હાય ગરમી / છેલ્લા 50 વર્ષના ફેબ્રુઆરી માસનાં મહત્તમ તાપમાનનો રેકોર્ડ તૂટ્યો,જાણો મોટા ભાગના શહેરોમાં મહત્તમ તાપમાન કેટલું

• ગરમીને લઈને હવામાન વિભાગની આગાહી
• 3 દિવસ તાપમાનમાં કોઈ ફેરફાર નહીં
• ભુજનું મહત્તમ તાપમાન 40.3 ડિગ્રી 

હવામાન વિભાગ દ્વારા ગરમીને લઈને આગાહી કરવામાં આવી છે. જેમાં હવામાન વિભાગે જણાવ્યું છે કે, આગામી 3 દિવસ તાપમાનમાં કોઈ ફેરફાર નહીં થાય. મોટા ભાગના શહેરમાં મહત્તમ તાપમાન 38થી 40 ડિગ્રી વચ્ચે નોંધાયું છે. ભુજનું મહત્તમ તાપમાન 40.3 ડિગ્રી નોંધાયું છે.

16 ફેબ્રુઆરી છેલ્લા 7 વર્ષમાં સૌથી વધુ ગરમ દિવસ રહ્યો છે
વર્તમાન સમયમાં રાજ્યના વિવિધ વિસ્તારોમાં બેવડી ઋતુનો અહેસાસ થઈ રહ્યો છે. લોકોએ સવારે ઠંડી અને બપોરે ગરમીનો અનુભવ કરવો પડી રહ્યો છે. ત્યારે હવામાન વિભાગ દ્વારા ગરમીને લઈ આગાહી કરવામાં આવી છે. હવામાન વિભાગના જણાવ્યા અનુસાર આગામી 3 દિવસ તાપમાનમાં કોઈ ફેરફાર નહીં થાય તેમજ મોટા ભાગના શહેરમાં મહત્તમ તાપમાન 38થી 40 ડિગ્રી વચ્ચે નોંધાયું છે જ્યારે ભુજનું મહત્તમ તાપમાન 40.3 ડિગ્રી નોંધાયું છે. છેલ્લા 50 વર્ષના ફેબ્રુઆરી માસનાં મહત્તમ તાપમાનનો રેકોર્ડ તૂટ્યો છે. 16 ફેબ્રુઆરી છેલ્લા 7 વર્ષમાં સૌથી વધુ ગરમ દિવસ રહ્યો છે. ભુજમાં પણ ગરમીએ મહત્તમ તાપમાનનો રેકોર્ડ તોડ્યો છે. હાલમાં રાજ્યમાં ઉત્તર પૂર્વના પવન ફૂંકાય રહ્યા છે.

થોડા દિવસ પહેલા અંબાલાલ પટેલ આગાહી કરી હતી
થોડા દિવસ પહેલા હવામાન નિષ્ણાત અંબાલાલ પટેલે અગાહી કરી હતી કે, આ વર્ષે ઉનાળો આકરો રહેશે અને માર્ચ મહિનામાં આકરી ગરમી રહેશે. 4 માર્ચથી ગરમી વધશે. માર્ચ મહિનામાં 40 ડિગ્રી તાપમાન પહોંચી જશે. 25થી 26 માર્ચ દરમિયાન દરિયા કિનારે ભારે પવન ફૂંકાશે.

દેશમાં હવામાનને લઈ હવામાન વિભાગે શું કહ્યું? 
દેશમાં હવામાનને લઈ હવામાન વિભાગે જણાવ્યું છે કે, આગામી બે દિવસમાં દિલ્હીના તાપમાનમાં વધારો થઈ શકે છે. દિલ્હીમાં 19-20 ફેબ્રુઆરી સુધી લઘુતમ તાપમાન 11 ડિગ્રી અને મહત્તમ તાપમાન 30 ડિગ્રી સુધી પહોંચી શકે છે. તેમજ પહાડો પર હિમવર્ષાના કારણે ઠંડીનો દોર જોવા મળશે. જોકે, કોલ્ડવેવ જેવી તીવ્ર ઠંડી નહીં પડે.