- મણિપુરમાં હિંસક ઘટનાઓ વધવાને લીધે લેવાયો નિર્ણય
- તોફાનીઓને શાંત રાખવા રાજ્ય સરકારનો મોટો આદેશ
- હિંસા ભડકાવનારાઓને જોતાની સાથે જ ગોળી મારી દેવાનો આદેશ
મણિપુરમાં હિંસક ઘટનાઓની વચ્ચે સરકારે દંગા કરનારાઓને જોવાની સાથે જ ગોળી મારી દેવાનો આદેશ આપ્યો છે. સરકારની તરફથી જાહેર કરવામાં આવેલા આદેશમાં સ્પષ્ટ લખ્યું છે કે પ્રશાસન વિષમ પરિસ્થિતિઓમાં જ આ પગલું ભરશે. મણિપુરનાં રાજ્યપાલે હિંસાગ્રસ્ત વિસ્તારમાં તોફાનીઓને જોતાંની સાથે જ ગોળી મારી દેવાનાં રાજ્ય સરકારનાં નિર્ણયને મંજૂરી આપી દીધી છે. આ પહેલાં હિંસાગ્રસ્ત ક્ષેત્રમાં કલમ 144 લાગૂ કરવામાં આવી હતી. આવતાં 5 દિવસો માટે સમગ્ર રાજ્યમાં ઈન્ટરનેટ સેવા પણ બંધ કરી દેવામાં આવી છે.
રાતોરાત સેનાને કરવામાં આવી તૈનાત
મણિપુરમાં આદિવાસીઓ અને બહુસંખ્યક મેઈતી સમુદાયની વચ્ચે છેલ્લાં કેટલાક સમયથી તણાવની સ્થિતિ જોવા મળી રહી છે. બુધવારની રાત્રે આ તણાવની સ્થિતિએ હિંસાનું રૂપ ધારણ કર્યું હતું. ત્યારબાદ સ્થિતિને નિયંત્રિત કરવા માટે રાતોરાત સેના અને અસમ રાઈફલ્સનાં અનેક દળોને તાત્કાલિક તૈનાત કરી હતી. મણિપુરમાં અસમ રાઈફલ્સનાં 34 અને સાનાની 9 ટૂકડીઓ તૈનાત છે. આ સિવાય ગૃહમંત્રાલયે રેપિડ એક્શન ફોર્સી પણ પાંચ કંપનીઓને મણિપુર મોકલવામાં આવી છે. તેમ છતાં મણિપુરમાં હિંસાનું વાતાવરણ શાંત થવાનું નામ નથી લઈ રહ્યું.હિંસાનાં કારણે 9000થી વધારે લોકોને સુરક્ષિત સ્થળ પર લઈ જવામાં આવ્યાં છે.
ઈન્ટરનેટ સેવા બંધ
એક અધિકારીએ જણાવ્યું કે સ્થિતિને ધ્યાનમાં લેતાં બિન-આદિવાસી પ્રભુત્વ ધરાવતા જિલ્લાઓ ઇમ્ફાલ પશ્ચિમ, કાકચિંગ, થૌબલ, જીરીબામ અને બિષ્ણુપુર તેમજ આદિવાસી પ્રભુત્વ ધરાવતાં ચુરાચંદપુર, કાંગપોકપી અને તેંગનોપલ જિલ્લામાં કર્ફ્યુ લાદવામાં આવ્યું હતું. તેમણે કહ્યું કે સમગ્ર રાજ્યમાં મોબાઈલ ઈન્ટરનેટ સેવાઓ પણ બંધ કરી દેવામાં આવી છે. 5 દિવસ માટે રાજ્યમાં ઈન્ટરનેટ સેવા બંધ રહેશે.
