મેગા પ્લાન / અગાઉ ગુમાવેલી 161 બેઠકોને લઇ ભાજપનો એક્શન પ્લાન તૈયાર, 5 દિગ્ગજોને સોંપી મોટી જવાબદારી

• ભાજપે લોકસભા ચૂંટણી 2024 માટે બદલી રણનીતિ
• હારેલી 161 બેઠકો પર આ મજબૂત યોજના બનાવી
• 1000 વિધાનસભાઓને મજબૂત કરવાનો નિર્ણય લીધો 

ભારતીય જનતા પાર્ટી (BJP)ની આગેવાની હેઠળના NDA અને નવા-નવા બનેલા વિપક્ષી ગઠબંધન ઈન્ડિયન નેશનલ ડેવલપમેન્ટલ ઈન્ક્લુઝિવ એલાયન્સ એટલે કે ઈન્ડિયા 2024ની લોકસભા ચૂંટણી માટે ચૂંટણી મોડમાં આવી ગયા છે. સત્તા કબજે કરવા માટે પક્ષો દ્વારા નવા નવા ફોર્મ્યુલા તૈયાર કરવામાં આવી રહ્યા છે. આ વખતે ભાજપ માટે સતત ત્રીજી વખત સત્તા મેળવવાની લડાઈ છે. તેને જોતા ભાજપે ગત વખતે ગુમાવેલી 161 બેઠકો માટે નવો પ્લાન તૈયાર કર્યો છે. માહિતી અનુસાર ભાજપે રાજ્યમાંથી નેતાઓ અથવા દિગ્ગજોને મેદાનમાં ઉતારીને 2019ની ચૂંટણીમાં હારેલી 161 બેઠકો હેઠળ આવતી 1000 વિધાનસભાઓને મજબૂત કરવાનો નિર્ણય લીધો છે. લોકસભા ચૂંટણી 2024ની રણનીતિને આખરી ઓપ આપવા માટે મંગળવારે બીજેપી હેડક્વાર્ટર ખાતે એક મહત્વપૂર્ણ બેઠક યોજાઈ હતી. આ બેઠકમાં સમિતિના સભ્યો અને તેમના સાથીદારો હાજર રહ્યા હતા. આ બેઠક લગભગ દોઢ કલાક સુધી ચાલી હતી.

આ નેતાઓને જવાબદારી મળી

ભાજપે આ 161 હારેલી બેઠકો પર રણનીતિ બનાવવા માટે એક સમિતિની રચના કરી છે. જેના સભ્યોમાં રાષ્ટ્રીય મહાસચિવ સુનીલ બંસલ, વિનોદ તાવડે, પૂર્વ મહાસચિવ નરેશ બંસલ, પાર્ટીના પ્રવક્તા સંબિત પાત્રા અને રાષ્ટ્રીય સચિવ હરીશ દ્વિવેદીનો સમાવેશ થાય છે.

આ ભાજપનો પ્લાન છે

એવું કહેવામાં આવી રહ્યું છે કે લગભગ 27-28 પ્રોજેક્ટ્સ છે જેને લોકસભા ચૂંટણીમાં નબળી માનવામાં આવતી 161 સીટો પર પાર્ટીની સ્થિતિ મજબૂત કરવા માટે લાગુ કરી શકાય છે. 15 દિવસ બાદ કામની સમીક્ષા કરવા માટે સમીક્ષા બેઠક યોજાશે. જવાબદારીઓમાં બૂથનું વર્ગીકરણ, રોડ મેપ, રાજકીય સામાજિક વિશ્લેષણ અને સોશિયલ મીડિયા જૂથો બનાવવાનો સમાવેશ થાય છે.

નરેશ બંસલ પાસે આ રાજ્યોની જવાબદારી છે

2019ની લોકસભા ચૂંટણીમાં ભાજપે વિવિધ રાજ્યોમાંથી 161 બેઠકો ગુમાવી હતી. આ બેઠકો મેળવવા માટે પાંચ સભ્યોની ચૂંટણી સમિતિને જવાબદારી સોંપવામાં આવી છે. નરેશ બંસલને ઉત્તર પ્રદેશમાં 14, હિમાચલ પ્રદેશમાં બે, હરિયાણામાં ત્રણ, પંજાબમાં નવ અને જમ્મુ-કાશ્મીરમાં એક બેઠકની જવાબદારી સોંપવામાં આવી છે. તેવી જ રીતે અન્ય સભ્યોને પણ નબળી બેઠકો મજબૂત કરવાની જવાબદારી સોંપવામાં આવી છે. આ બેઠકો અંગે 12મી જુલાઈના રોજ ભારતીય જનતા પાર્ટીના રાષ્ટ્રીય અધ્યક્ષ જે.પી.નડ્ડાની અધ્યક્ષતામાં ભાજપની લોકસભાની વ્યૂહાત્મક યોજનાની મહત્વની બેઠક ભાજપ વિસ્તરણ કાર્યાલય ખાતે યોજવામાં આવી હતી.