Surat News : લખને દરિયામાં વિતાવેલી રાત વિશે કહ્યું કે, તે રાત ખૂબ અંધારી હતી અને ડરામણી પણ લાગતી હતી, પરંતુ મેં થોડી હિંમત કરી સાહસ કરી રાત ગુજારી હતી
Share
મોતને મ્હાત આપનાર લખન સાથે ખાસ વાત
ગણપતી વિસર્જન સમયે સમુદ્રમાં ડૂબ્યો હતો
સુરતથી નવસારી પહોંચ્યો હતો લખન
સુરતનો 24 વર્ષીય લખન જેની ચર્ચા આજે ચારેય તરફ થઈ રહી છે. આ એ કિશોર છે જે ગણપતી વિસર્જન સમયે સુરતના સમુદ્રમાં ડૂબી ગયો હતો, પણ લખને હાર ન માની. તોફાની દરિયા સાથે બાથ ભીડી અને એક પાટીયું મળતાં તેના પર બેસી ગયો હતો. કલાકો વિતવા લાગ્યા, દિવસો વિત્યા અને 36 કલાક બાદ લખન નવસારી નજીકથી સમુદ્રમાં એક માછીમારને મળી આવ્યો. લખને મોતને મ્હાત આપી છે. તેની સાથે VTV NEWSએ ખાસ વાતચીત કરી હતી. આખરે લખને સમુદ્રમાં કેવી રીતે દિવસ-રાત ગુજારી અને જિંદગી જીવવાની ચાહે લખનને કેવી રીતે 36 કલાક ભૂખ્યા તરસ્યા જીવંત રાખ્યો, જે તમામ મુદ્દે લખને આપવીતી જણાવી છે.
બોડી હલાવવાની બંધ કરી દીધી હતી: લખન
લખને જણાવ્યું કે, અમે ગણપતિ જોવા માટે ગયા હતા, તે દરમિયાન મારો પગ લપસી જવાના કારણે હું દરિયામાં ખેચાઈ ગયો હતો. હું દરિયામાં તણાઈ ગયા ત્યારબાદ રાત્રીના સમયમાં એક પાટીયું હાથમાં આવી ગયો હતો. કહ્યું કે, મને ખબર હતી કે, હું મરવાનો છું જેથી મેં દરિયમાં બોડી હલાવવાની બંધ કરી દીધી હતી અને રિલેક્સ થઈ ગયો હતો, જેથી હું ઉપર આવતો ગયો અને ડૂબ્યો નહી
'રાત ખૂબ અંધારી હતી અને ડરામણી હતી'
લખને દરિયામાં વિતાવેલી રાત વિશે કહ્યું કે, તે રાત ખૂબ અંધારી હતી અને ડરામણી પણ લાગતી હતી, પરંતુ મેં થોડી હિંમત કરી સાહસ કર્યું અને રાત ગુજારી હતી. લખને કહ્યું કે, સવારે માછીમારો દરિયામાં જતા હતા અને મેં બોલાવ્યા પણ તે આવ્યા નહી, ત્યારે મારી પાસે જે ગણપતિનું લાકડું હતું તે તોડ્યું અને તેમની બાજુ ફેંક્યું તેથી તે લોકો મને બચાવવા આવ્યા હતા.
'મને લાગ્યું કે, હું હવે બચી જવાનો છું'
લખને કહ્યું કે, માછીમારોએ મને બોટમાં લીધો ત્યારે હું ખૂબ જ ખુશ થયો હતો કારણ કે, મને લાગ્યું કે, હું હવે બચી જવાનો છું. માછીમારો મને પૂછતા હતા કે, ક્યાંથી આવ્યો છે તેમજ મને કિનારે લઈ જતા હતા તે દરમિયાન વચ્ચે પોલીસવાળા આવ્યા હતા અને તે લોકો મને હોસ્પિટલ લઈ ગયા હતા.
