- વિશ્વના અનેક ભાગોમાં તાપમાન વધવાને કારણે ગરમી વધી
- ચીનથી લઈને યુરોપ, અમેરિકા કાળઝાળ ગરમીથી પરેશાન
- જુલાઈ 2023નો મહિનો ઉનાળાના તમામ રેકોર્ડ તોડી નાખશે
- જર્મનીની લીપઝિગ યુનિવર્સિટીમાં ચોંકાવનારા દાવા કરાયા
હાલમાં વિશ્વના અનેક ભાગોમાં તાપમાન વધવાને કારણે ગરમી વધી છે. ચીનથી લઈને યુરોપ, અમેરિકા અને વિશ્વના અન્ય ભાગોમાં ગરમીના કારણે લોકો પરેશાન થઈ ગયા છે. તાજેતરમાં, જર્મનીની લીપઝિગ યુનિવર્સિટીએ ગુરુવારે એક રિપોર્ટ જાહેર કર્યો. જેમાં તેઓએ જણાવ્યું કે જુલાઈ 2023નો મહિનો ઉનાળાના રેકોર્ડ તોડશે. વૈજ્ઞાનિકોએ જણાવ્યું કે આ મહિને સરેરાશ વૈશ્વિક તાપમાન 1.5 ડિગ્રી સેલ્સિયસ વધુ રહેવાનું છે. યુરોપિયન યુનિયનના ડેટા અનુસાર, તે 2019ના જુલાઈ કરતાં ઓછામાં ઓછું 0.2C (0.4F) વધુ ગરમ હશે. લીપઝિગના આબોહવા વિજ્ઞાનીએ જણાવ્યું હતું કે જુલાઈ 2023 અને 2019 વચ્ચેનો તફાવત એટલો મોટો છે કે અમને પહેલેથી જ ખબર હતી કે તે સૌથી ગરમ મહિનો હશે.
વૈજ્ઞાનિકોએ ગરમી વિશે જણાવ્યું હતું
પેન્સિલવેનિયાના યુનિવર્સિટીના ક્લાઈમેટ સાયન્ટિસ્ટે જણાવ્યું હતું કે જુલાઈના મધ્યમાં ખબર પડી હતી કે તે રેકોર્ડ ગરમ મહિનો બનવા જઈ રહ્યો છે. તેમણે કહ્યું કે જ્યાં સુધી આપણે અશ્મિભૂત ઇંધણ બાળતા રહીશું ત્યાં સુધી આવી ગરમી રહેશે. જુલાઈ મહિનામાં વૈશ્વિક તાપમાન સામાન્ય રીતે 16C (61F) ની આસપાસ હોય છે, જેમાં દક્ષિણ ગોળાર્ધમાં શિયાળાનો પણ સમાવેશ થાય છે. પરંતુ આ વર્ષે જુલાઈમાં તે વધીને 17C (63F)ની નજીક પહોંચી ગયો છે. લીપઝિગના ક્લાઈમેટ સાયન્ટિસ્ટે કહ્યું કે છેલ્લા 1 લાખ 20 હજાર વર્ષોમાં પૃથ્વી એટલી હૂંફાળી નથી જેટલી તે અત્યારે છે.
સંયુક્ત રાષ્ટ્રના મહાસચિવ એન્ટોનિયો ગુટેરેસે ચિંતા વ્યક્ત કરી
હાલમાં સંયુક્ત રાષ્ટ્રના મહાસચિવ એન્ટોનિયો ગુટેરેસે વિશ્વને ચેતવણી આપી હતી કે ગ્લોબલ વોર્મિંગનો યુગ સમાપ્ત થઈ ગયો છે. આપણે હવે ગ્લોબલ બોઈલીંગના યુગમાં છીએ. એન્ટોનિયો ગુટેરેસનું આ ચિંતાજનક નિવેદન ત્યારે આવ્યું છે જ્યારે વૈજ્ઞાનિકોએ પુષ્ટિ કરી છે કે જુલાઈ 2023 માનવ ઇતિહાસમાં અત્યાર સુધીનો સૌથી ગરમ મહિનો બનવાના ટ્રેક પર છે. ગુટેરેસે આ વધતા સંકટને પહોંચી વળવા તાત્કાલિક પગલાં લેવાની માંગ કરી હતી.
