાંતનૂ સેને ભાજપ પર બાળકના મૃત્યુ બાબતે રાજનીતિ કરવાનો આરોપ મુક્યો છે.
