ડ્રોન નજારો / ગુજરાતમાં અત્ર તત્ર સર્વત્ર મેઘમહેર: ઘેડ પંથક 'પાણીથી તરબોળ', ખેતરો બેટમાં પરિવર્તિત, જુઓ આકાશી દ્રશ્યો

• અરવલ્લી જિલ્લામાં સાર્વત્રિક વરસાદ
• જુનાગઢના મતિયાણા ગામમાં નદીના પાણી ફરી વળ્યા
• ભાદર - 1 ડેમમાં સતત પાણીની આવક 

રાજ્યમાં મુશળધાર વરસેલા વરસાદના પગલે ડેમો અને ચેકડેમો છલોછલ ભરાયા છે. જેના કારણે ધરતીપુત્રો ખુશ-ખુશાલ જોવા મળી રહ્યા છે. ચોમાસાની શરૂઆતમાં જ સારો વરસાદ થતાં રાજ્યના મોટા ભાગની નદીઓ બે કાંઠે વહેતી થઈ જેને લઈ મોટા ભાગના ડેમના દરવાજા ખોલવાની પણ ફરજ પડી છે. રાજ્યમાં પડેલા ભારે વરસાદના પગલે જળબંબાકારની સ્થિતિ સર્જાઈ છે. ક્યાંક ખેતરો બેટમાં ફેરવાયા છે તો ક્યાંક રસ્તાઓ સ્વિમિંગપુલ બની ગયા હોય તેવા દર્શ્યો સામે આવ્યા છે.

ખેતરો બેટમાં ફેરવાયા
અરવલ્લી જિલ્લામાં સાર્વત્રિક વરસાદ થતાં અનેક વિસ્તારોમાં પાણી ભરાયા છે. બાયડ પંથકમાં ઠેર-ઠેર પાણી ભરાતા લોકોને હાલાકી ભોગવવાનો વારો આવ્યો છે તો બીજી તરફ ગઈકાલે બાયડમાં 4 ઈંચ વરસાદ ખાબકતા ખેતરો બેટમાં ફેરવાયા છે જેના ડ્રોન વીડિયો પણ સામે આવ્યો છે. જેમાં જોઈ શકાય છે કે ચોતરફ જળબંબાકારની સ્થિતિ સર્જાઈ છે. 

જૂનાગઢના ઘેડ વિસ્તારમાં જળબંબાકાર
જુનાગઢ જિલ્લામાં અવિરત વરસેલા વરસાદના પગલે ઘેડ પંથકની પરિસ્થિતિ ખૂબ કપરી બની છે આ વર્ષે માંગરોળ, માણાવદર, પાદરડી સહિતના ગામોમાં ભારે વરસાદના પગલે પાણી ભરાયાની પરિસ્થિતિ ઉદ્ભવી છે. તો મતિયાણા ગામમાં નદીના પાણી ફરી વળતા લોકો મુશ્કેલીમાં મુકાયા છે.જ્યાં લોકોને જવા આવવા કમર સુધીના પાણીમાં થઈને જવું પડે છે. કારણ કે, જ્યાં જુઓ ત્યાં પાણી જ પાણી જોવા મળી રહ્યું છે. 

ડેમમાં પાણીની સપાટી 23.20 ફૂટે પહોંચી
સૌરાષ્ટ્રમાં બીજા નંબરનો સૌથી મોટો ડેમ ભાદર - 1માં સતત પાણીની આવક જોવા મળી રહી છે. પુષ્કળ વરસાદ પડતા જેતપુર ઉપરાંત રાજકોટ, વીરપુર, સહિતના અનેક ગામોમાં ઘેરાતું જળસંકટ દૂર થયું છે.  સારો વરસાદ કારણે સૌરાષ્ટ્રના બીજા સૌથી મોટો ભાદર-1 ડેમમાં 23.20 ફૂટે પાણીની સપાટી પોંહચી છે. ભાદર ડેમની ઉંડાઇનુ લેવલ 34 ફૂટ છે અને આ ડેમમાં પાણીની સંગ્રહ કરવાની ક્ષમતા 6648 એમ.સી.એફ.ટીની છે.