સાચવજો / સુરતીઓ સાવધાન! શહેરમાં વકર્યો મચ્છરજન્ય રોગચાળો, 20 દિવસમાં 21 લોકોનો લીધો ભોગ, તંત્ર સામે સવાલ

• સુરત શહેરમાં મચ્છરજન્ય રોગચાળો વકર્યો
• તાવના કારણે વધુ એક યુવકનું મૃત્યુ
• પાંડેસરાના વડોદમાં યુવકનું મૃત્યુ

સુરત શહેરમાં વરસાદ બાદ પાણી ભરાવાની સમસ્યાના કારણે મચ્છરજન્ય રોગચાળો વકર્યો છે. ઝેરી મેલેરિયા, કોલેરા સહિતના કેસના કારણે શહેરની ખાનગી અને સરકારી હોસ્પિટલોમાં દર્દીઓની લાઈનો લાગી છે. સુરત શહેરમાં ગયા વર્ષની સરખામણીએ આ વર્ષે રોગચાળાના આંકડામાં 15% જેટલો વધારો જોવા મળ્યો છે. વરસાદી રોગચાળાને કારણે સુરત શહેરમાં અત્યાર સુધીમાં 21 વ્યક્તિઓના મૃત્યુ પણ થયા છે. રોગચાળાને ડામવા માટે સુરત મહાનગરપાલિકાની ટીમ કામગીરી કરી રહી છે પરંતુ આ કામગીરી માત્ર કાગળ પર હોય એવું લાગી રહ્યું છે.

વધુ એક યુવકનું તાવમાં સપડાતાં મોત
શહેરના પાંડેસરાના ગણેશ નગરમાં વધુ 1 યુવકનું તાવમાં સપડાતાં મોત થયું છે. પ્રાપ્ત વિગતો અનુસાર, શહેરના પાંડેસરા વિસ્તારમાં આવેલા ગણેશ નગર ખાતે રહેતા ટુના રન્કા ગૌડા નામના યુવકને શનિવારે તાવ આવ્યા બાદ મોડી સાંજે તબિયત લથડી હતી. જે બાદ બેભાન હાલતમાં આ યુવકને સારવાર અર્થે સિવિલ હોસ્પિટલ ખાતે લઈ જવામાં આવ્યો હતો. જ્યાં ડોક્ટરો દ્વારા તેને મૃત જાહેર કરાયો હતો. જે બાદ યુવકના મૃત્યુનું ચોક્કસ કારણ જાણવા પોસ્ટમોર્ટમ કરવામાં આવ્યું છે. એક રિપોર્ટ અનુસાર, આ જ વિસ્તારમાં છેલ્લા 20 દિવસમાં તાવ, ઉલટી સહિતના રોગચાળામાં કુલ 8 લોકોના મૃત્યુ થયા છે. જેના કારણે આરોગ્ય વિભાગની કામગીરી સામે અનેક સવાલો ઉભા થઈ રહ્યા છે.
 
ઉલટી અને તાવને કારણે 2 યુવકોના થયા હતા મોત
આપને જણાવી દઈએ કે, સુરતમાં ગત 3 ઓગસ્ટે પણ ઉલટી અને તાવને કારણે 2 યુવકોના મોત નિપજ્યા હતા. શહેરના ગોડાદરાના 19 વર્ષીય યુવકને મંગળવારે ઝાડા ઉલટી થયા હતા. બુધવારની સવારે તે બેહોશ થતા તેને હોસ્પિટલ ખાતે લઈ જવાયો હતો, હોસ્પિટલ ખાતે સારવાર મળે તે પહેલા જ યુવકનું મૃત્યુ નિપજ્યું હતું. 

શહેરમાં રોગચાળો વકરતા નાગરિકોની ચિંતામાં વધારો
જ્યારે શહેરના ઉધનાના 39 વર્ષીય યુવકને અઠવાડિયા બાદ ફરી આવ્યો તાવ હતો. જે બાદ તેનું મૃત્યુ નિપજ્યું હતું. આપને જણાવી કે, શહેરમાં છેલ્લા 20 દિવસમાં 21 વ્યક્તિઓના મોત નિપજ્યા છે. શહેરમાં રોગચાળાને કારણે થતા મૃત્યુથી લોકોની ચિંતામાં થયો વધારો છે.